1 KORINTO 11

1Aníng na eeharaaré', adoodá' aníng Kristo ngur eeharahaar. 2Aníng kuungá' nu xirfayeemiís as adoodá' kuungá' aníng iwa inslasleeré' baraá umuúqo gaaro, nee muruudá' sleémeero aníng naa dirhúng i intsaahhatimís ugwa eehadé'. 3Ala aníng a slaá' kuungá' kawa xua' gídaabá, Kristo an ságw umuú hhawaata, nee hhawaata an ságw /ameeni, nee Mungú an ságw Kristo. 4Umuúqo hhawaatuuwo barnaxes sagós gwa tuntuúk, qoomár bir firiirín, laqaá qoomár bir ya/abtór amór Mungú daahh axwees, inós sagós gun murekeemiis. 5Ala umuúqo /ameeniiro barnaxes sagós gwa tuntukká, qoomár bir firiiriín, laqaá qoomár bir ya/abtór amór Mungú daahh axwés, inós sagós gun murekeemís. Asma adoorí binga tléhh, inós a adór /ameenír taa saga deéqw. 6Ala /ameeni sagós tuntukaro burngu sla'aká, tam se'eengós burke tsaát ku hhoó'. Ala barnaxes a gár murér koom /ameeni se'eengós nguwa tsat, laqaá sagós kuwa deeqwi, adoorí bir murér koón, inós sagós ngu tuntuk. 7A hariímaarooká hhawaata saga nguwa tuntuuki, asma inós a slaqsoó Mungú nee xirfuú Mungú. Ala /ameeni inós a xirfuú hhawaata. 8Asma hhawaata inós kwa tleehhiiká ar /ameeni, ala /ameeni kana tleéhh ar hhawaata. 9Nee slám malé alé hhawaata kwaa tleehhiiká as /ameeni, ala a /ameeni kana tleéhh as hhawaata. 10Gawaá adoorihe /ameeni gár kawa hariím masók sagós gun tuntukuún as kawa laqan gídaabá inós ka baliit. Adoorí ngi tlehhit as malayke. 11Ala baraá Aakoowo /ameeni a gaarooká bar hhawaata i kaahh, nee slám hhawaata a gaarooká /ameeni bir káhh. 12Asma adoodá' /ameeni kara tleéhh ar hhawaata, hhawaata sleeme inós kuna laqwaál nee /ameeni. Ala mura' sleémeero amór i dahhi a amór Mungú. 13Kuungá' kiloohúng alqaytsitaak. Xáy, a gár hariíma /ameeni Mungú nguwa firiin barnaxes saga gwa tuntukiká? 14Ahaá, tlehhemuusíng kuungá' tundura tleéhh, tlehhemuusíng ngi laqaqankáhe dirhunge gídaabá hhawaata barnaxes ku se'eengw tlét, a mure dirose. 15Ala /ameeni barnaxes ka se'eengw tlet, dirose a xirif. Asma /ameeni se'éngw tlét guna sleér as tiwa tuntukuun. 16Ala heé tlaampa'amisuú slaá' daanduú iidíguuwihe, inós ngi xui gídaabá atén tlehhma'aá adór kwisíng i koomanaaká, tam múk Kríshaanáy oo umuúqo diiro gi konká. 17Aníng baraá axweesantí ni dirhúng i ooa, aníng gár tiwa hariím a kuungá' nun iigahhaát gawaá gár wake. Asma dinku'uumarhúng gár ni huwahup a gár hhooeeká ala a gár tlaakw. 18Gár har geerá, aníng iidík ugwa axaás gídaabá, qoomár kuungá' múk Kríshaanáy bar burumburumitá', kuungá' taa partlité'. Ala aníng aga ya/aám gídaabá iidíguuwí oo ló' daqtakaaro. 19Asma a gár hariím daqooroó adoosíng niwa ti'iiti baraá tla/angwhunge, as mukdá' haratlintaaór ló' ga koóm iwa geehhoouy. 20Gawaá adoorihe, kuungá' múk Kríshaanáy bar burumburumitá' i ya/aandaaká muruú /aymár Aako kuwa /aga'. 21Asma qoomár /aymaaro umuúqo heewo muruú /aymaarós gun kilós /aay. Ala gár aluudá' ngi haar a heé wák i didá' wa iwiwiit i qwariit, ala kuqá' guruuwós gwa dalaa/a hhe'eés. 22Ahaá, kuungá' maraay i koonda'akáhe awa tawa /ayiinda' nee tawa wahaanda'? Laqaá a gídaabáhe múk Mungú un waaqaqa'á', tam múk liitlakuuse baraadane kuri murekeemisá'. Án gár kuungá' nu baw a milá? Nun xirfayeésa? Aasla'áy, nu xirfayeesaaká daanduú kaangwihe. 23Asma aníng intsaahhastí ana ilaóh dír Aakoó wa alé, nee ngiri kuungá' i haniís, gídaabá, aakoorén Yesu xweeraadá' kuwa sakií/, mukaatmo guna taataáhh, 24iri sluufiís, guri parhhamiís, iri oó', “Gaarí an slaqwte'eé' ar tinda haniís as kuungá'. Adoorí tlehhiitaak as inslaslangw'eé'.” 25Nee alaá /aymaaro xooslmo guri adoodár óh sleeme, iri oó', “Gár baraá xooslmoowí a alqadór /aben, tidá' Mungú aa tleéhh ar tseerer'eé'. Adoorí tlehhiitaak qoomár bar wahaandá' as inslaslangw'eé'.” 26Asma qoomár kuungá' mukaatmoowí bur /agiindá' nee gár baraá xooslmoowí bar wahaandá', kuungá' a gwa'arár Aako an alki/itá' tam ay dír inós ni ki/i. 27Ala gawaá adoorihe, hee barnaxes mukaatmoowí gwa /aay, nee gár baraá xooslmoó Aako gaa wáh ar loohír hariimaaká, heé adoorí slaqwtá Aako nee tseerér Aako gaa tlakweemaá i tleéhh. 28Gawaá adoorihe umuúqo heewo ti kilós alqaytsiti, daqaní mukaatmo ngu /ayi nee gár baraá xooslmoodá' ngi wahi. 29Ala umuúqo heewo oo /ayiím, nee oo wahaám, barnaxes slaqwtá Aako gaa tsaahhiiká, heewí taa kilós sakwasleemár i tleéhh ar loohír /ayma nee wahaangw. 30Gawaá adoorihe gaarí an gár múk yaariír baraahunge kus daqeetlákw nee is tiqi, nee slám an gár múk yaariír isa qaátl dirhunge. 31Ala geeraawo barnaxes atén kilootén taa alqaytsiitaán, atén geeraawo alók taa sakwasleemutiiká. 32Ala qoomár barnaxes atén ti sakwasleemuut, a gídaabá Aako atén tin muux, as atén mitiwa sakwasleemuút dinkwa nee múk aa haratlintii'iiká. 33Gawaá adoorihe, hhaee'eé', qoomár kuungá' barnaxes a burumburumitá' as tawa /ayiinda', ti daamaaraande'. 34Ala hee barnaxes i qwariit, i /ayin dír do'ós wa alé, as burumburumituuhúng mindiwa sakwasleemár ar kií/. Nee muruudá' aa meet aníng binda hardáh amorhúng i alé ngu hara'ayiím.

will be added

X\