1 PETRO 5

1Kuungá' bariisee, án kuungá' nu gurbuú'. Asma aníng sleeme a aakoó adór kuungá'. Slám aníng a lamabu'usmoó slahha'amaayér Kristo. Tam xirfuudá' ta geehhooeesi a kwe'eé' sleeme. 2Gawaá adoorihe án kuungá' nu gurbuú', gídaabá. Kuungá' múk Mungú de'eemaak, kudá' taa dabaahúng i saayín, nee kawa sageesihhimita'. Ala adoorí ma tleehhara' as tunduwa harakeemisi, ala masók an tlehhá' ar sla'aarirhúng ar kilá', asma an adoodá' Mungú i slai. Slám ma tleehhara' as peésa kawa sleera' kilós ala na tleehhaak ar muunuú /awaák. 3Nee slám kuungá' miti baaluuse tlehhiitara' daanduú kudá' taa amorhúng i saayín, ala masók kuungá' an slaqsaay tleehhitá' dir'ine. 4Nee de'eamusmoodá' úr qoomár burkwa geehhooeés, kuungá' slamangwduú xiríf u sleerá', kudá' baloó hhitiruutaaká. 5Kuungá' masoómba sleeme, iialooemisé' dír múk urene. Kuungá' sleémeero niinaweema ya/aamaak, as tiwa kiloohúng sagadiyusa'. Asma kaa gooín gídaabá, “Mungú múk daara/aám gu sii', ala mukdá' ti niinaweemiís gu gurtláy.” 6Gawaá adoorihe, ti niinaweese' baraá dákw Mungú, kudá' /uuruú koóm, as inós nuwa uráy i haniisi, qoomaarós bira xeér. 7Daawitimerhúng sleémeero gawaawós ti qase', asma inós ti daawitimis as kuungá'. 8Kuungá' masók a múk qoóm. Dalaaé', asma wakusmoohúng, Neetlaangw, i harweerirín adór dirángw wa ale, kudá' aahhamiím, as heé i gu/i nguwa leelehhiiti. 9Ala kuungá' kwí siaak, tawa ló'wa sihhita' baraá haratlintaaooro. Asma kuungá' a xuá' gídaabá, slahha'amuú adór kwí kuungá' ta slasleera', hhaeehúng sleeme ngu slaslayá' umuúqo dír i dirii'iia baraaká' yaamuuwo. 10Mungúdá' tsuuqa sleémeero gi tawó hanmiís, inós kuungá' naa ateét as xirfuuwós kudá' alhhe'eesay wásl kuwa sleera' ar loohír Kristo. Kuungá' burtunda slahhe'eemiís deelór niinawe, daqaní Mungúdá' oo kuungá' naa ateet, gadiyeérós ga alhhe'ees baraahúng wa ale. Inós kuungá' nu aleesleemuú i haniis nee nu gawdees, nu /uuruú i haniis, nee nu sihhitis baraá haratlintaaooro. 11Aleesleemu a kós ay alhhe'eesay wasle. Amin. 12Án barwaárí naa amorhúng i gooiimi a Silwano ina alee/iís. Inós a hhiyoó inkihhimuúb koóm ló'wa ale. Barwaárí ngina gooiím as kuungá' nuwa gurbuu' nee nuwa lamabu'uum gídaabá gaarí a gurtleemuú ló' oo Mungú. Ala gawaá adoorihe, gawduwé' baraá gurtleemuuwí wa ale. 13Múk Kríshaanáy kudá' baraá yaamaá Babélír i dirií' kuungá' nu intsihhiimiis. Mukwí kwaa tsawaár adór kuungá' wa ale. Nee garmaaeé', Marko, sleeme kuungá' nu intsihhiimiis. 14Kuungá' ti kiloohúng intsihhiimise' ar ma'amisuú sla'aari, ar adoodá' múk hhohhó' oo Mungú tir ma'amaamisi. Mungú kuungá' nu waydí haniisi, kuungaásingá' sleémeero awa baraá Kristó i diriiá'. Amin.

will be added

X\