1 KORINTO 12

1Hhaee'eé', gár án ni slaa', kuungá' iidíguú aleesleemuú ta hanmaamisi nee Qeeruú hhoohhoó' masók un xuá'. 2Kuungá'a xuá', qoomár kuungá' tawa múk Mungú xuaaká. Qoomaadae kuungá' ana ya/aandé' tunduwa huwahuwi nee mungi'iidá' afe waslen, kudá' murslaaqat, adoodá' kuungá' tundura geeraharahaár. 3Gawaá adoorihe án kuungá' nu xu'utís gídaabá, hee i kaahh oo axweés ar baraá Qeeruú hhoohhoó' oo káh gídaabá, “Yesu ku lu'usi.” Nee slám heé taa geerahariiká nee Qeeruú hhoohhoó', ooaro ga aleeslayká gídaabá, “Yesu a Aako.” 4Aleesleemuú dimbadimbé oo Qeeru i deer, ala Qeeru inós a wak. 5Nee slám gadiyér dimbadimbé i deer, ala Aako inós a wak. 6/Uureeraá dimbadimbé awa gadiyuusá' i dayá', ala Mungúdá' gadiyeédá' sleémeero ga tlehhahhiít, inós a wak kilós. 7Ala aleesleemuuduú Qeeruú hhoohhoó' gu geehhooeemiís, ku hanmiis dír umuúqo heewo ar adoodá' alee/isoó huwahuuw dír múk Kríshaanáy. 8Asma heé wák aleesleemuú axweesantá sagalooa gun sláy ar Qeeru, nee kuqá' aleesleemuú axweesantá xu'uti gun sláy ar Qeeruuduú kilá'. 9Nee oo hatlá' aleesleemuú haratlintaao gun sláy ar Qeeruuduú kilá', kuqá' aleesleemuú hungu/umis gun sláy ar Qeeruuwí wák. 10Nee oo hatlá' aleesleemu gun sláy oo tlehhma'aá waa/oo/amór koomá' ngiwa tlehhiiti. Kookoo aleesleemu gun sláy oo ya/abtór amór Mungú daahh ngiwa alki/iiti. Oo hatlá' aleesleemu gun sláy oo qeeruú dimbadimbé nguwa tsatsahhan. Nee kookoo aleesleemu gun sláy oo iwa axweesi ar tsifrír dimbadimbé ar xuawaslen, nee oo hatlá' aleesleemu gun sláy oo tsifridá' ngiwa ilaharmiisi. 11Heé muruuwí sleémeero gu tleéhh a Qeeruú Mungú kudá' wák kilós. Inós aleesleemu gun hanmiis dír umuúqo heewo ar adoodá' inós i slai. 12Slaqwtá hee a wak, ala i diqoó yaariír koón. Ala diqaywí tam ku yaarire, sleémeero burkwa haragaás an slaqwtá wák kilós. Adoorí an adoodá' Kristo sleeme i dirii'i. 13Asma atén bahh'alé a múk Yahudi, bahh'alé a múk Yunani, kookaari a lawaale, nee kookaari a lawaaleerooká. Ala atén sleémeero tina baatimiís ar Qeeruudá' wák as tawa slaqwtá wák tleehhitaan. Nee slám atén sleémeero tina wahaás ar Qeeruudá' wák. 14Slaqwtá hee a diqtá wakeeká, ala a diqoó yaariír. 15Yaae bira ó' gídaabá, “Aníng ar slaqwtooká asma aníng a dakooká,” xáy, yaae ar slaqwtookáhe as adoorí? 16Nee iia bira ó' gídaabá, “Aníng ar slaqwtooká asma aníng a iltooká,” xáy, iia ar slaqwtookáhe as adoorí? 17Ala slaqwa sleémeero geera barnaxes a ila kilós, geeraawo adór tar axamiisi a adoomá? Nee slám slaqwa sleémeero geera barnaxes an iia kilós, geeraawo adór tar tsaa'amin a adoomá? 18Ala Mungú umuúqo diqto gana gawaá slaqwtá i qaás ar adoodá' inós aa slaá'. 19Diqaay sleémeero geera barnaxes a diqtá wák kilós, geeraawo slaqwa i amá? 20Ala hám daxta diqaay ku yaariír, ala slaqwa inós a wak. 21I ya/aandaaká ila dawa nguwa beer gídaabá, “Án kuúng gár uwa yaahamiis i káhh.” Nee slám i ya/aandaaká saga ya'a' ngiwa bay gídaabá, “Án kuungá' gár nuwa yaahamiis i káhh.” 22A adoosingeeká, ala a adoorí gídaabá diqaydá' geera ta xui gídaabá ku ak daqeetlakwén, an kudá' gídaabár koóm ak alé. 23Nee diqayduú slaqwa, kudá' geeraawo ta gaár i xuanaaká, an kudá' ta ak ilaiwawa/aan. Nee diqaydá' ta murér wa ara'araan, an kudá' ta ak amohhe'eemisaan ar ilaiwa/ame. 24Ala diqaydá' ta murér wa ara'aranaaká, gár kus adoorír amohhe'eemisaan i káhh. Ala Mungú slaqwa gaa haragaás ar adoorí, “Diqito'oodá' aa /aaruur gaa ak ilaiwa/amér i haniís.” 25Asma tlaampa'aamis pa/aangw munguwa sláy baraá slaqwto, ala diqaay ti amohhe'eemaamisi umuúqo diqto nee diqto'ór hatlá'. 26Nee diqto'ór wák barnaxes aa slahhá', diqaay sleémeero aa slahhaá' dinkwa nee diqito'oodá'. Ala diqito'ór wák barnaxes kaa xirfayeés, diqaay sleémeero i qwalalaa/ dinkwa nee diqito'oodá'. 27Gawaá adoorihe kuungá' a slaqwtá Kristo, nee umuúqo heewo dirhunge a diqto'ór wák gawaá slaqwtihe. 28Baraá tla/ángw Kríshaanayhe Mungú muu bahh'alé guna qaás. Múk geera a ya/abuuse, múk tsár a mukdá' ya/abtór amór Mungú daahh ga axweemamiís, múk tám a intsaahhatuuse. Múk aluudá' a kudá' aleesleemu gu koóm oo tlehhma'aá waa/oo/amór koomá' gi tlehhiít. Nee slám múk aluudá' a mukdá' aleesleemu gu koóm oo tiqtuuse kawa hungu/utimisi, nee kudá' aleesleemu gu koóm oo muu kuwa alee/iimisi. Nee oo hatlá' a mukdá' aleesleemu gu koóm oo muu kuwa geeraharahari, nee oo hatlá' a kudá' aleesleemu gu koóm oo tawa axweesi ar tsifrír dimbadimbé ar xuawaslen. 29Xáy, sleémeero a ya/abuuseéro? Laqaá sleémeero i ya/abtór amór Mungú daáhh alki/aa/itiía? Laqaá sleémeero a intsaahhatuuseéro? Nee slám sleémeero i tlehhema'aá waa/oo/amór koomá' tlehhiitiía? 30Nee sleémeero aleesleemu ngu kón'a oo tiqtuuse kawa hungu/utimisi? Nee slám sleémeero ta axweési ar tsifrír xuawaslen? Nee sleémeero tsifriirí ka ilaharmiísi? 31Ala kuungá' aleesleemuudá' ak gídaabár koóm leelehhiitaak. Nee aníng loohír ak hhoo' ngi kuungá' i laqaám.

will be added

X\