1 KORINTO 6

1Baraá tla/angwhunge heé wák barnaxes i kwasleemár kón nee heé hatlá', adór ir qiitli kwasleemadá' ngiwa huwi dír geerá sakwasleemuuseedár baraá múk Kríshaanayheeká. Gár geeraawo hariím a gan huuw dír geerá múk hhohhó' oo Mungú. 2Kuungá' a xua'akáhe gídaabá muu sleémeero ku sakwasleemuut nee múk Mungú. Ala kuungá' barnaxes muu sleémeero u sakwasleemutá', a hariindá'aáke kwasleemár ninakw ar adór tisíng kawa tlaqa'? 3Nee slám kuungá' a xua'akáhe gídaabá atén malayke a sakwasleemuutaán? Ala malayke bar sakwasleemuutaán, muruú slafiingwí u sakwasleemuutaánaáke ak alé. 4Kuungá' bar kwasleemár koondá' ar muruú baraá slafiingwí, ala kuungá' adór kwasleemadá' kar huba' dír geerá mukdá' taa ilaiwawa/iiká nee Kríshaanáy. 5Gaarí a gár murér koom dirhunge. Heé sagalooár koóm baraá tla/angwhunge iqo káhhi, oo kwasleemár hee nee kuqá' tsatto ga aleesláw? 6Ala laatí, dirhunge hee heewós gun sakwasleemár áy amór sakwasleemuuseedár haratlintaaór koomaaká. 7Ala kuungá' bar ti kiloohúng sakwasleemutá' dír geerá sakwasleemuusér wa alé, gaarí gár i laqaaqaan a gídaabá kuungá' slafiingw ugwa harslaaqaté'. Ahaá, a tsiníheéke bar aga ya/aán tam tu sadakuusi? Ahaá, a tsiníheéke bar aga qítl tam taa gaa hayohi? 8Ala laatí kuungá' kilá' a malguuse, nee muruú muu un hayohiindá', tam muruú hhaeehúng. 9Ahaá kuungá' a xua'akáhe gídaabá malguuse waawuti'iimár Mungú ga baloó alká? Kuungá' miti kiloohúng al/agiimara'. Múk tsaatuuse waawuti'iimár Mungú ga aaliiká, laqaá tam múk munga'aá hatlá' haratlintaatií', nee tam fuquuse, laqaá hhawaateedá' nee hhawaataá hatlá' fuquusá', laqaá /ameenadá' nee /ameenár hatlá' fuquus, 10nee tam fiisuuse, laqaá ilatleeruusér peésa, laqaá ooniituuse, laqaá /ayseenuuse nee laqaá múk aa dee/aanuut. 11Baraá tla/angwhunge bahh'alé aáng a múk adór kwí. Ala kuungá' tunda hamaátl, tunda hhoohhooeés, tunda gan'amuú i harafaár ar /uuruú Aakoorén Yesu Kristo nee ar /uuruú Qeeruú Mungúrén. 12Kuungá' a kata', “Aníng ya/aám a koóm ar mura' sleémeero nguwa tleehh.” Adoosíng ar ló', ala a mura' sleémeerowooká oo hariím. Aníng ya/aám a koóm ar mura' sleémeero nguwa tleehh, ala a gídaabaheeká ay dír gaa aníng i bal. 13Kuungá' a kata', “Muruú /ayma oo gura', nee gura' oo muruú /ayma.” Adoosíng ar ló', ala Mungú looarka wake muruuwí tsaraawo sleémeero gu qwaarees. Ala slaqwa kaa tleehhiiká as fuqi, ala slaqwa a ar Aako, nee inós an aakoó slaqwa sleeme. 14Mungú Aako guna waaslee/atís baraá múk aa qaátl wa alé, nee Mungúwí atén sleeme ti waaslee/atis ar /uuruuwós looarka wake. 15Kuungá' a xua'akáhe gídaabá slaqoohúng a diqoó Kristo? Ala aníng diqoó Kristo unqo taatáhha nguri diqoó tsaatuso'o tleéhh? Aasla'áy, adoorí i ya/aandaaká. 16Laqaá a xua'akáhe gídaabá heedaádá' ti haragaás nee tsaatuso'o, heedaádá' a slaqwtá wák nee inós. Asma Gooi i kat gídaabá, “Kuká' tsár tari adór slaqwtá wák.” 17Ala heedaádá' ti haragaás dír Aako, heedaádá' qeeruuwós nee Aako aa wák tleehhiít. 18Gawaá adoorihe kuungá' fuqi ilaguwaak. Umuúqo tlakweemaá hee i tleehhi, gaa slaqwtós sa tlehhiitiiká. Ala heé fuquús, inós slaqwtós gan tlakweemaá i tlehhiit. 19Kuungá' a xua'akáhe gídaabá slaqoohúng a Doó Qeeruú hhoohhoó', kudá' baraahúng wa hoót? Inós an kudá' tinda haniís nee Mungú. Kuungá' ti kiloohúng bal'aaká. Ala kuungá' awa Mungú. 20Asma inós kuungá' nuna tlaáxw ar tlaxór ur. Gawaá adoorihe, kuungá' Mungú xirfayeemisaak ar slaqoohúng.

will be added

X\