2 TIMOTEO 2

1Ala kuúng, garmaaeé', Mungú kuúng u tsuuqaá i hanmiis ar baraá Kristo Yesu. Gawaá adoorihe, kuúng masók a heé /uuruú koóm ar tsuuqaaká'. 2Kuúng aga axás tidá' sleémeero aníng naa intsaahhatimís dír geerá múk wa ale. Kuúng intsaahhasarí ka qás dír dabaá múk inkihhimuú koóma i alé, kudá' aleesleemuú koóm oo múk hatlá' intsaahhasaro gu aleesláw. 3Qiqtliím baraá slahha'amuú wa aleeró dinkwa nee aníng, tawa adór askaarmoó hhoó' oo Kristo Yesu. 4Askaarmoó baraá slaqwarár i dirií', i dahiiká baraá daawitimér muruú hatlae, asma gár i slai a geeraharusmoowós kudá' úr kilós gun sla'atimis. 5Tam heé qwaátl baraá neetooro, slamaangw gu slayká barnaxes aa qwaatliiká ar adór hariím. 6Dooslusmoodá' gadiyeét gaa tleehh ar /uuru, inós gár kuwa hariím a bu'ungwduú gadiyeérós gun geerí /aay. 7Tí án ni kah aldakuuteek, asma Aako sagaalooa ngi haniis dirók i alé ar mura' sleémeero kur tsahh. 8Yesu Kristo na inslaweek. Inós a heé tlahhoó Daudi, nina waasleé/ baraá múk aa qaátl wa ale. Gaarí a Ya/abtór hho' ar aníng ni alki/aa/iit. 9Aníng tin slahhe'eemiis as Ya/abtoorí hho', slám taa tseék tawa adór heé tlaákw. Ala axweesantá Mungú kaa tseegiiká. 10Gawaá adoorihe aníng umuúqo gaaro an qiqtliím as múk taa tsawaár oo Mungú, asma inooín sleeme masók alhhe'eesaywo ba/amadár baraá Kristo Yesu i dirii' ngiwa slaya', dinkwa nee xirfuudá' alhhe'eesay wásl. 11/Aymuuwí i harín haratlintaaooro gídaabá, “Atén bar ana alqatlaán dinkwa nee inós, a alhootaán dinkwa nee inós sleeme. 12Atén bar aga qiitlaán, a alwaawuti'iimaán dinkwa nee inós sleeme. Atén inós bura sa tlaankaán, inós sleeme atén ti sa tlaank. 13Atén bar inkihhimuúb koomanaaká, ala inós inkihhimuuwós i baloó faakiiká, asma inós kilós ti aleeslayká sa tlaankuuwo.” 14Mukók inslawtiseek muruuwihe, naanaqeek dír geerá Mungú wa ale gídaabá, axweesanoó tlaampa'aamis kuwa may. Asma tlaampa'aamis i gídaabár konká, slám mukdá' axamiís gu qwaarees. 15Kuúng ilakaaharu tleehheek as tawa sihhit dír geerá Mungú i alé, tawa adór sagadiyusmoó taa ya/án nee inós, sagadiyusmoodá' mure wásl daanduú gadiyeérose, sagadiyusmoodá' axweesantá looeema gaa intsaahhatimis ar adoodá' hariim. 16Kuúng ti paratl nee axweesanoó gídaabár koomaaká, kudá' múk Mungú gwa haratlinti'iiká i axweemaamisi. Asma múk adoorí tan ak sawees dír Munguhe. 17Nee intsaahhasar'ín in geerí kumít adór inkahhoó sooní. Baraá tla/ángw mukwihe Himenayo nee Fileto i dayá'. 18Inooín loohidár looeema ngaa mayé'. Asma inooín ta kaahi gídaabá, “Waasle/ naa qaroó hardáh.” Nee gawaá adoorihe haratlintaaór muu bahh'alé kari qwaareés. 19Ala iimu/úngw haratlintaao aa sihhiít, kudá' Mungú aa qaroó qaás. Iimu/uungwí layár kway gooín a tí, “Aako mukós gu xuu',” nee slám “Umuúqo heewo oo umuú Aako gu ateetiím, tlakweema ngi may.” 20Baraá doó ure xooslár dáw a tidár miisli nee muqsla kiloseká, ala tam xooslár peehháy sleeme i deer, nee ar hhape. Xosluuká' taa geerí oó', kaa qaás as gadiyér xirfuú koom, nee kuká' hatlá' kaa qaás as gadiyér ak xirfuú koomaaká. 21Ala hee bir taa hhoohhooeés nee tiri paraatl nee muruuwí tlákw kwí naa alki/iít, inós daqaní a xooslmoó taa qaás as gadiyér xirfuú koom, kudá' taa hhoohhooeés, oo Aakoó do'dá' wa hariím, nee slám a kudá' hariím baraá umuúqo gadiyér hhooe. 22Ala kuúng ilatleeridár masoombi'iima ilaguweek. Ilakaaharu na tleehheek gan'amu kuwa sleer, nee haratlintaao, sla'aari nee wayda. Adoorí na tleehheek dinkwa nee mukdá' Aakoó ateetiím ar muunuú hhoohhoó'. 23Ala kuúng ma haragwaa'aar baraá tlaampa'amisuú dakti'iima, kudá' sagaalooa wásl, asma a xú' gídaabá tlaampa'amisuuwí gár i huwi a gila. 24Ala lawaalmoó Aako miwa gilá a'áy. Ala masók a heé hhoó' dír umuúqo heewo. Slám masók a intsaahhatusmoó hhoó', nee heé qiqtlíngw baál. 25Slám masók inós a heé tsatsa'aár, qoomár bar i mukdá' qwatsín, oo inós gu tlaampa'amiís. Asma Mungú dooqa mukwí gu hhu'u'úngw i haniis, nee looeema ngiri tsaahhiyá'. 26Gawaá adoorihe inooín sagaalooa ka slay, nee tawa ti'iiti baraá tsaaxweelidár Neetlaango. Asma inooín kaa tsegiít baraá tsaaxweelidá' i alé, as sla'aarír Neetlaangw ngiwa tlehhiitiya'.

will be added

X\