1 PETRO 2

1Gawaá adoorihe tlakweema sleémeero hingeesaak, lama nee hhaahhafiingw sleémeero, da/i nee /ayseeno sleémeero. 2Adoodár na/'aá qaweero ilwa ngir ilatleeruusiya', kuungá' sleeme ilwaá qeeru, ilwaadá' kilá', ilatleeruusaak, as kuungá' tawa uraareera' ay dír ba/ama kay i hardata', 3kuungá' bar aga tsaqé' gídaabá Aako ku hhoó'. 4Qwalaasé' amoorós, inós a tlaa/adá' slaaf. Inós kwaa sií' nee muu, ala dír geerá Munguhe inós a tlaa/adá' taa tsawaár, tidá' gídaabár koom. 5Kuungá' kilá' sleeme masók a adór tlaa/aá slafá', tundu tleehhi tawa doó qeeru tleehhita'. Kuungá' masók a geeraharuusér saaliingw tleehhitá', tidá' hhohho', nee ilahhooár qeeru kawa huba', tidá' ta ya/an nee Mungú ar loohír Yesu Kristo. 6Asma kaa gooín baraá Gooiro gídaabá, “Ga/aaweek, aníng tlaa/ár ur ar do' ir gawduy, tidá' taa tsawaár nee ar gídaabár koom, a qaás gawaá Sioni. Umuúqo heewo oo inós gwa haratlintii' ku murekeesiiká.” 7Gawaá adoorihe inós i xirif tleehhiit dír kuungaásingá' aga haratlinti'ii'i. Ala dír kudá' naa haratlinti'ii'ikahe a adór “tlaa/aadá' tleehharuuse aa sí' aa tlaa/ár ur tleehhít ar koo/i.” 8Nee kaa malé gooín gídaabá tlaa/arí a, “tlaa/ár inooine a dukuutsmo, nee tlaa/ár inooín ta i huui.” Inooín Axweesantadá' haratlintaaooro kan siaasii'. Gawaá adoorihe axweesantadá' iri dukuutsmo tleehhít dir'ine, asma gaarí an gár Mungú aa slaá' daandeemaaine. 9Ala kuungá' a xoorór taa tsawaár, geeraharuusér saaliingw ar doó waawutmo, xoorór hhoohhoo', xooroodár Mungú aa tós tleéhh, as kuungá' tlehhemi'iiwós kudá' xirfayen kuungá' kiwa alki/ita', kudá' inós aa tleéhh. Inós kuungá' nuna ateét baraá giwtír wa ale, nuri dahaás baraá gwa/atamaayeerós tidár waa/oo/amór koom. 10Asma kuungá' aáng geeraawo a xooroorooká, ala hám daxta a xoorór Mungú. Kuungá' aáng gurtleemuú Mungú ugwa sleeri'iiká, ala hám daxta gurtleemu ugwa sleeré'. 11Sla'aaruuser'eé', kuungá' a adór múk waaraáhh nee adór dahaaye tawa hota' baraaká' yaamuuwo. Ala án kuungá' nu gurbuú', kuungá' ti harmagahhe' nee ilatleeri sleémeero ar slaqwa, asma i sláqw nee qeeru. 12Slafingwhúng masók i tlehhema'aá hhohho' laqaaqán dír geerá múk xoorduuwo. As qoomár inooín bartundu /aysaní tlaaq, gídaabá a muruú tlákw tlehhitá', ala inooín tlehhemi'iihúng awa hhohho' birkaa ara'ár, daqaní inooín Mungú ku xirfayees bál inós birna hardáh. 13Kuungá' iialooemisé' as Aako dír muu sleémeero oo aleesleemuú koóm, kudá' taa uráy hanmiís nee muu. Iialooemisé' dír waawutmoowo, asma inós i aleesleemuú kón ta muu sleémeerowo. 14Iialooemisé' dír ga/awuuseerose, asma inooín a múk tinda ya/aáw nee inós, as mukdá' tlakweema gaa tlehhiit kuwa doohhomiisi, nee kudá' tlehhema'aá hhohho' gaa tlehhiit kuwa diidi'iimisi. 15Asma gár Mungú i slai a tí gídaabá, kuungá' bar hhooeema iga tlehhé', daqaní múk axweesantá dakti'iimár axweés u xasltisá'. 16Kuungá' a múk taa gweér baraá lawaali'iimár wa ale. Gawaá adoorihe gweermoosíng tunduwa gweér masók a Mungú un sageegadiyusá', ala a gídaabaheeká a tlakweema in tlehhitá' ar tawa axwesa' gídaabá atén taa gweér. 17Muu sleémeero ilaiwawa/aak. Hhae sla'asla'aak, Mungú ilaiwawa/aak. Waawutmo ilaiwa/ame ti hanise'. 18Kuungá' lawaále, iialooemisé' dír daqaarerhunge ar ilaiwa/amér yaariir. Ala a gídaabaheeká kudá' hho' nee kudá' tsatsa'aren kilooín, ala tam kudá' xaraaslá' sleeme. 19Daqaní Mungú kuungá' nu tsuuq, asma Mungú ku sla'atimis nee heé slahha'amu gu sa qiqtlaatliím as gan'amu. Heé qiqtliím as Mungú baraá slahha'amaayeedá' inós wa hariimaaká, inós ku tsuuq nee Mungú. 20Ala heé qiqtliím baraá slahha'amaayeedá' inós wa hariima as tlakweemaadá' aa tleéhh, inós gár kus xirfeemisi a milá? Ala kuungá' adór ganaa' bar ana tlehhé', slahha'amu kuri qiqtliindá', daqaní tundu tsuuq nee Mungú. 21Gaarí an gár kuungá' tundusa ateét. Asma Kristo inós kuna slahhe'eemiís as kuungá', inós iri slaqsaay tleehhiít as kuungá' digiruuwós kuwa eehada'. 22Inós tlakweemaá aa tleéhh i kahhiyá', slám lama gaa baloó ooiiká. 23Inós qoomár kuwa /ooslislín, /ooslima gaa taqár buiiká. Qoomár kuwa slahhe'eemiís, mukdá' gwa slahhe'eemiis gwa dae tsatiiká, ala tiri qaás dír dabaá Mungú, kudá' sakwasleemár ganaa' ga tleéhh. 24Kristo inósuú kilá' tlakweemaarén gina gagaár ar gawaá slaqwtós ay gawaá msalaába, as atén masók a adór múk aa qaatl baraá muruú tlakweemaawo, nee slám atén masók a múk slaáf baraá muruú gan'amuuwo. Kuungá' tunduri hungu/uús as inkahhi'iidá' inós aa sláy. 25Kuungá' aáng a adór bee/ángw aa qwaar, ala hám daxta naa ki/é' amór de'eamusmo nee xuumusmoó munerhúng.

will be added

X\