Aposolo 8

1- 3Akali utupane-mane Sipene peyo ome leai-angi, Soloto utupanena mana okone katu ya lo nembo teaipia. Sipene omea-kola, Gotena mana epene tupa kuai lo wato minu atalaini akali minditupa-mane bala mo awua poto, mali peainipia. Mali piyu, utupane-mane bala nembo toto, ai andane leainipia. Sipene ana-mane peyo ome leaini okone angi atoto tewa, Soloto kenda-pene andane tupa sosa okona wandakali peteaini tupa maiki pua ateaipia. Balato Kitisene wandakali mindiki-mindikina anda tupana kolandaka laka puato, Kitisene wandapi, akalipi, utupane minu kilau lo awua poto, katapusa anda okona aindaka laka peaipia. Solopi, akali waka minditupapi, utupane-mane kenda-pene andane tupa Jutusaleme sosa okona Kitisene wandakali peteaini tupa maiki pua ateai-kola, Jutusaleme sosa okona wandakali peteaini tupa pitaka palaka puu toko loto, Jutiya, Samatiya-la, disitiki okone-lapona yuu waka-waka yane tupana puku peainipia. Aposolo akali tupa yakama angu puu toko nalene, Jutusaleme tano okona ateainipia. 4Kitisene wandakali palaka puku peaini utupane yakama yuu waka peaini tupana atoto, Gotena pii oko lamawua ateainipia. 5Pilipi bala Jutusaleme tepa alu, Samatiya disitiki okona tano mindina poto, Kataisato wua peane loto, Samatiya yame tupa lamawua ateaipia. 6- 7Pilipito piape okone pua atoto, wandakali kambua tupanga sipitisa koo atene tupa peyo watea-kola, sipitisa koo utupane-mane alo taimane lalu, wandakali utupane tepa alu, puku peainipia. Balato wandakali kusukupi, kee koopi, siki okonepene kambua tupa mo atu yaka pua ateaipia. Pilipito metekolo piape utupane pua ateane okone andoto, wandakali kambua-mane nembo mindiki paluto, pii balato lamaiyane tupa wayumane ale amawua ateainipia. 8Pii balato leane tupa ale wato, tano okonena wandakali tupamane epele andane yainipia. 9Tano okonena, akali Saimone lene mindi ateaipia. Balato bala tanena gene oko laiyu loto, namba akali gene yene ateyo lo atalaepia. Wuane loto, balato kamo piki, posini piki pua atea-kola, Samatiya yame wandakali tupamane andoto, moko loto, nembo kambua talainipia. 10- 11Ole kambuanga Saimoneto posini piki pea-kola, wandakali gene yenepi, nayenepi, utupane pitaka-mane moko loto, balana pii oko wayumane ale amawua atoto, Gotena tai-lene andane balanga yene lalainipia. 12Utupane-mane wuane leaini tekeko, Pilipito Jisasa Kataisana gene oko laiyu loto, Goteto pitaka ando atalane lea-kola, wandapi, akalipi, lapotaka-mane pii Pilipito leane okone ale wato, bilipi loto, ipa meainipia. 13Okone angi Saimone balapi Jisasa lo bilipi loto, ipa mialu, Pilipi towa atu epoko peaipia. Pilipito metekolo piape andane mindipene-mindipene tupa pea-kola, Saimoneto utupane andoto, moko loto, nembo kambua teaipia. 14Okone angi, wandakali mindi Jutusaleme tano okona poto, Samatiya yame tupamane Gotena pii oko ale wato, bilipi leyai lea-kola, aposolo akali Jutusaleme ateaini tupamane ale yainipia. Ale wato, utupane-mane Pita, Jone-la, okonelapo yuu okonena peakale leainipia. 15- 16Peakale leai-kola, akali okonelapo Samatiya yuu okona peapelepia. Wamba Pilipito Akali Andane Jisasana gene loto, Samatiya wandakali utupane ipa mia-maiyane tekeko, Oli Sipitisa oko wandakali utupanenga na-epeaipia. Tene okonena, Pita, Jone-lamane Gote nimbana Oli Sipitisa oko Samatiya wandakali utupanenga mai lo pote leapilipia. 17Pote lalu, utupanena kawanenga kini yata yapi-kola, Oli Sipitisa oko utupanenga epeaipia. 18- 19Aposolo akali okonelapo-mane wandakali utupanena kawanenga kii yata yapi-kola, Oli Sipitisa oko utupanenga epeane okone andoto, Saimoneto okonelapo lamawuato, nambatopi wandakali mindina kawanenga kini yata olowa-kola, Oli Sipitisa oko wandakali okonenga epeakale nembo teyo-ko. Tai lene okone namba geapindo, nambato muni minditupa liyamba gukalenga, liyambato tai-lene okone namba giyapa leaipia. 20Saimoneto wuane leane tekeko, Pitato bala lamawuato, Goteto minditaka mee giyane okone nimbato muni-mane kambokale nembo tele okonena, nimbana muni okone nimba towa yuu koo okona peakale leaipia. 21Gotena wenonga nimbana yamapane oko tika napene atele. Tene okonena, Gotena piape nanimato peyama oko nimbato katulo napulupele. Jia wete. 22- 23Nambato andeyo-kola, Goteto minditaka mee giyane okone nimbato miauwa lakae lo nembo tele okonemane matasini koo mindi guloto, nimbana nembo-tene oko minu koyoto, nimba mana koo tupana anda-pangosa andi latane atalene ya lo andeyo-ko. Nimba mini peke loto, nimbana mana koo okone masia maipe. Maiyu, nimbato koo piwa lakae lo nembo tele okona tene koo oko Akali Andane okomane apia-geakale lo pote lape leaipia. 24Wuane lea-kola, Saimoneto balana pii okone yano peyoto, kenda-pene minditupa nambanga epolopeya leyapi utupanena mindikipi mindi nambanga na-epeakalenga, liyambato namba moyo, Akali Andane oko ando pote lalapape leaipia. 25Pita, Jone-la, okonelapo-mane mangene Akali Andane Jisasato peane tupapi, pii balato leane tupapi, utupane wandakali tupa lamai-yapilipia. Lamaiyu, matili liyamba Jutusaleme peke loyale peapili-angi, okonelapo-mane Samatiya yame tupana tano aŋako kambua yane tupana poto, pii layene epene oko wandakali tupa lamaima teke peapilipia. 26Jutusaleme atoto, Gasa tano okona puu nena lolane asini palaini okonena wandakali napalene yuu mindi yaepia. Akali Andane okona enjole mindimane Pilipi lamawuato, nimba ika lalu, asini okonena puu nena lape leaipia. 27Wuane lea-kola, Pilipi bala ika lalu, asini okonena puu nena loto, Itiyopia tane gapomane akali andane mindi asini peanga andeaipia. Itiyopia tane akali okone bala wangali tolo apene mindi atoto, Itiyopia tane kuwini wanda Kandesi lene okona munipi, okonetaka tupa ando ata-maiyaepia. Wamba bala Jutusaleme poto, lotu leaipia. 28Lotu lalu, bala Jutusaleme atalu, Itiyopia yuu okona peke loyale asini peaipia. Akali okonemane balana katesa okona pitiyu poto, pii wamba potopesa akali Aisayato pepa peleane mindi dii lama peaipia. 29Pepa okone dii lama pea-kola, Oli Sipitisa okomane Pilipi lamawuato, nimba katesa peya ongane mandaka puu leaipia. 30Wuane lea-kola, Pilipi bala katesa peane okonena taimane watama poto, ale ya-kola, Itiyopia tane akali okonemane pii wamba potopesa akali Aisayato pepa peleane okone dii leane oko ale yaepia. Ale wato, balato akali okone tipa puato, nimbato pii dii lele okonena tene oko nembo telepe leaipia. 31Wuane lea-kola, Itiyopia tane akali okonemane balana pii okone yano peyoto, akali mindimane pii okona tene oko namba langi napeando, nambato anu puato, nembo tokalepe leaipia. Wuane lalu, balato Pilipi lamawuato, nimba namba towa atu katesa okona pitiyu bakale, peakaiyu laa leaipia. 32Pepa balato dii leane okonemane loto, wandakali mindimane sipisipi mindi peyoyale atu peya-kola, sipisipi okone tai nalene, mee tambo lo palane leaipia. Wuane pua teke, akali minditupa-mane akali mindi peyoyale atu peai-kola, bala tai nalene, mee tambo lo atu peaipia. Akali mindimane sipisipi andopane mindina itini kateya-kola, ŋaa na-lalane pua teke, akali okonemane pii mindi naleaipia 33Wandakali-mane bala akali gene nayene gulaya wato, balana kote oko tika pua lamai napeainipia. Jia. Utupane-mane bala peyo ome leainipia. Balato andopane mindi mandi napea-kola, mindimane balana mandiyene yame oko-tuma ateyai loto, temane laa napulu-peya. Wuane loto, Itiyopia tane okonemane pii wamba Aisayato pepa peleane okone dii lama peaipia. 34Pepa okone dii lokoyo piyu, Itiyopia tane akali okonemane Pilipi tipa puato, potopesa akali okonemane pii leane okone api andayo leape leaipia. Bala tane andayo leape. Pee, akali waka mindi andayo leape leaipia. 35Wuane lea-kola, Pilipito pii Itiyopia tane akali okonemane wamba ini bulupane pepa dii leane okonena tene tupa bala lamaiyu, Jisasato piape wua peane lo pii waka minditupa tako pua bala lamai-yaepia. 36Lamaiyu, akali okonelapo katesa okona pitiyu, asini poto, ipa angini mindina matenenga peakaiyu leapilipia. Peakaiyu leapi-kola, Itiyopia tane akali okomane Pilipi lamawuato, ipa peteya oko anda. Namba ipa mokale. Minditaka mindimane nambana asia pai leyape, naleyape lo tipa peaipia. 37[Tipa pea-kola, Pilipito balana pii okone yano peyoto, nimbato Jisasa lo bilipi leendo, nimba ipa miape-pene guleya leaipia. Wuane lea-kola, akali okonemane Pilipi lamawuato, nambato Jisasa Kataisa bala Gotena iwanane oko lo bilipi leyo leaipia]. 38Wuane lalu, akali okonemane balana katesa okone ongane yakale lalu, ipa angini peteane okonena puu nena lea-kola, Pilipito bala ipa peya-mayaepia. 39Ipa peya-maiyu, liyamba ipa oko tepa alu matenenga epeapi-kola, Akali Andane okona Sipitisa okomane Pilipi kapoyale mo awua peaipia. Mo awua pea-kola, Itiyopia tane okone bala epele wato, asini wamba bala poyale peane okonena pulu, Pilipi lapone anda napeaipia. 40Oli Sipitisa okomane Pilipi bala Asatote tano okona mo awua pea-kola, Pilipito tano okonena epolo ya lo andeaipia. Andalu, bala Sisatiya tano okona poyale asini poto, tano waka asininga yane tupa pitakana poto, Gotena pii layene epene oko lamaima pulu, matili bala Sisatiya tano okona peakaiyu leaipia.

will be added

X\