2 KORINTO 12

1Aníng gár tiwa hariím tin kilooeé' xirfayeemiís, tam adoorí gár i bu' i kahha. Ala daxta aníng a kumiít axweesanto iidíguú iigu'utu nee geehhooeemisuuduú Aako naa aníng i laqán. 2Aníng heeko wák u xuú' oo baraá Kristo. Kureeraá mibá nee tsiyáhh naa waarahhiyé' heewí kuna ar tláy gawaá doori ay baraá dooraá tám. (Inós qoomaadae tim slaqwtá kón, aníng a xuaaká, laqaá tim slaqwtá konká, aníng a xuaaká, Mungú ga xuu'.) 3Aníng heewí u xuú'. (Ala inós tim slaqwtá kón, laqaá tim slaqwtá konká, aníng a xuaaká, Mungú ga xuu'.) 4Aníng a xuú' adór inós kura ar tláy ay didá' amohhoo'. Axweesanoó ooaro ta aleeslayká guri axamiís, axweesanaydá' tawa ya/anká hee nguwa axweesi. 5Daanduú heewihe aníng ti xirfayeemiís, ala aníng ti kilooeé' xirfayeemisaaká, ala aqo har daqaatlakwer'eé' kilós. 6Ala aníng tam ti kilooeé' xirfayeemisa, a gídaabaheeká aníng a adór daktani, asma gár aníng ni oo' a ar ló'. Ala aníng ti máw kilooeé' xirfayeemisuuwo, as hee miwa oó' gídaabá aníng ti ak úr ta adoodá' i ara'ari, nee i axamiisi dir'eene. 7Geehhoeemisuudá' urén oo tinda aníng i haniís i ló'wa waa/oo/amór kón. Gawaá adoorihe laqaymo kunguna gawaá slaqwte'eé' dahaás, as aníng mawa daar/uút as daanduú geehhoeemisuudá'. Laqaymoowí naa sláw a malaykamoó Neetlaangw, oo tinda ya/aáw as aníng iwa tlaaqarmo slahhi, as aníng mawa daara/uút. 8Gawaá daanduú gaarihe aníng Aako una firiím sagaáwa tám wa ale, as gaarí iwa qutl dir'eene. 9Ala Aako iri báy, “/Uuruueé' i bu'uut diroge. Asma /uuruueé' ku ak úr, kuúng burtu daqaatlaákw.” Gawaá adoorihe aníng tin xirfayeemiís ar qwal/uú yaariír as daqaatlakwer'eé', as /uuruú Kristo iwa baraaeé' wa hooti. 10Gawaá adoorihe aníng a qwalaá/ aníng barnaxes ti daqaatlaákw, laqaá tam ti muruú tlákw i tlehhiít, laqaá tam a daawimiít, laqaá tam ti gusiisín, nee laqaá tam ti slahhe'eemiís as Kristo. Asma aníng barnaxes ti daqaatlaákw, daqaní aníng a /uuruú koóm. 11Aníng niwa adoorír axweés a adór daktani. Ala kuungá' aníng ina harakesé'. A hariímarhúng geeraawo aníng iwa xirfayeemisa'. Asma aníng tam a gaarookahe, ala gár aníng iga wa /aaruur i káhh ta ya/abuuserhúng tidá' urene. 12Qoomár aníng gadiyeét ngiwa tleéhh tla/angwhúng wa ale, tlehhemi'iidá' sleémeero ina tleéhh ar qiqtliingw, kudá' aníng i laqaqaamá' gídaabá aníng a ya/abusmo. Layadu ina tleéhh, nee tlehhema'aá waa/oo/amór koomá', nee tlehhema'aá aleesleemuú laqaaqamá'. 13Gár dirhunge aníng naa /itiím i káhh, baraá tidá' naa haniís dír múk Kríshaanáy oo yaamaá hatlae. Ala aqo har tí kilós gídaabá kuungá' naa huwár ar awiiká. Án gurtlawaaré' as nuwa sadakuús adoorír alé. 14Qaytsité', gaarí a sagaáwa tám aníng niwa daqeemuú slaa' amorhúng i alé. Nee án kuungá' nu huwár ar awaaká. Asma aníng gár ni leelehhiit a muruuhungeeká, ala a kuungá'. Asma a hariímarooká na/'ii mura' nguwa burumburina' as xwaylité, ala a xwaylité mura' gun burumburiín as na/'ii. 15Aníng barte'eene a qwalaá/ muruueé' sleémeero nguwa haniis, nee slám ánuú kilá' tiwa haniis as munerhúng. Xáy, kuungá' sla'aarirhúng i /aaruúra dir'eene, as adoorí án kuungá' nuwa ak ló'wa slaa'? 16Ala kuungá' a kata' gídaabá, “Ar ló', kuúng taa huwár ar eeriiká. Ala as kuúng tawa al/aymusmo, kuúng atén taa al/ák ar lamtók.” 17Ahaá, garhúng ar aníng naa sláw iqo deéro dír dabaá mukdá' aníng naa amorhúng i ya/aawi? 18Aníng Tito una firiím niwa amorhúng i daqay, nee hhiyaaduú hatlá' una ya/aáw dinkwa nee inós. Xáy, Tito gár dirhunge aa sláy i deéro? Qeeruú hhoohhoó' kudá' aníng i geeraharahaár, a kudá' inós sleeme gu geeraharahaáraáke? Nee slám hotaangós a adór kwe'eeneekáhe? 19Án ngi slaá' qoomaarí sleémeero kuungá' a kata' gídaabá atén gár tas adoorír axweesaan a atén tin kilootén aleekal/aamaán dír geeraahunge, aasla'áy, a adoosingeeká. Tí ta axweesaan, an axweesaán ar baraá Kristo, dír geerá Mungú wa ale. Ala sla'aaruuser'eé', tí sleémeero ana axweesaán as kuungá' tunduwa tleehhi. 20Asma aníng gár ni da'ayumiit a tí gídaabá, án binda hardáh amorhúng i alé, án kuungá' adoodá' nur slaa' dooqa nu adoodá' i awaaká. Nee slám a da'ayumiít gídaabá kuungá' aníng i aandá' ar adoodá' kuungá' ta sla'a'aaká. A da'ayumiít gídaabá dooqa án kuungá' dír ni aw a baraá gila, nee gur'ee nuwa ohiin, nee xaraasleema, fola, tloqomis, kaantiingw, daara/aangw nee tlaahhi. 21Aníng a da'ayumiít gídaabá aníng binda malé hardáh amorhúng i alé, Mungúeé' aníng i malé mureekees dirhunge, nee aníng niri gurhaamuút as múk yaariír oo aa hhu'u'unká tam ay hamí, kudá' tlakweema gaa tlehhiit iimír qoomaadá', tari kumiít baraá slasla/aruuine, nee baraá tsaatu'uumaro nee tam baraá fuqti'ín tidá' taa tlehhiiti.

will be added

X\