LEHHEMA'AÁ YA/ABUUSE 12

1Deeloodae waawutmo Herode múk Kríshaanáy guna bahh ohín, guri slahhe'eemiís. 2Yakobo hhiyoó Yohana guri gaás ar paánga. 3Ngiwa ár gídaabá múk Yahudi adoodá' gwa qwal/atís, Petro guri óh sleeme. Qoomaadá' a qoomár deelór ur ar Mikaátér taa sluufitisiiká. 4Ooharo nguwa hhe'eés, guna dahaás baraá doó tseegamo, guri qaás gawaá dabaá askaárír daqoró tsiyáhh, as nguwa xuun, umuú daqto askaári tsiyáhh. Gár aa slaá' a gun dabaá múk i qaas, Pasaáka bira waaráhh. 5Petro kuna xún baraá doó tseegamór wa ale. Ala múk Kríshaanáy Mungú guna firín ar ilakaaharu as inós. 6Deeloodá' Herode nguwa duuxár wa slai, nee nguwa sihhitisi geerá muu, xweeraawo Petro ina guú' tla/ángw askaarír tsár. Kwaa tsegiít ar pínguú tsár, nee xuumuuse i afkuú doó tseegamór xuún. 7Hamtidár kilá' malaykamoó Aako iri sihhiít bihhiiwós, do' iri gwa/aát, malaykamoodá' Petro guri tleés, guri báy, “Tlawáng ar gaanslaay.” Pínguudá' oo gawaá dabaawós iri paáhh. 8Malaykamo iri oó', “Sihhiitáng, ya/ataawók dahaaseek.” Iri sihhiít, ya/ataawós giri dahaás, kuri báy, “Inqwaarirók tsiteek, aníng eeharáng.” 9Iri ti'iít ay tsee/a, guri eehaár, ala gaa xuuiiká adór malaykamo aa tleéhh adór tar ló'. Ala inós ngi xui a iigu'utu guna ár. 10Nee afkuú do' oo geera nee oo tsár kuwa waaraáhh, tari hardáh dír afkudá' úr oo muqusli, kudá' tar dahi baraá gixsa. Afkudá' iri kilós gweeriít. Tawa ti'iít, tari kumiít ay alhhe'eesoó loohidá'. Petro kuri geexáy nee malaykamo. 11Nee Petro iimirós iwa faxát, iri oó', “Daxta aga tsaáhh kángw kilá' wa ale gídaabá Aako malaykamoowós ngwa ya/aáw, as aníng iwa ba/amisi baraá dabaá Heróde wa ale, nee baraá adoodá' ta daamarán nee xoorór Yahudi sleémeero.” 12Nee qoomaadá' kaangwí nguwa aldakuuti baraá muunuúwós i ale, iri hardáh dír doó Mariamu, aayór Yohana, kudá' umuuwós oo tsár ta babay Marko, nee múk yaariír ta baraá do'dí dirii' ta firiirín. 13Inós iwa afkwá slumtá wa ateét, dasirka ta babay Roda ina iiár qaasár eér afkuú doó i alé. 14Afór Petro ngiwa tsáhh, tam afkudá' gwa gwediká qwal/uuwo, aqo ina gaanslár tiaiín baraá doó i alé, mukdá' baraá doó i dirií' guna ádbeemuú eér, gídaabá Petro i afkuú dó' wa sihhimiit. 15Kari báy, “Aga slarhhamút.” Ala inós axweesanto iri kumít iri kát, “Tí ar ló'.” Tari oó', “Gaasíng a malaykamoowós.” 16Petro ina kumiít ateetiingo. Afkuú do' nguwa gweeriyé', nguri ariyé', tari waa/oo/amín. 17Giri kuútl ar daba' as iwa xasliitiya'. Adór Aako inós ngura baraá doó tseegamór wa duúx gari alki/iít. Iri oó', “Iidíguuwí amór Yakobo ti hardahase' nee hha'aá hatlá' sleeme.” Iri tláy amór hatlá' i alé. 18Iimi iwa /awakuúr askaári gurhaamír yaariir gari eér, ta kaahi, “Adór Petro aa /imiís laarí a adoomá?” 19Tam Herode nguwa leelehhiít nee nguwa slayká, xuumuuseedá' gari yaahamaamiís, aluuwo hara'aya gari haniís kiwa tsuu/i. Aluuwo Herode yaamaá Yudea giri geexáy, iri /eét ay Kaisaria, iri amoodá' wa hoót. 20Herode iri ló' wa buúhh dír múk Tiro nee Sidoni. Inooín kuri hara daqáy ar muunuú wakleeli'iima. Blasto kuna mulqi'iimár i tleéhh, asma Blasto an heé doó gu'utér waawutmo gu amohhe'eemiís. Tari wayduú áy, asma yaamuuín muruú /ayma dír nguwa slaslaya' a dír yaamaá waawutmo. 21Baalarka wák ar taa axweés, Herode tlabaawós awa waawuti'iima gina dahaás, iri iwiít gawaá kitaangós oo waawuti'iima, iri kwasleemuút geeraaín wa ale. 22Muu iri tseeamín ar afór ur, iri káh, “Afoosíng a afór Mungú, a afór heewooká.” 23Hamtidár kilae malaykamoó Aako Herode guna slaáhh, asma Mungú gwa xirfuú i haniisiiká. Kuri /aáy nee naanagae iri gwaá'. 24Axweesantá Ya/abtór Aako iri kumít nee iri tsiyayaxát. 25Barnaba nee Sauli gadiyér'ín ngiwa hhe'eesiyé', niri Yerusalemúr wa ki/iyé', ti al koná' nee Yohanudá' ta babay Marko.

will be added

X\