Jemesa 1

1Namba Jemesa. Nambato Akali Andane Jisasa Kataisa, Gote-la, okone-lapona piape pimawua atalawane. Wamba Isatale tane wandakali yame alesa tupana wandakali minditupa yakamato yakamana yuu tene tupa tepa alu, yuu waka tupana peainipia. Andipa yakama yuu waka utupanena ateyai-kola, nambato yakamana pepa oko peyo epe loto, yakama kuai lo atalapape leyo. 2- 3Nambana amene imalini yame, yakamato Gote lo bilipi leyama nayu leyaipe, naleyaipe lo andoyale, Goteto kenda-pene mindipene-mindipene tupa yakamanga epeakale lo ando kondalane. Dee, yakama Kitisene tai atalapale nembo toto, Goteto kenda-pene utupane yakamanga epeakale loto, yakamana bilipi oko minu mandeke peakale lo ando kondalane teke. Tene okonena, kenda-pene utupane yakamanga epola-angi, yakamato epelewa teke atape-pene nembo talapape. 4Gotena mana epene tupana mindikipi mindi yakamanga jia nayola-kola, yakama Gotena wandakali epene tika-pene wete atamakale nembo toto, yakamato kenda-pene epola tupa awua atalapape. 5Goteto mangene mindi peakale lo wandakali mindimane pote leya-kola, Goteto wandakali okone ando laiya nalene, mangene okone piyane. Wuaneko, kenda-pene mindi yakamana mindinga epola-kola, balato anu puape lo tatake yando, Gote nimbato nembo-tene epene mindi gipe lo balato pote lape-pene. Pote lola-kola, Goteto nembo-tene epene mindi bala malupeya. 6- 8Wuane tekeko, popo leya-kola, ita tupana mane tupa yangisa puu-puu piyane. Wuane piyane pua teke, wandakali minditupana nembo-tene waka-waka paliyaini. Wandakali utupanena mindimane mini lapo paluto, Goteto mangene mindi pulu-peyape, napulu-peyape lo pote leando, Akali Andane okomane mangene okone pulupeya nembo natape-peneko. Wandakali mindimane mini lapo paluto pote nalene, Goteto mangene okone enene pulupeya nemboto toto, pote leyo nayu lape-pene. 9- 11Nai tandaka pua teya-kola, palawa dini yati-pene tupa kapu talane. Kapu teya-kola, popo epoto, palawa dini epene utupane yuunga longo tepa aya eya-kola, palawa dini yati-pene tupa koyalu, alu piyane. Wuane piyane pua teke, yuu okona minditaka yati-pene epene kambua yatawa atalaini akali amango tupamane yakamana bisanisa piape tupa pua atoto teke, yakama omalu, alu pulupeyai. Yuu okona akali amango tupa omalu, alu piyaini tekeko, Gotena wenonga Kitisene wandakali tipia tupana gene andane yalane okonena, wandakali tipia utupane epelewa atape-pene. Tene okonena, Goteto yuu okona akali amango mindi bala mo tipia gulaya yando, bala epelewa atape-pene. 12Wamba Goteto potomisa pii mindi leane oko loto, wandakali mindimane namba towa epelewa yamapane yo ateando, matili nambato wandakali okone bala saka atapowa ateakale lokale leaipia. Wuaneko, Sataneto wandakali mindi minu mandeke pula-angi, wandakali okone bala tai atape-pene. Bala tai atoto, mandeke pene okone sia mineando, Goteto balana potomisa pii leane okone nembo toto, wandakali okone bala saka atapowa ateakale lo ataya olopeya. Goteto wuane pulupeya nembo toto, wandakali mindi bala tai atoto, kenda-pene awua ateando, bala epelewa atape-pene. 13Mana koo tupamane katulo Gote minu mandeke napiyane. Dee, wandakali mindimane mana koo tupa mineakale loto, Goteto wandakali okone bala minu mandeke napiyane teke. Tene okonena, mana koo tupamane wandakali mindi minu mandeke pula-angi, Goteto namba minu mandeke peya nalape-pene. Jia. 14Wandakali nanima mindiki-mindiki-mane minditaka miauwa lakae lo nembo talamane tekeko, molane asini tika-pene mindi nayando, mana koo mindi wato minuto, mia-makale nembo talamane. 15Wuane nembo toto, wanda-mane andopane mandiyane pua teke, nanimato minditaka miauwa lakae lo nembo talamane okonemane mana koo tupa mandeya-kola, nanimato mana koo tupa minalamane. Nanimato mana koo tupa minu atoto, yamapane peke nalemando, nanima katulo Gote towa atapowa ata napulu-peyamako. 16Nambana yamapane yene yame, wandakali mindimane yakama minakasa yakale lo yakamato ando konda na-piyapape. 17- 18Nai teya-kola, minditaka eya tupana tandini oko mo tomaki gula, luu gula piyane tekeko, nai anapi minditaka atinga atoto, tii piyane utupane pitaka yakale leane Ayiane Gote oko bala lawa puapi, mindi napiyane. Jia. Nanima Kitisene wandakali tupamane waka minditaka balato yakale leane tupa pitaka sia minu, balana yame bulupane atalapale nembo toto, nanimana Ayiane Gote okonemane balana pii enene okomane nanima mandiyu, ati kenga atoto, minditaka epene wete tupa pitaka nanima mee giyane. 19- 20Nambana yamapane yene yame, wandakali mindimane wandakali yangone mindi towa yataka wato, bala minu koyando, balato Gotena mana epene tika-pene oko wato mina napula-kola pulu-peyako. Kitisene wandakali yakamato wandakali yangone tupa towa wamba ini kapoyale yatakawa, pii ini laa napene, yakama pitaka-mane pii ini ale ape-pene. Yakamato nambana pii okone wayumane nembo toto, wato minalapape. 21Yakamato mana koo kalato atene kambua minalaini mana oko masia mawuato, gene nayene atalapape. Goteto pii layene epene yakamana yamapanenga yandeane okomane katulo yakamana tandini oko molo-peke lolopeya nembo toto, yakamato Gotena pii layene epene oko epelewa ale alapape. 22Yakamato Gotena pii okone mee alene-mane angu ale yaindo, yakama tane minakasa olai-kola pulupeya. Wuane pulumane nembo toto, balana pii okonemane leya pua piyapape. 23- 24Anu peakale nambato wuane leyope. Wandakali mindimane balana lee-inga galasanga andalu poto, balana lee-inga okopene ateya nembo natene, wamba kapoyale embesa alane. Wuane pua teke, wandakali mindimane Gotena pii oko mee alene-mane angu ale yando, mana okonemane katulo bala moya napulu-peya. 25Wuane tekeko, wandakali mindimane Gotena pii oko ale eyo nayu wato, embesa naene, pii okonemane leya pua teke peando, Gotena pii layene epene okonemane bala tinga lo mene atola-kola pulupeya. Tinga lo mene atola-kola, Goteto wandakali okonena mana tupa mo epene gulaya olopeya. 26Wandakali minditupa-mane pii koo mindi lolomane lo tika ando ata napene, pii koo kambua lalaini. Wandakali utupanena mindimane bala tanena gene oko laiyu loto, namba Kitisene epene wete mindi ateyo leando, bala tane andakasa ola-kola pulupeya. Balana mana koo okonemane balana bilipi okola, lotu lolane okola, okonelapo mee gulaya olopeya. 27Nanimana bilipi okola, lotu lalamane okola, okonelapo mee gulolane nembo toto, nanimato yuu okona mana koo tupa wato minulumane tika ando atoto, andopane manyanipi, wanda yalopi, utupane moyo, kenda-pene utupanenga yola tupa awua atape-pene. Nanimato wuane pemando, Goteto andola-kola, balana wenonga nanimato Kitisene mana epene tika-pene tupa wato minu atoloma-kola pulupeya.

will be added

X\