2 TIMOTEO 3

1Ala axweesanaywí xueek gídaabá, bál deelór alhhe'eesaay binda naká/, qoomár slafíngw gawít i hardát. 2Asma qoomaadá' binda hardát, muu a múk ti kilooín slaá'. Slám muu a múk peésár slaá', nee a múk ti kilooín xirfayeemiís. Muu a múk daara/aám, nee a múk múk /ooslisliím, nee múk xwaylitér'ín ilaiwawa/aaká, nee múk sluufaay wásl. Nee slám a múk hhohhoeká. 3Slám a múk múk maray'ín sla'aaká, a múk wayduú sla'aaká tlehhmuuwo. Nee slám inooín a múk /ayseenuuse, múk slaqooín ila/aamaaká, múk xaraásl, múk hhooeemaá sla'aaká, 4múk múk sakikií/, múk siduuse nee daar/uuse, múk muruú baraaká' yaamu gu ak slaá' ta Munguhe. 5Inooín bir ga/eér a adór múk Mungú, ala /uuruú Mungú ku ya/a/anká. Kuúng ti paratl dír múk adór kwihe. 6Asma baraá múk adór kwihe, hhawaate i dayá' awa ti dahamiisá' baraá maraá múk i alé, nee /ameenár daktanaay kawa afa /aslin, tidá' tlakweema ngaa al'iilouye', nee kiwa uuruxun nee ilatleerír dimbadimbé. 7/Ameenár adór tí daqisleém gár inooín ta slai a intsaahhasa. Ala xu'utír looeema i hardaharo ka baloó aleeslayká. 8Adoodár aáng Yane nee Yambre tira tlaampa'aamisiyé' nee Musa, adoorí an adór hhawaateeká' sleeme tir tlaampa'aamisiya' nee looeema. Mukwí a múk aa fuqureema hhitiruumiit, slám haratlintaaor'ín i qoondaaká. 9Ala inooín geerí kumita ka aleeslayká ak alé. Asma daktu'uumar'ín i geehhoouúr dír muu sleémeerowo, adór daktu'uumadár Yane nee Yambre ira geehhoouúr. 10Ala kuúng aníng iga eehát baraá intsaahhasar'eene, nee digir wakeetingw'eene, nee adoodá' án ni slaa' baraá slafingw'eene. Nee slám haratlintaaor'eé' aga aán, nee daamaarangw'eé', nee sla'aarir'eé' nee qiqtlingw'eé'. 11Nee slám án kuúng ina eehát baraá gusisingw'eene nee baraá slahha'amaayer'eene, adór muruudá' naa sláw baraá yaamaá Antiokiár wa ale, nee baraá Ikonio, nee baraá Listra. Gusisíngw yaariír una sláw. Ala Aako aníng ina ba/amís baraá muruuwí sleémeerowo. 12Mukdá' sleémeero oo hotángw ilaiwa/ame gu slaá' nguwa ar hootiya' baraá Kristo Yesuwo aqo kin gusisín. 13Ala múk tlákw nee al/aymuuse ta ak geerí kumiit baraá tlakweemaawo. Inooín in al/aginá', nee slám inooín awa kilá' kaa al/aáy. 14Ala kuúng a inkihhimuú koón baraá looeemaadá' tuwa intsaahhatimisi nee kudá' kuúng taa ya/aán, asma kuúng a xú' gídaaá heé kuúng uga intsaahhatimis a heemá. 15Asma iimír na/u'uumaroge kuúng Gooír hhohho' a xú', tidá' sagalooa ngi kuúng i hanmiis, as ba/ama kawa sleer ar loohír Kristo Yesu kuwa haratlinti'. 16Gooi sleémeero i hiinsluú Mungú koón, nee i hariín muu nguwa looeemaá i intsaahhatimis, nee muu nguwa afa dukuun nee nguwa naanaq, nee slám muu nguwa geeraharahat as slafíngw ganaá' kuwa ar hooti. 17As daqaní heé Mungú iwa boo/i nee kuwa amoohhe'eemisi as umuúqo gadiyér hhoo' ngiwa tleehhi.

will be added

X\