1 KORINTO 8

1Daxta iidíguú ni oo' a iidíguú fu'unaydá' taa hanmamisi dír munguaá hatlá'. Atén aga qaroó xuaán gídaabá atén sleémeero xu'uti a koomaán daanduú kaangwihe. Ala xu'uti gár ni huwaahup dír heewo a daara/aangw. Ala sla'aari gár ni huwaahup dír heewo a kwa/asa. 2Hee bir kaahi, “Aníng gaarí a xuú',” inós gadaádá' gaa baloó xuiiká ar adoodá' kus hariím xu'utiro. 3Ala heé Mungú gu slaá' inós ku xuu' nee Mungú. 4Ala gawaá iidíguú daanduú /aymár fu'unaydá' taa hanmisi dír murslaaqataá munguaá hatlá', gár ni oo' a tí, atén a xuaán gídaabá munguaá hatlá' i kahhiyá', ala Mungú dáw a wak kilós. 5Murslaaqataá yaariir i dayá' awa ta babay a mungi'i, gawaá dooriwo nee tam baraaká' yaamuuwo. Gawaá adoorihe a gár ya/aam ooaro gídaabá, mungi'i ki yaariir, nee aleesleemuuse ka yaariir. 6Ala tam adoorihe diirene Mungú a wak kilós, inós an Baabá. Mura' sleémeero ina tleehharuút ar inós. Nee atén an dawaán as inós. Nee slám Aako a wak kilós, inós an Yesu Kristo. Mura' sleémeero ina tleehharuút ar loohír inós, nee atén an dawaán ar loohír inós. 7Ala a muu sleémeerowooká oo xu'utirí ga koóm. Bahh'alé baraá slafingw'ine kaa ló'wa intsatsaáhh murslaaqat kuwa ilaiwawa/i adór munguaá slafá' wa alé. Gawaá adoorihe fu'unaá taa ilahhooár wa hanmiís dír munguaá hatlá', birnga /ayiyé', kin slahhe'eemiis baraá muner'ine, as adoodá' haratlintaaor'ín kawa niiná. 8Ala muruú /ayma atén ti hardahaasiiká amór Mungú i alé. Fu'unaay bira mawaán /aymaaro, gár atene /aaruw i káhh. Nee bira /ayaán, gár atene doogiim i káhh sleeme. 9Ala amohhooarí ta koonda' ga/aawaak gídaabá miwa dukuutsmo tleehhít dír mukdá' haratlintaao niinawe. 10Gawaá slaqsaywo, kuúnguusíng xu'utír koóm, burta ár tawa /ayiin baraá doó munguaá hatlá' wa alé, heé haratlintaaór niina ga koóm, inós fu'unaydá' taa ilahhooár wa haniís gi /aymár áyke sleeme? 11Gawaá adoorihe heedaáduú haratlintaao niiná kwaa qwaareés as xu'utirók. Laatí inós a hhiya', kudá' Yesu aa sa gwaá'. 12Ala hhaeehúng barnaxes ina sadakumisé' ar adoorí, nee haratlintaaor'ín tidá' niina kari slahhe'eemisé', heé ta sadakusé' a Kristo. 13Gawaá adoorihe, muruú /ayma barnaxes hhiyaaeé' gu dukuutsmoó i qamín, aníng fu'unaay i baloó /ayaaká ay alhhe'eesay wasle, as aníng mawa dukuutsmo tleehhiít dír hhiyaaeene.

will be added

X\