1 TESALONIKE 5

1Hháe, ala iidíguú qooma nee siiwa ar muruuwí i tleehharuuti gár ngis kuungá' i gooiim i káhh. 2Asma kuungá' kilá' a xuá' gíddabá deelór Aako ni hardát adoodár fisusmo nir hardahi xweeraawo. 3Qoomaadá' tawa kaahi, “Wayda i deer nee amohhooa,” qoomaadá' an tidár hhitiru'uuma nur hhaawis, adoodá' /ameenír tsiiháy asltá xwayla ngir i hardararat. Ala guway ku aleeslayká. 4Ala kuungá' hháe, kuungá' a baraá giwtirooká. Gawaá adoorihe a hariímaarooká deeloodá' kuungá' nuwa ar sleer adór fisusmór alé. 5Asma kuungá' sleémeero a múk gwa/atamaaye, nee múk tlaatla/aangw. Atén a múk xweeraawooká, laqaá a múk giwtirooká. 6Gawaá adoorihe atén gár tiwa hariím masók an guanaaká adoodár múk hatlá' sleémeero wa ale, ala masók an dalaa'aán nee tawa múk qoomoó koóm. 7Asma mukdá' guú', i guaain a xweera, nee mukdá' ooniimiít, i oonimaamiti a xweera. 8Ala ateéká' múk tlaatla/aangw, atén masók an múk qoomoó koóm. Atén masók haratlintaao nee sla'aari an da/ewár baqaán adór gaamboórén wa ale. Nee haraxu'utír ba/ama an dahaasaán adór kofiiyár gawít wa ale. 9Asma Mungú atén taa tleehhiiká as sakwasleemaarós kawa slawaan, ala tina tleéhh as ba/ama kawa slawaan ar loohír Aakoorén Yesu Kristo. 10Inós atén tina sa gwaá', as atén tawa hootaan dinkwa nee inós, barnaxes a dalaa'aán laqaá barnaxes a guaán. 11Gawaá adoorihe kuungá' ti kiloohúng gurkwa/amise', nee ti kwa/amise', adoosír hamí ta tlehhaahhita'. 12Hháe, a sla'aán kiwa tsahha' kudá' ti daawitimisá' as kuungá', nee nu sageesihhimiitá' ar baraá Aako, nee nu gurbu'uumá'. 13Múk adór kwí ilaiwaa/a hhe'eesaak ar sla'aari as gadiyér'ín. Kuungá' wayda ar hootaak. 14Hháe, atén kuungá' nu firiimaán, mukdá' gadiyér sla'aaká naanaaqaak, gurkwa/asaak múk daér koóm, mukdá' haratlintaao niiná alee/iimiisaak, slám kuungá' masók a múk qitluú koóm dír muu sleémeerowo. 15Ga/aawaak, umuúqo heewo dirhunge magoót mingiwa buú', ala umuúqo daqto ti hhooeemaá i tlehhite' kuungá' kiloohúng nee dír muu sleémeerowo. 16Qwalaala/é' daqisleém. 17Firo ma baloó mawaara'. 18Mungú sluufimisaak baraá umuúqo gaaro. Gaarí an gár Mungú i slai dír kuungaásingá' awa baraá Kristo Yesu i diriia'a. 19Qeeru mu xasltisaara' as kuwa siasia'. 20Axweesanoó ya/abtór amór Mungú daahh mu waaqaqa'aara' baloó alé. 21Mura' sleémeero iiaraagáy, oo hhó' ku otá'. 22Ti paratle' dír umuúqo gár tlaakwe. 23Mungú inós u kilá', kudá' atén ti wayduú i hanimiís, inós kuungá' nu hhoohhooeesi kángw kilá' wa ale. Nee slám inós munerhúng nee qeeruuhúng nee slaqoohúng ngi xun as gár tlaakw munduwa sleér, ala kuungá' masók a múk xaslxaansli wásl ay bál deeloodár Aakoorén Yesu Kristo nay hardat. 24Inósuudá' kuungá' nu ateetiím i inkihhimuúa kón, nee inós adoorí ga tleehh. 25Hháe, atén ti aleefiriiriinde'. 26Hhae sleémeero intsihhiisaak ar ma'amis, adoodár múk hhohhó' oo Mungú tir ma'amaamisi. 27Án kuungá' nu hara'ayiím ar umuú Aako gídaabá, barwaárí ka soomusá' dír hhae sleémeerowo. 28Aakoorén Yesu Kristo kuungá' nu tsuuqi.

will be added

X\