1 PETRO 3

1Kuungá' tlaáwaay sleeme, iialooemisé' dír hhawaateehunge, asma tam hhawaateehúng kudá' axweesantá Mungú ngaa haratlinti'ii'iiká, ngi haratlinti'iiye' as tlehhemi'iihúng, tam kaa ádbaykahe. 2Asma slafingwhúng kwa ár, adór kur hhohhó', nee adór ir ilaiwa/amér kon. 3Kuungá' tlaáwaay, hhohhoaari ma leelehhitara' ar parootír slaqwa, adór se'eengw kuwa hhutlita', nee tiwa parootusa' ar muruú tlaxór gawden, nee ar inqwaruú hhohhó'. 4Ala hhohhoaarirhúng masók a hhohhoaaridár baraá muuná, tidá' geetlaakw, slám i hhitirutaká. A hhohhoaaridár muunuú tsatsa'aár nee amoohhoa. An tidár gídaabár koom ló'wa ale geerá Munguhe. 5/Ameenaadá' hhohho' ar aáng hhohhoaari adór ngira leelehhít an adoorí. Inooín Mungú kuna haraxuú', tam iri iialooemís dír hhawaateeine. 6Sara adoorí gana tléhh. Inós ina iialooemís dír Abrahamuwo, guna Aakoowós ar ateetiín. Kuungá' bar tlehhma'aá hhohho' iga tlehhé' awa adór kuká', nee bar hotá' ar dae wasle, daqaní kuungá' a na/'iiwós. 7Kuungá' hhawaáte, nee tlaawayhúng hooté' ar sagaalooa, kiwa ilaiwawa/a' as inooín tawa múk /uuruú koomaaká ta kuungane, asma inooín nee kuungá' a al aaluusér slafíngw alhhe'eesay wásl, kudá' tinda tawó haniís amorhúng i alé. Adoosíng tleehhaak as firorhúng makawa baáq. 8/Aymuú alhhe'eesaay a kwí, “Kuungá' sleémeero masók a múk ti kaangw axamiís, nee múk gurtleemuú ara'ár, nee slám hhae na sla'asla'aak. Kuungá' masók a múk gurtleemuú koóm, nee múk ti kilooín niinaweemiís. 9Tlakweema mi kuqá' ar bu'uumara', laqaá burtunda /ooslín, /oosli ma tiqá' ar bu'uumaara'. Ala kuungá' masók tsuuqaá Mungú in hanmisá'. Asma gaarí an gár Mungú kuungá' nusa ateét sleeme as tsuuqa kiwa sleera'. 10Asma kaa gooín gídaabá, ‘Umuúqo heewo oo slafiingós gu slaá', nee oo deelór qwal/amaaye ga leelehhiít, inós tsifraangós ngu ilaa/i tlakweema mingiwa ooín, nee afkós ngu ilaa/i lama mingiwa káh. 11Inós tlakweema ngi may nee tlehhema'aá hho' ngi tleehhi. Wayda ngu leeleehhi ar ilakaaharu. 12Asma Aako mukdá' gan'amuú koóm gun ga/áy, nee firor'ín ga axamiis umuúqo siiwaro. Ala gitsee/aá Aako i daanduú mukdá' tlakweemaá tlehhiít. Asma Aako mukdá' tlakweemaá tlehhiít gu sii'.’ ” 13Ala heé kuungá' nu aleesláw slahhe'eemisuuwo a heemá bar kuungá' gár ta sla'a' a hhooeema in tlehhá'. 14Ala kuungá' bartundun slahhe'eemiis as gan'amu kuwa tlehhiité', kuungá' daqaní a múk amoohhó'. Kuungá' mutunduwa tawó dae tlaáq, laqaá ma tawó amoqwaqwadiimara'. 15Ala Kristo na xirfeemisaak baraá munerhunge tawa Aakoohúng. Umuúqo siiwaro kuungá' masók taa amohhe'esé' ar heé yaahamiís kuwa i ilawatsa', as iidíguú haraxu'utidár baraahúng i dirii' kuwa alki/ita' dirós i alé. 16Ala adoorí tleehhaak ar tsatsa'areema nee ilaiwa/ame, as munerhúng masók ka hhohho'. Gawaá adoorihe mukdá' kuungá' nu daanda kaantiím as slafingwhúng oo Krishaanu'uuma, inooín ki murekeesi as kaantingw'ín kudá'. 17Asma a tsiní burtu slahhe'eemiis as tlehhema'aá hhohho', barnaxes a sla'aarír Mungú, ta tuwa slahhe'eemisi as tlehhema'aá tlakw. 18Tam Kristo sleeme inós ina gwaá' as tlakweema. Ina gwaá' sagaáwa wák wa ale as tlakweema sleémeero. Inósuudá' gan'amuú koóm kuna slahhe'eemiís as mukdá' gan'amuú koomaaká, as inós atén tiwa huuwi amór Mungú. Slaqwtós kana gaás, ala kuri waaslee/atís ar Qeeru. 19Slám iri tláy ar baraá Qeeru ay dír muneedár baraá tseegamór i dirii', gari i dahareemiís. 20Mukwí an kudá' Mungú gwa sii' qoomár de'emaá Nuhuwo. Qoomaadaádae Mungú ina daamarán ar qiqtliingw qoomár miringamoó úr kuwa tleehhahhiiti. Baraá miringamoodae múk niiná ina ba/án ar baraá ma'aay, inooín a dakaát kilós. 21Ma'aydá' a slaqsoó baatiísmo, kudá' kuungá' nu ba/amiimís de'emakaákae. Baatiísmo a gídaabaheeká slasla/aruú slaqwa gun hingeemiis, ala baatiísmo a gídaabá hee Mungú gun firiirín as muunuú hhoó' nguwa slay, ar /uuruú waasle/uú Yesu Kristo, kudá' aa iwiit dákw doó /iyáy oo Mungú. 22Inós ina tsa/án gawaá doori, nee malayke nee kudá' aleesleemuú koomá' nee kudá' /uuruú koomá' kaa gawaá dabaawós i qaás.

will be added

X\