1 YOHANA 5

1Umuúqo heé adoorí gaa haratlintii' gídaabá, Yesu a Kristo, heewí kwa laqwaál nee Mungú. Heé baabuú na/aay gu slaá', na/aydá' baabá aa laqwaál gu slaa' sleeme. 2Adoorihe na/'aá Mungú adór kir sla'aan a tsaahhaán, bar Mungú u sla'aán, nee dabeerós bara eeharaán. 3Asma dabeerós bar eeharaharaán, tí gár i laqaaqaan a gídaabá, atén Mungú u sla'aán. Slám bur sla'aán, dabeerós eeharto ka gawideká. 4Heé taa laqwaál nee Mungú, yaamu gir baa/. Mungú bura haratlintiaán, haratlintaaoorén tí an gár yaamu gir baa/. 5Heé yaamu gir baá/ a heemá, aqo har kudá' aa haratlintí'iíke gídaabá, Yesu a Garmoó Mungú. 6Yesu Kristo an kwí naa hardah ar ma'aay nee tseere. Naa hardihiiká ar ma'aay kilooín, ala nina hardáh ar ma'aay nee tseere. Qeeru an kudá' gu lamabu'uúm, asma Qeeru a looeema. 7Asma awa ngu lamabu'uumá' a tám [gawaá dooriwo, a Baabá, nee Axweesani, nee Qeeruú hhoohhoó', ala kuká' tám a wak. 8Awa tám i dayá' baraá yaamuuwo, awa ngu lamabu'uumá']. Qeeru, nee ma'aay, nee tseere. Kuká' tamaawo lamabu'ungw'ín a wák. 9Atén lamabu'úngw muu u ya/aa/amaán, ala lamabu'úngw Mungú ku ak úr. Lamabu'úngw Mungú a kwí oo Garmaawós nguwa lamabu'un. 10Heé Garmoó Mungú gwa haratlintii', lamabu'uungwí gu kón baraawose. Heé Mungú gwa haratlintii'iiká, a Mungú guna lamusmo tleéhh, asma lamabu'uungwí Mungú Garmaawós nguwa lamabu'ún, gwa haratlintii'iiká. 11Lamabu'uungw an kwí, Mungú slafíngw alhhe'eesay wásl nguna haniís. Slafiingwí naa haniís i baraá Garmaawós i dirii'. 12Heé Garmoó Mungú gwa haratlintii', slafiingwí gu kón, oo Garmoó Mungú gwa haratlinti'iiká, slafiingwí gu konká. 13Kaangwí nguna kuungá' i gooiím, asma kawa xua' adór slafíngw alhhe'eesay wásl kur koonda', kuungaádá' Garmoó Mungú ugwa haratlintie'. 14Adoorihe a haraxu'utír koomaán dirose gídaabá bar ugwa firiimaán ar adór inós i slai, ti axaas. 15Atén bara xuaán gídaabá ti axamiis, daqaní umuúqo gár kuwa firiimana, a xuaán gídaabá aga slawaán. 16Hee bar hhiyaawós gwa ár, i tlakweemaá tlehhiit, ala a tlakweemaá gwa'arár kooma'aaká, ngu aleefirin, nee Mungú gu slafíngw i haniis. Ala firoorí a har dír mukdá' tlakweemaá gwa'ara nga tleehhi'iiká. Tlakweemaá gwa'arár koomá' i dayá'. Aníng a kaahaaká ngu aleefirin as tlakweemaaká'. 17Umuúqo gár ganaa'aaká a tlakweema, ala tlakweemaá gwa'arár kooma'aaká i dayá'. 18Atén a xuaán gídaabá heé taa laqwaál nee Mungú i tlakweemaá tlehhiitiiká, ala inós ku harmagagaahh nee Garmoó Mungú, tam Neetlaangw gu kwatiitiiká. 19A xuaán gídaabá atén a múk Mungú, ala yaamu sleémeero kudá' tlaákw gin baliit. 20Garmoó Mungú adór nira hardáh, atén a xuaán, nee inós fuquraangw ngwa haniís oo inósuuduú Mungú ló' kuwa xuaan. Nee atén a baraá inósuuduú ló' i diriiaán, as tawa baraá Garmaawós Yesu Kristo. Kwí an Mungú ló' nee slafíngw alhhe'eesay wásl. 21Laqwalór ninakw, munguaá lamto ti harmagahhe'.

will be added

X\