1 KORINTO 16

1Daanduú iidíguuduú ohome as múk hhohhó' oo Mungú, kuungá' gár tunduwa hariím an tlehhá' adoodá' án na hara'ayiím dír múk Kríshaanáy oo yaamaá Galatia. 2Umuúqo deelór hungu/umaawo umuúqo heewo dirhunge gár kuwa hariím a ohomeedá' i haniisár wa slai a gan baats, ar adoodá' inós ngir slaslay. Adoorí na tlehhahhitaak, as qoomár aníng binda hardáh, masók a gídaabaheeká ohomeedá' an sangw iimu/uundá'. 3Muu tsawaaraak baraá tla/angwhúng wa alé, nee daqaní aníng binda hardáh, mukwí u ya/aáw dinkwa nee barwá ay Yerusalemu, as ohomerhúng tisíng kawa huuwi. 4Nee barnaxes aníng sleeme gár tiwa hariím a an daqáw, daqaní inooín nee aníng ti alkoomaán. 5Aníng bara waaraáhh ar baraá yaamaá Makedonia, aníng niqo hardáh amorhúng i alé. Asma aníng a slaá' niwa waaraahh ar tla/ángw yaamaá Makedonia. 6Ala án ngi slaá', aníng a ayaahúng wa hoót deelór niinawe, dooqa qoomaadár tsaaqwa sleémeerowo. Daqaní kuungá' aníng i alee/isá' niwa kumiit baraá aaieene, umuúqo didá' ni kawa. 7Asma aníng a sla'aaká nee kuungá' tiwa araan hamihe, qoomaarí niwa tawó waaraahh. Asma aníng a slaá' niwa hoot dirhúng wa alé deelór niinawe, Aako birnga slaá'. 8Ala aníng a hoót baraá yaamaá Efesór wa alé ay qoomár Pentekoste. 9Asma afkuú doó úr kunga aníng i gweér oo gadiyér ur ngiwa ló'wa tleehh, nee slám múk yaariír oo aníng i baqamiím i deer. 10Ala Timoteo barnaxes naa hardáh amorhúng i alé, amohhe'eemisaak as miwa hoót ar dae. Asma inós a heé gadiyér Aakoó tlehhiít adór aníng wa alé. 11Gawaá adoorihe hee munguwa waaqaá'. Alee/iisaak iwa kumiiti baraá aaiiwose ar wayda, as niwa hardahi amor'eé' ale. Asma aníng nee hhae inós un daamaaramaán. 12Ala iidíguú Apolowo, aníng inós una ló'wa harhheehhe'eés, as iwa amorhúng i hardahi dinkwa nee hhaeedá' hatlá'. Ala inós gaa slaiiká niwa daqay hamihe. Ala pa/aangw burngwa sláy, ni hardah amorhúng i alé. 13Kuungá' dalaaé', sihhitano hhe'eesé' baraá haratlintaaorhunge. Kuungá' masók a adór hhawaate, nee masók a múk /uuruú koóm. 14Muruuhúng sleémeero tlehhiitaak ar baraá sla'aari. 15Nee slám hháe, kuungá' iidíguú múk doó Stefana u xuá', gídaabá inooín taa giirín haratlintaaooro baraá yaamaá Akayaro. Nee slám inooín taa haniisiyé' múk hhohhó' oo Mungú nguwa sagadiyuusiya'. 16Múk adór kwí ilaiwawa/aak, nee umuúqo heewo oo gadiyér tleéhh nee oo ti daawiitimiís dinkwa nee inooín. 17Aníng a qwalalaá/ asma Stefana nee Fortunato nee Akaiko naa amoorí hardahiyé'. Asma gadaádá' aníng iga wa /aaruur as adoodá' kuungá' tawa kahha', inooín ngaa haniisiyé'. 18Asma hardahamuuín muunuúeé' ngwa gurkwa/asiyé', nee tam munerhúng sleeme. Múk adoorí gaár i xuaak. 19Múk Kríshaanáy oo baraá yaamaá Asiár i dirií' kuungá' nu intsihhiimiis. Kuungá' tundu ló'wa intsihhiimiis ar baraá Aako nee Akila nee Priska dinkwa nee Kríshaanáydá' ti dogaagiít baraá dooín i alé. 20Hhae sleémeero kuungá' nu intsihhiimisiyá'. Kuungá' ti intsihhiimise' ar ma'amisuudá' hhohhó', adoodá' múk hhohhó' oo Mungú i tlehhahhiti. 21Ánuú Paulo intsihhiisantí ar diirí ana gooiím ar dakw'eé' oo kilá'. 22Umuúqo heewo oo Aako gu sla'aaká, inós ku lu'usi. Maran ata, gídaabárós, aakoorén, hardaháng. 23Aakoorén Yesu kuungá' nu tsuuqi. 24Sla'aarir'eé' i dír kuungá' sleémeero baraá Kristo Yesuwo.

will be added

X\