2 TIMOTEO 1

1Anuú Paulo barwaárí ngina gooiím. Aníng a ya/abusmoó Kristo Yesu, ar adoodá' Mungú aa slaá', as slafingwdá' taa geerí al'axweés nguwa alki/iit, kudá' baraá Kristo Yesu i dirií'. 2Barwaárí ngina gooiím amoorók Timoteo, garmaaeé' oo sla'aarusmo. Mungú Baabá nee Aakoorén Kristo Yesu kuúng u tsuuqi, nee u gurtlay, nee u waydí haniisi. 3Mungúwí ni sagadiyuus ar muunuú hhoohhoó' iimír taati'iieé' wa ale un ló'wa sluufimiís. Aníng kuúng u baloó gunqareesaaká aleefirooro tlaatla/aangw nee xweeraawo. 4Hhirhheeriwók bira insláw, aníng gár ni slaa' ló'wa ale a kuúng un ár, as kahhoó' muunuúeé' i haats qwal/uuwo. 5Asma aníng a xuú' adór kuúng Mungú kura haratlintí' ar haratlintaaór waaqooda wasl. Haratlintaaoorí geeraawo aamaarók Loisi gan koón, nee aayoorók Eunike. Slám aníng a xuú' adór kuúng kar koón sleeme. 6Gawaá adoorihe aníng kuúng u inslawtís gídaabá aleesleemuuduú Qeeru oo baraawók i dirií' dukeek i doogin, kudá' Mungú naa dirók i haniís qoomár aníng kuúng uwa dabaaeé' i qaás. 7Asma Mungú muunuú dae ngwa atén i haniisiiká. Gár naa haniís a muunuú tawa kumiitaan /uuruú ar alé, nee oo sla'aari nee oo qoomoó koóm. 8Aakoorén lamabu'uungo mu sa murumiitaar, tam aniíwí taa tseék as inós mi sa murumiitaar sleeme. Ala burtu slahhe'eemiis asma Ya/abtór hho', kuúng qiítl adoorír aníng wa ale, ar /uuruú Mungú. 9Inós atén tina ba/amís, tiri ateét ar ateetamór hhohho'. Adoorí gana tleéhh, a gídaabaheeká as tlehhemi'iirén, ala gana tleéhh as adoodá' inós aa slaá', nee as gurtleemuuwós. Gurtleemuuwós kwí nguna haniís ar baraá Kristo Yesu iimír qoomaadá' gár taa iimu/ún iwa kahh. 10Hamí gurtleemuuwí kunguna geehhooutís as hardahamuú Ba/amusmoorén Kristo Yesu. Inós gwa'ara gana baál, slafiingw nee hhituru'uuma wasle giri gwa/atís ar Ya/abtór hho'. 11Ya/abtoorí hho' an tidá' aníng tisa qaás tawa alki/itusmo nee ya/abusmo nee intsaahhatusmo. 12Gaarí an gár án nis adoorír slahhahhaa'. Ala aníng a murumiitaaká as slahha'amkwí, asma heedaádá' aníng naa haratlintií' u xuú'. Nee slám aníng a xuú' gídaabá gadaádá' inós naa aníng i haniís, de'eengo ga aleesláy ay bál alhhe'eesaay. 13Intsaahhatimisuuduú ló', kudá' taa dir'eén wa axás ilaooheek, ku adoodár intsaahhatimís. Baraá slafiingoge hoót ar Yesu Kristo kuwa haratlintati' nee kuwa sla'. 14Muruudá' hhó' oo tinda kuúng i saayín nee Mungú harmagahheek ar /uuruú Qeeruú hhoohhoó', kudá' baraarén wa hoót. 15Kuúng a xú' adór mukduú baraá yaamaá Asia ira geexáy sleémeero, tam Figelo nee Hermogene sleeme. 16Aako múk doó Onesiforo ngu gurtleemuú i haniisi. Asma daqtá yaarire inós aníng i gurkwa/mamis, tam tsegmueé' kwí aníng tiwa tseék gusa murumiitiiká sleeme. 17Qoomár inós iwa Rumír i hardáh, ina leelehhahhiít, iri sláy. 18Kuúng a ló'wa xú' adór inós aníng ira sagadiyuumaamiís baraá yaamaá Efesooro. Aako inós ngu gurtleemuú i haniisi Bál alhhe'eesaywo, gurtleemuudá' amór Aakoó daáhh.

will be added

X\