1 YOHANA 2

1Laqwalor'eé' ar ninakw, tí ngin kuungá' i gooiím as kahhoó' tlakweema mi tleehhara'. Ala hee bar tlakweema gaa tleéhh, heé ti aleefiriiriím dír Baabahe u koomaán, an Yesu Kristo, kudá' gan'amkuú koóm. 2Inós an kudá' taa haniís as atén tiwa haraki/isi nee Mungú as tlakweemaarén, ala as tlakweemaarén kilooineeká, ala nee tlakweemaá muu sleémeero. 3Hara'ayaarós bara oohaán, daqaní aga tsaahhaán gídaabá ugwa xuaán. 4Heé káh “Aníng inós ugwa xuú',” ala hara'ayaarós ga ohinaká, inós a lamusmo, tam looeema i kahhiyá' baraawose. 5Ala heé axweesantá Mungú gaa oh, baraawose sla'aarír Mungú aa tleehharút ló'wa ale, adór atén tar hootaan dinkwa nee Mungú, kay tsaahhaán. 6Heé káh, inós nee Mungú a dinkwa, gár kuwa hariím, a adoodár Kristo inós sleeme gan ar hoot. 7Sla'aaruuser'eé', hara'ayár ni kuungá' i gooiim ar /abeneeká, ala a hara'ayaadá' ta xua' qaroó alé iimír iimu/uungo. Hara'ayaadá' ta qaroó xua' a axweesantadá' taa axasé'. 8Ala inós ka /aben sleeme, axweesantadár ló' baraawose nee baraahunge, tidá' kah, giwti i waaráhh, nee gwa/ateemaadá' awa ló' naa qaroó gwa/aatiyé'. 9Heé káh, aníng a baraá gwa/ateema, ala inós hhiyaawós gwa aáhh, inós i baraá giwti tam hamí. 10Heé hhiyaawós gu slaá', i baraá gwa/ateema. Baraawose gár gu hariaw i káhh. 11Ala heé hhiyaawós gwa aahh, i baraá giwti, slám i baraá giwtír wa hi'imiit, ala amór i kay ga xuiiká. Asma giwti ilaawós gaa taampuúr. 12Tí ngin kuungá' i gooiím, kuungá' laqwalór ninakw, asma tlakweemaahúng kaa gurtláy as Yesu. 13Tí ngin kuungá' i gooiím, kuungá' ín baabá, asma kudá' daadáw iimír iimu/uungo ugwa xué'. Tí ngin kuungá' i gooiím, masoómba, asma kudá' tlaákw ugwa ar ba/é'. 14Tí ngina kuungá' i gooiím, láqwalo, asma Baabá ugwa xué'. Tí ngina kuungá' i gooiím, kuungá' ín baabá, asma kudá' daadáw iimír iimu/uungo ugwa xué'. Tí ngina kuungá' i gooiím, masoómba, asma a /uuruú koondá', nee axweesantá Mungú i baraahúng wa hót, nee kuungá' kudá' tlaákw ugwa ar ba/é'. 15Yaamu mi sla'aara', tam muruú baraá yaamuú i dirií'. Hee bar yaamu gaa slaá', sla'aarír Baabá baraawose i káhh. 16Asma umuúqo gár baraá yaamuuwo, gídaabá, ilatleerír slaqwa, nar ila', nee muruú urén oo muu gwa daara/ángw ar ay baraá slafingw'ine, muruuwí i amór Mungú dahhiiká, ala a muruú baraá yaamuuká'. 17Ala yaamu i waarahhiyá' dinkwa nee ilatleerir'ín, ala heé adoodá' Mungú i slai ga tlehhiít i kumamiit ay kureér. 18Láqwalo, gaarí a qoomár alhhe'eesaay, adoodá' kara axasé' gídaabá, wakusmoó Kristo ni hardah. Tam hamí wakuusér Kristo ar yaariir aa qaroó deerút. Ala adoorihe gaarí a qoomár alhhe'eesaay. 19Mukwí ina diirén wa tláy, ala asma inooín awa bartareneká. Inooín geera bar awa bartarén, geera taa al hoót nee atén. Ala tana tláy as kiwa tsaahha hhe'eesaan adór tar awa bartareneká. 20Ala kuungá' tunda Qeeruú hhoohhoó' i haniís nee kudá' Hhoohhoó', gawaá adoorihe mura' sleémeero u xuá'. 21Tí ngina kuungá' i gooiím, as gídaabaheeká kuungá' looeema i xua'aaká, ala a as gídaabá looeema i xuá', sleeme a xuá' gídaabá, baraá looeemaawo lama tam ar niiná i káhh. 22Heé lamusmoó kilá' an kwí káh, Yesu a Kristowooká. Kwí an Wakusmoó Kristo, kudá' Baabá nee Garmaawo gi sa tlaank. 23Heé Garma gwa tlaank, tam Baabá gwa tlaánk sleeme, oo Garma gwa ya/an, tam Baabá gwa ya/án sleeme. 24Tidá' kuungá' taa qaroó axasé' iimír iimu/uungo masók i baraahúng wa iwiiwít. Tidá' taa qaroó axasé', bir baraahúng wa iwiiwít, kuungá' daqaní sleeme a baraá Garmá wa iwiiwitá' nee baraá Baabá. 25Al'axweesantá inós naa diirén i oó' aa tí, slafíngw alhhe'eesay wásl kuwa slawaan. 26Kaangwí nguna dirhúng i gooiím daanduú mukdá' kuungá' nu qwaareemisa. 27Kuungá' tunda Qeeruú hhoohhoó' i haniís. Nee Qeeruuwí hhoohhoó' tinda kuungá' i haniís, inós bir baraahúng i dirii', daqaní hee kuungá' gár nus intsaahhatimisi i káhh. Asma Qeeruudá' tinda kuungá' i haniís, inós mura' sleémeero ngu kuungá' i intsaahhatimis. Nee gár ni kuungá' i intsaahhatimisi a looeema, a lamtooká. Tidá' kuungá' nuwa intsaahhatimisi oohaak, ta baraawós wa hotá'. 28Kuungá' laqwalór ninakw, baraawós wa hootaak, as qoomár Kristo birna hardáh, burkwa geehhooeés, atén mitiwa mureekeés dír geeraawós wa ale, ala ku ilaoohaán ar qwala/. 29Kuungá' a xuá' adór inós tar kudá' gan'amkuú koóm. Gawaá adoorihe xuaak sleeme gídaabá, umuúqo heé gan'amkuú tlehhiít, kwaa laqwaál nee inós.

will be added

X\