1 YOHANA 4

1Sla'aaruúse, umuú gár ta kaahi ma haratlintatiaara', tlaampa'aasaak ala alé, áx amór i dahh a amór Mungúhe. Asma múk yaariír naa ti'iimiít baraá yaamuuwo oo káh, “Atén a aaruuse,” ala a loeeká. 2Qeeruú Mungú adór kur tsahha' a adoorí, “Umuúqo heé káh, Yesu Kristo nina hardáh ar iwa slaqwa tleehhiít, tí amór i dahh a amór Mungú.” 3Umuúqo gár ta kaahi ar Yesu kuwa siasi'i i amór Mungú dahhaká. Kangwsíng an oo kudá' Kristo ngwa si'iye', kangwdá' taa axasé' tawa kaahi, “Ni hardah, nee hamí naa qaroó baraá yaamí hardáh.” 4Laqwalór ninakw, kuungá' awa Mungú, nee kuungá' mukdá' káh atén a aaruuse, ala a lama, kuungá' mukdá' ugwa ar ba/é', asma Mungú i baraahúng i dirii', nee inós ku úr ta Wakusmoó Kristo oo baraá yaamí diriia. 5Kuká' awa baraá yaamu, muruú ta axweesi oo baraá yaamu, nee yaamu tooín ngi axamiisiyá'. 6Atén awa Mungú, umuúqo heé Mungú gu xuú', axweesantarén ga axamiis, múk Munguheeká axweesantarén ga axamiisiiká. Adoorihe a tsaahhaán tidár ló' nee tidá' tlakw. 7Sla'aaruúse, ti sla'asla'aané'. Asma sla'aari amór i dahh a amór Mungú. Kudá' sla'aarír koóm, a kudá' taa laqwaál nee Mungú, nee inós Mungú gwa tsaáhh. 8Heé sla'aarír koomaaká, Mungú gwa tsaahhiiká, asma Mungú a sla'aari. 9Adoorihe sla'aarír Mungú kinga amoorén i geehhooutís, gídaabá, Mungú Garmaawós oo kilós ngwa ya/aáw baraá yaamuú i ale, asma inós kuwa slafíngw ar slawaan. 10Sla'aari an tí, gídaabá Mungú atén tina slaá', a gídaabaheeká atén inós una sla'aán. Garmaawós nguna ya/aáw asma atén nee Mungú tiwa haraki/isi, nee wayda nguwa tleehhi as tlakweemaarén. 11Sla'aaruúse, bar Mungú atén taa slaá' adoorír ale, atén gár tiwa hariím masók tin sla'asla'aán sleeme. 12Heé Mungú gwa baloó ar i kaahh. Atén birti sla'asla'aán, Mungú i baraarén wa hoot, sla'aarirós iri ganá' baraarene. 13Adoorihe kari xuaán gídaabá atén a baraawós wa hootaán, asma atén inós taa qáy Qeeruuwose. 14Atén aga araán kay lamabu'uumaán gídaabá, Baabá Garma nguna ya/aáw tawa Ba/amusmoó yaamu. 15Hee bira ya/án gídaabá Yesu Kristo a Garmoó Mungú, Mungú i baraawós i dirii'. Nee inós i baraá Mungú. 16Atén adór Mungú tira slaá', aga tsaahhaán, nee sla'aarirós kari haratlintiaán. Mungú a sla'aari. Kudá' baraá sla'aarír wa hoót, in baraá Mungú, nee Mungú i baraawós. 17Adoorihe sla'aari kana gan'aás baraarene, as kahhoó' bál Deelór Sakwasleemaaro a da'ayumiitanaaká. Asma adoodá' inós i dirii'i, an adór atén ti diriiaan baraá yaamuukae. 18Baraá sla'aariro dae i káhh. Ala sla'aarír ganaa' dae gan hingés. Asma dae i sakwasleemár koón. Heé daér koóm, baraá sla'aariro aa ganaiiká. 19Atén Mungú un sla'aán, asma inós atén tina slaá' geerí ale. 20Hee bir kaahi, “Mungú án u slaá',” ala hhiyaawós gu slaiiká, inós a lamusmo. Asma hee bar hhiyaawós kudá' i ga/ay gwa harslaaqaát sla'atiro, Mungú oo aa ariiká gu aslayká sla'atiro. 21Inós tina adoorír hara'ayín gídaabá, “Heé Mungú gu slaá', gár kuwa hariím a hhiyaawós gun slaa' sleeme.”

will be added

X\