1 KORINTO 5

1Án iidíguuko ugwa axaás gídaabá heeko i deer baraá tla/angwhunge oo fuquús nee harér baabuúwós. Fuqtár adór tí kaa dii wa axaasiiká tam baraá múk xoorduuwo. 2Ala bar adoorí, kuungá' gár ta daara/aanda' a milá? A tsiní alók geeraawo barnaxes ana gurhaamuté'. Heé tlehhemuú oo adór kwí gu tlehhiít gár kuwa hariím a kun paraatl dír múk Kríshaanayhe. 3Aníng hamí ti saáw dirhunge, ala tam adoorihe a dinkwár i dirií' nee kuungá' baraá qeeruuwo. Án geera bar dinkwár i dirií' nee kuungá', aníng heesíng adoosíng gaa tleehh geera ugwa qaroó sakwasleemuút. Ala tam hamí aníng ugwa qaroó sakwasleemuút. 4Kuungá' burumburiité' dinkwa nee qeeruueé', nee /uuruú Aakoorén Yesu i dinkwa nee atén. 5Daqaní heesíng ku hanisá' amór Neetlángw i alé ar umuú Aako Yesu, as slaqwtós kawa qwaareesi, as qeeruuwós daqaní iwa ba/an Baalaadár Aakoorén Yesu binda hardát. 6Daara/angwhúng kwisíng i harinká. Kuungá' a xuá'aáke gídaabá, “Gadaádá' mikaáte kar sluufitimaamisi tam ka niiná, xwanteedár mikaáte sleémeero aqo gan sluuftís.” 7Kuungá' gadaádár aáng ar mikaáte kar sluuftimaamisi, tidár tlakweema, hingeesaak dirhunge, as daqaní kuungá' a hhohhooeerá'. Daqaní kuungá' a xwantér /aben ar mikaáte tleehhitá', tidá' taa sluufitisiká. Nee adoorí an adoodá' kuungá' hám tay dir'a', asma deelmoorén oo Pasaáka gaasaro kwaa qaroó hhe'eés. Nee inós an Kristo. 8Gawaá adoorihe atén deelór ur masók an tleehhaán. Ala mawa tleehhaán ar mikaáteedár aáng taa sluuftimiís, tidár tlakweema nee slisla/aruwo. Ala masók deelór ur an tleehhaán ar mikaáteedár /aben ar taa sluuftisiiká, tidár hhoohhooaari nee looeema. 9Baraá barwár'eene ngina dirhúng i gooiím gídaabá kuungá' ma al dinku'uumisaara' nee fuquuse. 10Gár naa gooiím a gídaabaheeká ma dinku'uumisaara' nee múk baraá yaamu, kuduú fuquuse nee kudá' peésár ilatleeruusá', nee malguuse, laqaá mukdá' munga'aá hatlá' haratlintaatií'. Asma geera bar adoorí ngaa oó', gídaabá ma dinku'uumisaara' nee kuká', geera alók kuungá' gár tunduwa hariím a baraaká' yaamu in geexeerá'. 11Ala aníng gár naa gooiím a tí gídaabá, ma dinku'uumisaara' nee heé ta babay hhiya', ala laatí inós a fuqusmo, laqaá ilatleerusmoó peésa, laqaá heé munga'aá hatlá' haratlintaatií', nee laqaá heé múk /ooslisliím, laqaá oonitusmo, laqaá malgusmo. Ala heé adoorí mu ya/aamara' tam tawa al/ayiinda' nee inós. 12Asma mukdá' kaáhh baraá múk Kríshaanayhe aníng gár ngus sakwasleemuut a milá? Kuungá' sleeme múk ta sakwasleemuta' a kudá' baraá múk Kríshaanáyheéke? 13Ala mukdá' baraá múk Kríshaanayhe kaáhh, heé gu sakwasleemuút a Mungú. Asma Gooi i kat, “Heé tlaákw hingeesaak baraá tla/angwhunge.”

will be added

X\