Pilipai 2

1Kataisa bala yakama towa atu atoto, yakamana mini, yamapa-la, okonelapo mo tai laya alanepe. Bala yakama towa epelewa yamapane yo atoto, yakamana mini mo tambo laya alanepe. Oli Sipitisa oko yakamanga ateya-kola, yakamato wandakali yangone tupa ondo wato, moyalainipe. 2Wuane yando, yakamato namba mo epele wete piya oyale, mindi akali epele aka pua yamapane yoto, nembo-tene mindiki paluto, yamapa mindiki palu atalapape. 3Yakama tanena gene andane yakale nembo toto, yakama tane angu moyoyale piape pua ata na-piyapape. Jia. Yakamato wandakali yangone tupana pangosa atoto, utupane-mane yakama sia minu lipinga yale ateyai nemboto atalapape. 4Wuane nembo toto, yakama mindiki-mindiki lo yakama tanena minditaka yolaini tupa angu kuai-lene yakale lo ando atamakale nembo na-talapape. Jia. Wandakali waka tupana minditaka yolaini tupa kuai-lene teke yakale nembo toto, utupane moyo ando ata maiyapape. 5Jisasa Kataisato nembo teane pua teke, yakamatopi nembo-tene okonepene teke palu atalapape. 6Bala Gote enene ateane tekeko, balato Gote yale angu atokale nembo nateaipia. Jia. 7Bala Gote ateane mana okone tepa alu, yuu okona akali enene mindi gulo atoto, bala piape akali mee mindi gulo ateaipia. 8Balato wuane pea-kola, wandakali-mane bala akali enene mindi ateya lo andeaini-pia. Bala Gotena pangosa gulo atoto, Gotena pii oko angu wato minu atama pulu, ita malamanda okona omeaipia. 9- 11Jisasato wuane peane okonena, ati kengapi, yuu okonapi, yuu pangosapi, utupanena atalaini tupa pitaka-mane Jisasana gene oko ale wato, aikini leka wato, bala Akali Andane oko ateya lape-pene. Utupane-mane wuane pulai okonemane, Ayiane Gotena gene oko laiyu leakale nembo toto, Goteto Jisasana gene oko laiyu loto, gene waka tupa pitaka sia minene gene andane wete mindi bala mayaepia. 12- 13Nambana yamapane yene yame, wamba namba yakama towa atu atema-angi, ole dindi lo yakamato Gotena pii wato minu ateai okoni. Yakamato balana pii oko wato minuto, balato nembo teya pua piyapale nembo toto, bala tane yakamana yamapane pangosa piape puato, balana nembo-tene wato minulane tai-lene oko yakama giyane-ko. Andipa namba yakama towa atu ata napeyama-angi, Goteto yakama molo-peke leakale nembo toto, yakamato bala yuku amawua puti-puti peyo atoto, wua pua atamakale nembo talapape. 14- 16Gotena pii oko wato mina na-piyaini wandakali tupamane balana mana epene tika-pene tupa awua tepa wato, mana koo kambua minu atalaini tekeko, Kataisa bala lapone epola-angi, nambato yakama moyoyale piape pewane tupa mee katapusa piape pua apia napewa lo namba tanena gene oko laiyu lokale. Nambato wuane pula nembo toto, yakamato wandakali koo utupanena tombenenga atoto, ati kenga kaiyanda tupamane tii piyawa atalaini pua teke, yakamatopi wandakali utupane tii piyawa atoto, Gotena pii okomane wandakali tupa saka atapowa ateakale lo ataya alane lalapape. Pii okone wandakali utupane lamawuato, yakamato tii piyawa atamakale nayuto, yakamanga koo tene mindi nayene, Gotena andopane yame epene tika-pene atamakale nembo toto, pii-mane yanda napene, mulu-mulu nalene, yakamana piape pulaini tupa pua atalapape. 17Yakamato Gote lo bilipi loto, namba moyoyale minditaka epe lapiai tupa Gote lo opa maiyene guleya. Nambato yakama moyoyale Gotena piape pua atolowa-kola, wandakali-mane namba peyo ome leaindo, nambato nambana tundupa oko Gote lo opa mauluwa-kola teke pulupeya. Nambana opa okone yakamana opa okone towa tako peando, nambato yakama pitaka towa epelewa atape-pene. 18Wuane pua teke, yakamatopi namba towa epele wato, epele wete wa atalapape. 19Andipa yakama wua pua ateyai lene oko ale wato, namba epele wakale nembo teyo. Tene okonena, Akali Andane Jisasato katu leando, nambato Timoti bala yakama ateyainga wamba ini epeakale lokale. 20- 21Akali bala yale mindi namba towa atu wali ata napeyama. Wandakali waka namba towa atu ateyama tupa pitaka-mane yakama tanena minditaka yalaini tupa angu kuai-lene yakale lo ando atoto, Jisasa Kataisana piape oko pimakale nembo natalaini. Timoti bala angu namba towa nembo-tene mindiki palu atoto, yakama moyauwa lakae lo nembo talane. 22Iwanane-mane ayiane moyo piape piyane pua teke, wamba Timoti bala namba towa atu Gotena pii layene epene okona piape pua atepa. Okone angi, yakamato balana mana epene okone andoto, balato Gotena piape oko kuai lo piyae-ya lo andeai okoni. 23Tene okonena, jasa okomane namba andayo aki leyape lo nambato wamba ini ale alu, matili Timoti bala yakama ateyainga wamba ini epeakale lokale. 24Dee, matili Akali Andane okomane namba epolane asia mindi lumbu tepa ola-kola, nambatopi yakama wamba ini andolo epokale nembo teyo. 25Matili nambato wuane pukale tekeko, andipa nambato akali Ipapo-taitasa bala yakama ateyainga peke leakale lokale. Wamba Ipapo-taitasato namba moyakale loto, yakamato bala namba atewanga epeakale leai-kola, bala nambana amene gulo atoto, namba towa potomane lo atepa. Potomane lo atoto, nalipato Jisasa towa yanda-pene wandakali tupa towa yanda pimawua atepa. 26- 27Matili Ipapo-taitasa bala siki andane mindi moto, omape-pene gulea-kola, Goteto bala ando wato, mo atu yane. Bala omapia-yale, kenda-pene okone nambanga ipupia-yale tekeko, kenda-pene okonepi tako pua nambanga na-epeakale nembo toto, Goteto nambapi ondo wato, Ipapo-taitasa okona siki okone mo atu yane. Pilipai tane wandakali yakamato bala siki oma-yene eya lene okone angu ale wato, mini kendawa ateyai nembo toto, Ipapo-taitasa balapi mini kenda wato, yakama andauwa lakae lo nembo teya. 28Wuaneko, bala yakama ateyainga epola oko andoto, yakamato epele olai-kola, namba mini kendawa ateyo okone mee gulolo-peyako. Nambato bala yakama ateyainga epe lauwa lakae lo nembo teyo. 29- 30Wamba yakamato katulo namba moyolo naepeai-kola, Ipapo-taitasa balato namba moyolo epea okoni. Epoto, bala tane kuai lo atokale nembo natene, namba moyo Kataisana piape oko pua atoto, bala omape-pene gulea-ko. Yakamato akali okonepene tupana gene tupa laiyu lape-pene. Tene okonena, Ipapo-taitasa bala yakama ateyainga epola-angi, yakamato bala Akali Andane okona piape piyane nembo toto, bala towa epele andane wete wato, nimba wayu epeleya lo bala lamialapape.

will be added

X\