Lomo 2

1Yakamana minditupa-mane yangone tupa yapa lo tale puato, utupanenga koo tene eya lalaini tekeko, nambato wuane lalaini wandakali yakama pitaka mindiki-mindiki lo pii mindi langeyo. Wandakali waka utupane-mane mana koo minditupa wato minalaini wuane pua teke, nimbatopi mana koo utupane wato minalene leyo. Tene okonena, nimbato wandakali yangone mindi yapa lo tale puato, balanga koo tene eya lole okonemane nimbato nimba tanenga koo tene okone eya lole-kola pulu-peyako. Nimbato nimba tanenga koo tene mindi naeya katulo nalolo-pele. 2Mana koo okonepene minalaini wandakali tupa Goteto yapa lo tale puato, yole koo mindi maiyane. Nanimato balana mana okone tika-pene wete eya lo nembo teyama. 3Nimba tane-mane mana koo okonepene tupa minu atoto teke, wandakali waka tupa yapa lo tale puato, utupane-mane mana koo utupane minu ateyai loto, utupanenga koo tene tupa yata alene. Nimbato wuane pua atole-kola, Goteto nimbanga koo tene mindi yata na-olopeya nembo telepe. 4Nimba yamapane peke lola nembo toto, Goteto nimba moyo, mana epene mindi minuto, yole koo mindi nimba wamba kapoyale gii napene, mee maliyo ateya. Nimbato okone nembo natene, balana mana epene okone mee ya lo nembo telepe. 5Andipa nimba yamapane peke nalene, mee tuu puato, mana koo tupa wato minu teke atele okonemane nimbato Gote mo yataka wato, nimbana yole koo kambua mo yomowa atele. Wuane pua atele okonena, matili Goteto balana kote oko tika pua lola-angi, nimbato yole koo utupane molopele. 6Okone angi, wandakali mindiki-mindiki lo wua pua ateaini nembo toto, Goteto utupanena yole oko malupeya. 7Wandakali minditupa-mane Gote towa atu ati kenga yuu epene okona saka atapowa atamakale nembo talaini. Goteto utupanena gene tupa laiyu loto, ati kenga tii-pene okone geakale nembo toto, wandakali utupane-mane mana epene tupa tailo wato minu atalaini. Matili Goteto yole epene mindi utupanenga mawuato, saka atapowa ateakale lolopeya. 8Goteto wuane pulupeya tekeko, wandakali minditupa-mane yakama tane angu nembo toto, balana pii enene oko masia mawuato, mana koo tupa wato minu atalaini. Wandakali utupane towa Goteto yataka wete wato, yole koo mindi malupeya. 9- 11Goteto wandakali mindi bala wandakali yame andokope lo ando yapa na-lalane. Jia. Balato mana mindiki okone teke wato minuto, wandakali pitaka yapa lo tale puato, yakamana yole tupa malupeya. Juta yamepi, wandakali yame waka tupapi, utupanena minditupa-mane mana koo tupa wato minu atolai-kola, Goteto kenda-pene andane minditupa utupane pitakanga epeakale lolopeya. Kenda-pene utupane epola-kola, utupane pitaka tandaka andane no atolopeyai. Juta yamepi, wandakali yame waka tupapi, utupanena minditupa-mane mana epene tupa wato minu atolai-kola, Goteto utupane pitakana gene tupa laiyu loto, utupanena yamapane mo tambo laya wato, utupane ati kenga yuu epene tii-pene oko ando meakale lolopeya. 12- 13Wandakali mindimane Gotena loo tupa pitaka wayumane wete wato mineando, Goteto bala tika-pene ateya lolopeya tekeko, wandakali mindimane Gotena loo utupane mee alene-mane angu ale wato, wato mina napeando, Goteto wandakali okone bala tika-pene ateya nalolo-peya. Jia. Wandakali mindimane Gotena loo tupa nembo toto teke, loo utupane wato mina napeaindo, Goteto balana loo utupane wato minuto, wandakali okone yapa lo tale puato, yole koo mindi utupane malupeya. Gotena loo tupa ale naene atoto, mana koo wato minalaini wandakali tupa yuu koo okona polopeyai. 14- 15Wandakali yame waka tupamane Gotena loo tupa ale-mane ale naene ateyai tekeko, utupanena minditupa-mane mana koo mindi miniyai-kola, yakamana nembo-tene tupamane yakamato kopeta peyai lo lamaiyane. Utupane-mane mana epene mindi miniyai-kola, yakamana nembo-tene tupamane yakamato mana epene mindi miniyai lo lamaiyane teke. Utupanena nembo-tene tupamane wuane piyane okonemane Gotena loo tupa wandakali utupanena nembo-tenenga eya lo mo pana alane. Wandakali utupane-mane Gotena loo tupa ale-mane ale naene atoto teke, Gotena loo tupamane leya pua teke piyaini. Utupane-mane wuane peyai-angi, Gotena loo utupane wandakali utupanena nembo-tenenga eya okomane wandakali utupane mana lamaiya-kola, utupane-mane wuane piyaini. 16Andipa wandakali-mane mana minditupa too pua tenga-mane wato minu atalaini tekeko, matili Goteto Jisasa Kataisa lamawuato, nimbato wandakali pitaka yapa lo tale pipe lola-kola, Jisasato wuane pulupeya. Nambato Gotena pii layene epene oko wandakali tupa lamawuato, wuane lalawane. 17- 18Andipa nambato Juta yame wandakali yakama ando pii mindi leyo. Yakama tanena gene tupa laiyu loto, yakamato nanima Gotena yame ateyama lalaini. Wamba mindimane Gotena loo tupa yakama mana langeai-kola, wandakali-mane wua pipiai lakae lo Goteto nembo talane tupa yakamato andoto, mana tika-pene tupa epene ya lalaini. Tene okonena, matili Goteto yakama kote lalapa lola-angi, balana loo okomane yakama moyolo-peya nembo talaini. 19- 20Yakamato Gotena loo tupa andeyama nayuto, wandakali undupi pangosa ateyai tupa asia andawa loyale, yakama lamu gulo tii pua atalamane nembo talaini. Yakamato katulo wandakali lee koo tupa asini andawa lolo-peyama nembo talaini. Yakamato Gotena loo tupa andoto, tisa atoto, Gotena loo anda napene wandakali andopane aŋako gulene ateyai tupa katulo mana lamaulu-peyama nembo talaini teke. 21Yakamato wandakali waka tupa mana lamawua ateyai-ko. Anu peakale yakama tane mana mia na-piyainipe. Yakamato wandakali waka tupa lamawuato, yakamato pake mia na-piyapape loto teke, anu peakale yakama tane pake mialainipe. 22Dee, yakamato wandakali waka tupa mana lamawuato, pamuku na-piyapape loto teke, anu peakale yakama tane pamuku piyainipe. Yakamato owato gote tupa koo wete eyai nembo toto teke, anu peakale yakamato owato gote tupana lotu anda tupana poto, minditaka eya tupa pake mialainipe. 23- 24Yakama tanena gene tupa laiyu loto, nanimato Gotena loo tupa nembo teyama lalaini tekeko, Gotena pii pepa pelene eya mindimane loto, yakamato mana koo tupa minalaini okonena, wandakali yame waka tupamane Gote ando pii koo loto, balana gene minu koyalaini layene eya. Pii okonemane wuane leya pua teke, yakamato Gotena loo tupa kalo piyaini mana okomane balana gene oko minu koyalaini. 25Yakamato Gotena loo tupa pitaka kuai lo wete wato minu atalaini yaindo, yakamana yala-pene umbaini katene mana okomane katulo yakama moyolo-peya tekeko, yakamato Gotena loo tupa kalo pua ateaindo, Goteto andola-kola, yakamana yala-pene umbaini katene okone kati napene gulo atola-kola pulupeya. 26Wuane pua teke, yala-pene umbaini kati napene akali mindimane Gotena loo tupa pitaka kuai lo wete wato minu atalae yando, Goteto andola-kola, akali okonena yala-pene umbaini katene gulo atola-kola pulupeya. 27Enene, wamba mindimane Juta yame akali yakamana yala-pene umbaini kateaipia. Yakamato Gotena loo pepa pelene eya tupa dii lo andalaini tekeko, yakamato balana loo utupane kalo piyaini. Tene okonena, Gotena loo wato minu atalane akali mindina yala-pene umbaini oko kati napene atola-kola teke, balato yakama Juta yame wandakali tupa yapa lo tale puato, yakamanga koo tene mindi yata olopeya. 28- 29Anu peakale nambato wuane leyope. Mindimane Gotena loo pepa pelene eya oko wato minuto, akali mindina yala-pene umbaini oko katulai-kola, akali okone bala mee umbaini kenga angu Juta yame gulo ateando, bala Juta yame enene jia. Gotena Oli Sipitisa okomane wandakali mindina nembo-tenenga piape pula-kola, wandakali okone bala yamapane peke loto, balana nembo-tenenga Juta yame gulo ateando, bala Juta yame enene mindi atolopeya. Wandakali-mane balana gene oko laiyu nalolo-peyai tekeko, Goteto balana gene oko laiyu lolopeya.

will be added

X\