1 KORINTO 2

1Hhaee'eé', aníng qoomár niwa hardáh amorhúng i alé, nina hardáh as iidíguú Mungú oo taa luú/ nguwa alki/ituú aw. Ala ngwa alki/ituú awiiká as aníng tawa heé axweesanoó baál, laqaá sagalooár muu ngiwa ar axwees. 2Asma qoomár án niwa amorhúng i dirii', gár naa slaá' baraá muunuúeene a gídaabá aníng masók gár hatlá' mawa xuú', ala a iidíguú Yesu Kristo kilós, ak alé iidíguú gwa'araarós ar gawaá msalaába. 3Gawaá adoorihe aníng niwa hardáh, /uuruueé' ugwa i tlinti'iiká, ala ana daaraáx daeero. 4Aníng axweesantá Mungú ngiwa amorhúng i alki/iít, aníng kuungá' naa afa /asliimiiká ar axweesantá sagalooár muu. Ala ngina alki/iít ar /uuruú Qeeruú Mungú. 5Asma haratlintaaorhúng masók daqaní i gawaá sagalooár mukooká, ala masók i gawaá /uuruú Mungú. 6Ala sagalooa i deer ar atén ta axweesaan dír múk aa kwa/i baraá slafíngw qeeruuwo. Ala sagalooarí atén ta axweesaan ti slasleeraaká nee sagalooár yaamuuká'. Slám ti slasleeraaká nee sagalooár mukdá' aleesleemuú koóm baraaká' yaamuuwo. Asma inooín kaa qaroó sakwasleemuút gídaabá i qwaariyá'. 7Ala sagalooarí aníng ni axwees a sagalooár Mungú, tidá' taa luú/ dír muko. Sagalooarí an tidá' Mungú aa tsawaár iimír aáng wa alé, qoomár yaamu kiwa tleehhiiká, as atén tiwa xirfuú i haniisi ar loohír sagalooarí. 8Múk aleesleemuú koóm oo baraaká' yaamu sagalooarí gaa tsaahhiiká. Asma inooín geera bar sagalooarí ngaa xuiyé', geera alók Aakoó xiríf ngwa kikii'ii'iiká gawaá msalaábár i alé. 9Sagalooarí an tidá' Gooi i kat gídaabá, “Gadá' taa baloó ariiká nee iltá hee, nee ar taa baloó axaasiiká nee iiár hee, nee slám ar hee aa baloó xuiiká baraá muunáwose, gaarí an tidá' Mungú aa amohhe'eés as mukdá' inós gu slaá'.” 10Muruuwí an kudá' Mungú aa amoorén i geehhooutís ar loohír Qeeruuwós. Asma Qeeruú Mungú mura' sleémeero gu xuuxu'ún, tam muruudá' taa luú/ oo baraá muunuú Mungú i dirií'. 11Heé muruú baraá muunuú hee gu tsaáhh a heemá? A qeeruú heedaádáeéke, kudá' baraawós wa hoót? Gawaá adoorihe muruú baraá muunuú Mungú i dirií', heé gu tsaáhh i kaahh, aqo har Qeeruú Mungú kilós. 12Ala atén Qeeruú taa slawaán a qeeruú yaamuukáeeká, ala a Qeeruudá' amór Mungú daáhh, as atén masók muruudá' kuwa tsaahhaan oo Mungú naa diirén i haniís ar qeemuuwós. 13Qoomár atén iidíguuwí bur axweesaán, u axweesanaaká ar axweesanoó sagalooár muu, ala un axweesaán ar axweesanaydá' Qeeru naa atén i intsaahhatimís. Asma atén muruudá' oo Qeeru un axweesaán ar axweesanoó Qeeru. 14Heé aa ba/aniká, muruuduú Qeeruú Mungú gu ilaoohiiká. Asma muruudá' dirose a adór daktu'uuma nee slám tsaahharo gu aleeslayká. Asma muruudá' gár kur tsatsahhan a Qeeruú Mungú. 15Ala heedaádá' Qeeruú Mungú gu koóm, inós mura' sleémeero tsaahharo gu aleesláy. Ala heé inós tsaahharo gu aleesláw i kaahh. 16Asma Gooi i kat, “Heé muunuú Aako gu tsaáhh a heemá? Nee slám heé inós gu intsaahhatís a heemá?” Ala atén baraarene muunuú Kristo u koomaán.

will be added

X\