2 PETRO 1

1Ánuú Simoni Petro, lawaalmoó Yesu Kristo nee ya/abusmoowós, aníng barwaárí ngina gooiím amór mukdá' haratlintaaór gídaabár koom gaa slay, adór atén wa ale, ar loohír gan'amuú Mungú nee Ba/amusmoorén Yesu Kristo. 2Tsuuqaá Mungú nee wayduuwós i ló'wa doogine' dirhunge, as iidíguú Mungú nee oo Aako Yesu kuwa xua'. 3Mungú atén tina ateét ar xirfuuwós nee /uuruuwós. Inós atén nguri xuaán. Aluuwo inós mura' sleémeero nguri atén i haniís ar /uuruuwós kuduú munguiima, muruudá' sleémeero atén ta sla'aan as tawa hootaan ar slafíngw Mungú kuwa ilaiwawa/aan. 4Gawaá adoorihe tam al'axweesanoó urén nee oo gídaabár koóm atén ugwa slawaán ar xirfuuwós nee /uuruuwós. Kuungá' al'axweesanaywí bura haratlintié', hhitiru'uumár baraaká' yaamu daqaní ilagowto a aleesleerá', nee tlehhmuú munguiima u sleerá'. 5Gawaá adoorihe kuungá' ilakaaharu tleehhaak, as kuungá' baraá haratlintaaorhunge hhooeema kiwa laqaqaanda', nee baraá hhooeemaahunge xu'uti kawa laqaqaanda', 6nee baraá xu'utirhunge kuungá' kiloohúng tiwa ila/aanda', nee baraá ila/angwhunge qiqtliingw kuwa laqaqaanda', nee baraá qiqtlingwhunge Mungú kuwa ilaiwawa/a', 7nee baraá ilaiwa/amerhunge hhae kiwa sla'asla'a', nee baraá sla'aarír hhaeewo muu sleémeero kuwa sla'a'. 8Ala muruuwí sleémeero barnaxes i deer dirhunge, nee bira doogiigín, kuungá' daqaní a tawó iwiwita'aaká, nee slám slafingwhúng daqaní muruú hhó' ngu huuw, nee Aakoorén Yesu Kristo u ló'wa xu'uti hhe'esá'. 9Ala heé muruuwí gu koomaaká, inós a heé ila' naa boo/aye', nee a taampa. Asma aa gunqaruút gídaabá tlakweemaawós kudá' aáng kaa hamaátl. 10Gawaá adoorihe, hháe, ilakaaharu ló'wa tleehhaak as ateetamorhúng kawa gawdesa', nee tsawdorhúng. Ala kuungá' bar aga hoté' ar adoorí, kuungá' daqaní gár dirhunge dukutsmo tleehhiit i káhh. 11Gawaá adoorihe kuungá' daqaní tundu ya/aámár i haniis ló'wa ale tawa data' baraá waawuti'iimár alhhe'eesay wasl, tidár Aakoorén nee Ba/amusmoorén Yesu Kristo. 12Gawaá adoorihe, aníng gár ni slaa' a kuungá' nun inslawtimís daanduú muruuwihe umuúqo daqto. Ala tam kuungá' muruuwí ugwa xui'i, nee tam aga gawduuri'i baraá looeemaadá' taa ilaoti'i. 13Án ngi slaá' a gár hariím aníng kuungá' nuwa inslawtimis umuúqo daqto daanduú muruuwihe qoomaarí án niwa slaaf. 14Asma aníng a xuú' gídaabá qooma aa naká/ ar aníng slaqwtí ngiwa geexaw. Asma Aakoorén Yesu Kristo aníng iga ádbáy. 15Gawaá adoorihe aníng ilakaaharu un tlehhiít as kuungá' muruuwí ku inslasleerá' daqisleém, tam qoomár aníng bara gwaá' sleeme. 16Asma atén tiitár tawo ar sagaalooa aga eeharaharaaniiká qoomár atén iidíguú /uuruú Aakoorén Yesu Kristo nguwa dirhúng i alki/iitaán, nee iidíguú ki/imaawós. Ala atén awa kilá' inós una araán ilaarene, nee xirfuuwós oo munguiima. 17Asma Mungú Baabá guna ilaiwa/amér i haniís nee xirif, qoomár afoodá' baraá xirfuú úr daahh nguwa i hardát, tidá' kah, “Kwí an Garmaaeé', sla'aarusmooeé', oo aníng iga qwal/atis.” 18Atén awa kilá' afoorí ana axaasaán iwa gawaá dooraá dáhh, qoomaadá' atén tawa dinkwa nee inós gawaá tloomadá' hhoohhooe. 19Gawaá adoorihe atén axweesantadá' aaruuse aa alki/ít an ló'wa haratlintiaán. Kuungá' adór hho' aga tlehhé' barnaxes axweesantadá' aga alqaytsité'. Asma axweesantadá' a adór tsaa'astá baraá giwtír wa oh, ay dír iimi i /awaakuur, nee ay dír tsatsee/ír Haymú i geehhouur baraá munerhúng wa ale. 20Ala kuungá' /aymuuwí xuaak gídaabá, aaru'uuma i káhh baraá Gooír hhoohhooe ar hee i ilaharmiisi ar adoodá' inós i slai. 21Asma axweesantá aaru'uuma kinga baloó huuwiiká as adoodá' hee i slai. Ala muu axweesantá Mungú gana axweés kiwa geeraharahaár nee Qeeruú hhoohhoó' baraá muner'ine.

will be added

X\