LEHHEMA'AÁ YA/ABUUSE 11

1Ya/abuuse nee hhae awa baraá yaamaá Yahudír i diriiá' iidík nguna slayé', gídaabá múk xoordaá hatlá' sleeme axweesantá Mungú gaa ilaóh. 2Nee Petro iwa Yerusalémúr i tsa/án, mukdá' hara'ayár al/utlo gaa ak ooha hhe'ees tari kaangaanuús, 3tari káh, “Ana dáti amór múk taa al/utliniiká tari /ayiín dinkwa nee inooín.” 4Petro iidíguuwí adór ira tleehharuút iimír iimu/úngw wa ale, guri dir'ín i alki/iít ar digir wakeetiingw, iri oó', 5“Aníng niwa Yáfár i dirií', qoomár niwa fiririim, iigu'utu ngway ár, gár adór inqwaarír ur ar ta kon ar pasleemaá tsiyáhh ana ár, kingi gawaá doorí wa /aytimiis ay didá' án ni dirii'. 6Gadaádá' ana ló'wa ga/áw, án ngari aldakuút, makaá ya'a' tsiyáhh awa yaamu ngari ár, nee makaá sla/a, nee yau wasle, nee tsir/ooro. 7Afoo ngay axaás ar aníng babaw, ‘Pétro, tláw, muruusíng tsu/eek, /ayeek.’ 8Nay oó', ‘Aasla'áy, Aáko, asma gár ta waki laqaá ar slasla/aar, aníng aga baloó /ayiiká.’ 9Afoodá' nay malé gawaá doorí wa kí/, sagáwa tsár wa ale, iri ó', ‘Muruú Mungú aa hhohhoeés, kuúng mu babawaar muruú slasla/arén.’ 10Adoodá' ina tleehharút sagaáwa tám wa ale, aluuwo muruudá' sleémeero kuri uuruúx ay gawaá doori. 11Nee siiwadár kilae múk tám naxés aa sihhiít geerá do'daádá' ta i diriiaan, oo tinda Kaisariár wa ya/aáw amor'eé' alé. 12Qeeruú hhoohhoó' ina báy, ‘Nee mukí ti al koonde', ma xurumiitaar.’ Nee hhaeeká' lahhoó' sleeme tay alkoomaán tay dahaán baraá doó heedaádá' i alé. 13Inós ngiri alki/iít gídaabá, ‘Malaykamo ina sihhiít baraá dooeé', iri oó', muu ya/aaweek ay Yafa, as Simoni oo ta babay Petro kuwa ateeti. 14Inós axweesanoó kuúng u ba/amís nee múk do'ók sleémeero, ngu kuúng i oo'.’ 15Aníng axweesani ngiwa adoorí wa iimu/uúm, Qeeruú hhoohhoó' ina gawaaín i aweér, adoodá' iimu/uungo nira gawaarén i aweér. 16/Aymuudá' Aako aa oó' nguri insláw, kudá' iwa oó', ‘Ar ló', Yohana ina baatimiís ar ma'aay, ala kuungá' tundu baatimiis ar Qeeruú hhoohhoó'.’ 17Qoomár atén Aako Yesu Kristo nguwa haratlintiaán, Mungú tina Qeeruuwós i haniís. Nee Qeeruudá' naa diirén i haniís, bar guna dir'ín i haniís sleeme, daxta án Mungú adór ngur baaq a idoomá?” 18Axweesantí kawa axaás tari xasliít, Mungú kuri xirfeés, tari oó', “Laatí, Mungú tam múk xoordaá hatlá' sleeme gwa pa/ángw i haniís oo hhu'u'uungw, as slafiingw nguwa slaya'.” 19Mukdá' aa diyayaa/aat asma slahha'amaayér ur ar naa slayé', qoomár Stefano kuwa gaás, tana tláy ay Foinike nee Kipro nee Antiokia. Heé axweesantá Mungú gaa alki/iit i kaahh dír múk hatlae, aqo har dír múk Yahudi kilós. 20Baraaine bahh'alé a múk Kipro nee Kirene. Mukwí iwa hardáh Antiokia, iidíguú hhoó' oo Aako Yesu kuri alki/iít dír múk Yunani sleeme. 21/Uuruú Aako i gawaaín i dirii', nee múk yaariír Aako guna haratlintií' guri i warqáy. 22Iidíguú mukwí kuna axaás nee múk Kríshaanáy oo baraá Yerusalemúr i dirií'. Barnaba kuri ya/aáw ay Antiokia. 23Nee inós iwa hardáh, tsuuqaá Mungú ngiwa ár, ina qwalaá/, giri báy, “Aako oha hhe'eesaak baraá munerhunge.” 24Asma Barnaba a heé hhoó', nee i haats Qeeruú hhoohhooe nee haratlintaaooro. Múk yaariír Aako guri haratlintií'. 25Barnaba Sauli guri leelehhituú áy Tarsór i alé. 26Nguwa sláy nguri huúw ay Antiokia. Inooín kurkú wák kuri al faák nee eeharuuse, tidá' baraá Antiokiár i dirii', múk yaariír kuri intsaahhatimís. Yaamaá Antiokia an dír geera ar haratlintaauuse kawa báy Kríshaanáy. 27Deeloodár kilae aaruuserka nina Yerusalemu wa /ét ay Antiokia. 28Oo wák tla/angw'ine ku babay Agabo, iri sihhiít iri oó' ar /uuruú Qeeruú hhoohhoó', gídaabá giyér yaariir ni tleér baraá yaamu sleémeerowo. Giyeérí niri tleér qoomár Klaudio tawa waawutmoó múk Rumi. 29Eeharuuse iri al'axwés iri ó', “Umuúqo heewo alee/isoó i aleeslay ngu haniisi, as kuwa huwi amór hhaeerén kudá' yaamaá Yudeár i diriiá'.” 30Adoodá' taa al'axweés, kari tleéhh. Barnaba nee Sauli kiri ya/aáw, as alee/isaydá' kuwa huwi amór bariseedár baraá yaamaá Yudéár i dirii'.

will be added

X\