2 KORINTO 8

1Hháe, atén a sla'aán kuungá' kawa xua' gadiyeédá' taa tleéhh nee tsuuqaá Mungú dír múk Kríshaanáy oo baraá yaamaá Makedonia sleémeerowo. 2Inooín kaa ló'wa iiara'ár ar slahha'amuudá' yaariír oo taa slasláy. Ala tam adoorihe qwal/uuín ina ló'wa tlaáhh, tam ohomér yaariir kari ló'wa duxún, ala tam inooín a narkuutér kilae. 3Adoorí aníng a lamabu'uúm gídaabá inooín ohomeedá' kawa duxún, kaa duxuniká ar adoodá' aleesleemuuín kilós, ala kana ló'wa duxún ar adoodá' aleesleemuuín ba/a. Slám kana duxún ar sla'aarir'ín kilós. 4Inooín atén tina harhheehhe'eemisiyé' nee tiri firiné' gídaabá, inooín sleeme qwal/uudá' ku slay oo alee/isaydá' kuwa haniisi dír múk hhohhó' oo Mungú i alé. 5Inooín adoodá' taa tleéhh a adoodá' atén ta haraxuaniiká. Asma gár har geera a inooín tina kilooín haniisiyé' dír Mungú i alé, nee slám tiri haniisiyé' dirtén i alé ar adoodá' Mungú aa slaá'. 6Tito inós an heé gadiyeérí gaa iimu/un. Gawaá adoorihe atén inós kuri harakeesaán, as inós iwa kumiiti gadiyeérihe, nee tlehhemuuwí oo sla'aari nguwa boo/eesi dirhunge. 7Kuungá' a ló'wa daqaare baraá umuúqo gaaro, baraá haratlintaaooro, nee baraá axweesanaay, baraá xu'uti nee baraá ilakaaharu sleémeero, nee baraá sla'aarirhúng, tidá' atén tiwa sla'a'a. Gawaá adoorihe kuungá' laqaamaak adór kuungá' tar daqaare baraá ohomeesíng ta hanisa'a sleeme. 8Aníng adoorí a kaahaaká as nuwa hara'ayiyiim. Ala aníng iidíguú múk hatlá' un káh, adór inooín ilakaaharu kura tlehhiít baraá alee/isaywihe. Iidíguuwí aníng una káh as sla'aarirhúng ngiwa tsaahh adór tar ar ló'. 9Asma kuungá' gurtleemuú Aakoorén Yesu Kristo u xuá' gídaabá, inós geeraawo a daqaarmo, ala iri narkutmo tleehhiít as kuungá', as kuungá' tawa daqaari'ita' ar narkuuwós. 10Gár án ni kah a tí, a tsiní dirhunge gadiyeérí kurkú /isá' taa iimu/uundé' kawa alhhe'esa' daxta. Kuungá' a múk aa giirin tleehhamooro, ala a baraá tleehhamo kiloseeká, ala tam a múk aa giirin sleeme tleehhamooro kawa sla'a'. 11Gawaá adoorihe kuungá' daxta gár tunduwa hariím, a gadiyeérí taa iimu/uundé' an alhhe'eesá'. Ohomeerí alhhe'eesaak duxuungo ar adoodá' muruudá' ta koonda'. 12Asma kuúng gaa barnaxes a slá' duuxaro, yaareema nee niinaweema a gaarooká. Mungú gár i slai a tidá' kuúng ta koon kawa hanis, a gídaabaheeká tidá' kuúng ta koondaaká. 13Aníng adoorí a kaahaaká as inooín amohhooa ngiwa slaya', nee kuungá' slahha'amu kuwa sleera'. Ala masók mura' sleémeero i alqón. 14Kuungá' qoomaarihe muruú yaariír u koondá'. Gawaá adoorihe a gár hariím kuungá' inooín kiwa alee/isa', kudá' baraá slahha'amaayér i diriiá'. Asma qoomarkaaro kuungá' wané a slahha'amaayér koondá', daqaní inooín bir muruú koná', inooín nu alee/iisiyá'. Gawaá adoorihe sleémeero tari qoondá'. 15Adoorí an adoodá' Gooi i kat sleeme, gídaabá, “Heé muruú yaariír gwa burumbuur, inós muruuwós aa tlahhiiká, nee kudá' muruú niiná gwa burumbuur, inós gár gu wa /aaruur i káhh.” 16Aníng Mungú un sluufimiís, kudá' Tito gwa muunuú i haniis oo kuungá' nuwa alee/iimisi adór atén wa ale. 17Inós atén una firiimaán niwa amorhúng i hardahi, nee inós iri ya/án. Ala atén tam qoomár nguwa firiimaniikahe, inós inqo tawó daqeemuú slaa' kilós alé. 18Hhiyaako sleeme ngun ya/aawaán dinkwa nee inós. Kwí an kudá' taa xirfayeés nee Kríshaanáy sleémeero, as gadiyeédá' i tlehhiiti ar Ya/abtór hho' ngiwa alki/iiti. 19Ala a har tí kiloseeká, ala inós kuna tsawaár nee Kríshaanáy sleémeero as iwa aa'aá kay dinkwa nee atén, qoomár bar alee/isaywí oo sla'aari bur huuwaán, alee/isaywí atén ta sagadiyuusaan. Adoorí kana tleéhh as Aako iwa xirfuuti, nee as sla'aarirén niwa geehhoouur gídaabá adór alee/iimis kur sla'aán. 20Adoorí atén gár kasa tleehhaán a axweesanoó muu un baqamiimaán gídaabá matawa oó', alee/isaywí úr ku amohhe'esiiká ar loohír hariím. 21Gár atén ta sla'aan diirihe a adoodá' hhoo' an tleehhaán, ala a dír ilaá Mungú kiloseká, ala tam dír ilaá muu sleeme. 22Hhiyoó hatlá' ngu malé ya/aawaán dinkwa nee inooín. Inós atén ngwa araán daqtá yaarire, kuri tsaahhaán gídaabá inós a heé ilakaahaár. Nee qoomaarihe ilakaaharuuwós aa ak ló'wa doogín, asma haraxu'utír ur ga kón dirhunge. 23Gawaá daanduú Titowo án gár ni oo' a tí gídaabá inós a alee/isusmooeé' oo gadiyér tleéhh dinkwa nee aníng as kuungá'. Hhaeerén kudá' hatlá', inooín a múk tinda ya/aáw nee Kríshaanáy sleémeero, nee Kristo xirif gu sláy as inooín. 24Gawaá adoorihe múk Kríshaanáy daxta ngi ar, adór kuungá' inooín kir ló'wa sla'á'. Nee ngiwa tsaahhiya' sleeme gídaabá adoodá' atén naa ooaán a ar ló', qoomár kuungá' nuwa xirfayeemisaán geeraaín wa ale.

will be added

X\