1 KORINTO 7

1Ala gawaá iidíguudá' kuungá' naa gooiindi'i, a gár hhoo' gídaabá hhawaata /ameeni mingiwa kwatiít. 2Ala as adoodá' fuqi iwa tláhh, umuúqo hhawaatuuwo masók in hareerós kón, nee umuúqo /ameeniro masók in hhawaatuuwós koón. 3Hhawaata hareerós ngi hariímarós i haniisi, nee hare sleeme hhawaatuuwós ngu hariímarós i hanis. 4Hare slaqwtós ga balká, ala heé slaqwtós ga baál a hhawaata. Nee slám hhawaata slaqwtós ga baaliiká, ala heé ga baál a hare. 5Kuungá' miti /ita/itaara'. Ala aqo tin axweesani axamisá' gídaabá tiwa /ita/ita' ar har qooma, as pa/ángw tawa saaliinda' kuwa sleera'. Aluuwo ti malé inki/e', as Neetlaangw pa/aangw munguwa sláy oo nuwa iiara'ari asma kuungá' ana aleesleeri'iiká tiwa /ita/ita'. 6Gaarí naa oó' a hara'ayaarooká, ala a ya/aám ngina haniís. 7Asma aníng geera gár ni slaa' masók umuúqo heewo geera a adór aníng. Ala umuúqo heewo aleesleemuuwós oo Qeeru gu kón, kudá' taa haniís nee Mungú. Kwí a adoorí nee kuqá' a adorqá'. 8Ala án gár ni kah dír mukdá' aa duuxuuxunkahe, nee dír kwaeeliwo, a tí gídaabá, a tsiní dir'ine bir kumiitiyá' tawa hooti kilooín ale, adoodár aníng nir kilooeé' hoot. 9Ala barnaxes ila/aro ti aleeslay'aaká, a tsiní i duuxuuxune', laqaá kiwa duxuuti. Asma a tsiní hee iwa duuxun laqaá /ameeni kawa duuxi, ta asltá ilatleeri ngiwa al ohiinda. 10Ala mukdá' aa qaroó duuxuuxun, nee /ameenadá' taa qaroó duxuút, aníng inooín in hara'ayiyiím. Ala a aningeeká, ala a Aako gin hara'ayiyín gídaabá. /Ameeni hhawaatuuwós munguwa geexeér. 11Ala bar ngwa geexeér, i adoodá' wa hot, makawa duúx, laqaá nee hhawaatuuwós ti axweesani axaasiye'. Nee slám hhawaata hareerós mingiwa geexáy. 12Ala mukduú hatlá' heé gu ádbáw a aníng, a Aakoowooká, ar gídaabá, “Hhiyoó wák barnaxes hare ga kón ar aa haratlinti'iiká, nee hareedá' bar inós aa ya/aán tawa al hooti nee inós, hareerós mingiwa guús. 13Nee hare barnaxes hhawaatuú aa haratlinti'iiká gu koón, nee hhawaatuuwí bira ya/án tawa al hooti nee inós, hhawaatuuwós munguwa geexeér. 14Asma hhawaatuudá' aa haratlinti'iiká, inós ku hhoohhooees ar hareerós. Nee hareedá' aa haratlinti'iká, inós ka hhoohhooees ar baraá hhawaatuuwós. Asma geera bar adooriheeká, na/'iihúng geera ki hhohhoeká. Ala hám ki hhohho'. 15Ala hhawaatuudá' aa haratlintii'iiká barnaxes hareerós ga talaákár i haniisár wa slaa', ngi haniisi. Laqaá hareedá' aa haratlinti'iká barnaxes hhawaatuuwós gu geexeemuú wa slá', ngu geexeer. Asma hhawaatuudá' aa haratlintii', laqaá hareedá' aa haratlinti', inooín kaa tseegiiká nee hara'aya baraá muruuwihe. Mungú atén tina ateét as tawa hootaan ar wayda. 16Asma kiíng háre, adór kar xu' a adoomá gídaabá kiíng hhawaatuuwók u ba/amís? Laqaá kuúng hhawaáta, kuúng adór kar xu' a adoomá gídaabá kuúng hareerók a ba/amís?” 17Ala umuúqo heewo gár kuwa hariím masók i kumiit hotaango ar adoodár aleesleemuú Qeeru, kudá' Aako aa dirós i haniís, nee adoodá' inós i dirii'i qoomár kuwa ateét nee Mungú. Gaarí an gár ni hara'ayiyiim dír Kríshaanáy oo umuúqo diiro. 18Heé taa ateét nee Mungú barnaxes kwaa al/uútl, al/utloorós mingiwa luú/. Nee heé taa al/utliiká burkwa ateét nee Mungú, inós mukuwa al/uútl. 19Hee burkwa al/uútl, laqaá burkwa al/utliiká, a gaarooká. Ala gár gídaabár koom a hara'ayár Mungú kawa iialooeemisi. 20Umuúqo heewo i hooti ar adoodá' geeraawo i dirii'i qoomár kuwa ateét. 21Kuúng tuwa ateét a lawaalmoówo? Ma gurhaamutaar as tawa lawaalmo. Ala pa/aangw bir deer oo kuúng tuwa gweeri baraá lawaali'iimaro, pa/angwsíng ar gadiyuuseek. 22Asma heedaádá' taa ateét baraá Aakoowo qoomár inós tawa lawaalmo, inós a heé Aako aa gweér. Ala heedaáduú lawaalmoowooká kuwa ateét, heé adoorí an lawaalmoó Kristo. 23Kuungá' tunduna tlaáxw ar tlaxór ur. Ma lawaalér muu tleehhitaara'. 24Hhaee'eé', umuúqo heewo masók in hoot dír geerá Munguhe ar adoodá' inós i dirii' qoomár kuwa ateét. 25Ala gawaá iidíguú daanduú /amatliteero aníng hara'ayár Aako ar ni koom i káhh. Ala gaarí ni oo' a adór aníng ni ga/aw. Asma aníng a heé taa gurtleemuú i haniís nee Aako, tawa heé muruú ló' káh. 26Gídaabár'eé' a tí, as slahha'amuuwí dáw qoomár de'emuukae a tsiní hee duuxo binga máy. 27Kuúng barnaxes hare duuxooro aga hhe'és, loohi ma leelehhiitaar ar hareerók kawa gus. Nee barnaxes hare aga duxká, kuúng hare ma leelehhiitaar ar kawa dux. 28Ala bar aga duuxuún sleeme, a gídaabaheeká tlakweema ina tléhh. Nee dasi bar kana duúx, a gídaabaheeká tlakweema gina tléhh. Ala múk adór kwí slahha'amaaye ga sláy baraá slafingw'ine, nee aníng gár ni slaa' a kuungá' slahha'amaayeerí masók a sleera'aaká. 29Ala hhaee'eé', aníng adoorí ngin káh gídaabá, qooma daxta aa niinawuúr. Ala iimír hamí mukdá' aa duuxuxun masók a adór múk aa duuxuxunká. 30Nee mukdá' /aa/amiím masók a adór múk /aa/amiimaaká. Nee mukdá' qwalalaá/ masók a adór múk qwalala/aaká. Mukdá' muruú tlaxuúm masók a adór múk gár koomaaká. 31Nee mukdá' yaamuuká' gi ar gadiyuús masók a adór múk yaamuuká' gi ar gadiyuusaaká. Asma yaamuuká' adoorí hám i dirii'iya', i qwaariyá'. 32Ala gár án ni slaa' a masók kuungá' an daawimita'aaká. Heedaádá' aa duuxunká inós i daawiimiit as Aako, gídaabá adór ngur qwal/atisi. 33Ala heedaádá' aa duuxun in daawiimiit as muruú baraaká' yaamu, gídaabá adór hareerós ngir qwal/atisi, 34inslawaywós tari badu tsár. Nee /ameenidá' taa duuxiiká, nee /amatlito'o, inooín sleeme in daawimitiyá' as Aako, as tawa múk hhohhó' baraá slaqoowo nee baraá muneero. Ala /ameenidá' taa duúx, inós in daawimít as daanduú muruú baraaká' yaamu, gídaabá adór hhawaatuuwós ngur qwal/atis. 35Aníng adoorí an káh as kuungá' nuwa alee/iis. Aníng a sla'aaká kuungá' nuwa harakeemiis. Ala gár ni slaa' masók kuungá' a tidá' ganaa' an tlehhá', nee tidá' hhohho', nee ar gídaabá masók tina hanisé' dír Aakoowo baraá slafingwhunge, nee muruú hatlá' munduwa uuruxún. 36Ala daqtakaaro laqaá hee i da'ayuut gídaabá, dasir'eé' tidá' taa duuxiiká bar aga haniisiiká dír heé i alé, aga sadakuús. Barnaxes dasiidá' qoomár duuxo gaa eér, nee a gár hariím inós kawa duuxi, baabuúdá' ngi tleehhi adór inós i slai. Ala a gídaabaheeká inós ina dakuús barnaxes ya/aám gaa haniís tiwa duxuutiya'. 37Ala baabuúdá' barnaxes gaa slaá' baraá muunaáwose gídaabá dasir'eé' tí a haniisaaká, inós bir xurumiitiiká baraá muunaáwose, nee barnaxes gaa tleehhiiká ar kuwa harakeemiís, ala inósuú kilá' adoodá' inós aa slaá' gana tsaát baraá muunaáwose, inós adór hhoo' gaa tleéhh. 38Gawaá adoorihe heé dasiirós ga haniís, adór hhoo' gaa tleéhh. Nee kuda' dasiirós ga haniisaaká, inós adór hhoo' gaa ak tleéhh. 39/Ameenír taa duúx, hhawaatuuwós bir slaaf, /ameenidá' makawa duúx. Ala bar hhawaatuuwós aa gwaá', i ya/aán inós kawa duuxi nee heé inós i sla'. Ala adoorí ka tleehhi ar baraá Aako. 40Ala a gár ak hhoo' dirose bar duuxo ngaa meér. Gaarí aníng an káh, ala tam aníng sleeme án ngi slaá' Qeeruú Mungú u koóm.

will be added

X\