Aposolo 25

1Pesatasa bala Sisatiya tano okona epoto, Jutiya disitiki okona gapomane akali kawane ateaipia. Ole tepoai angu tano okonena atalu, bala Jutusaleme peaipia. 2- 3Bala Jutusaleme pea-kola, pitisa akali kawane tupapi, Juta yamena akali andane tupapi, utupane-mane nembo toto, Polo bala Jutusaleme epo pola-kola, akali minditupa-mane asininga anga pua atoto, bala peyo ome leakale nembo teainipia. Wuane nembo toto, akali utupane-mane Pesatasa ateanga poto, koo tene minditupa Polonga yata yainipia. Yata alu, utupane-mane Pesatasa lamawuato, nimbato nanima moyoto, Polo bala Jutusaleme epeakale lape leainipia. 4Wuane leai-kola, Pesatasato utupanena pii okone yano peyoto, Polo bala Sisatiya tano okona andi latane ateya leaipia. Namba ole aŋalapo minditupa angu wali atalu, Sisatiya tano okona peke lokale lo ateyo. 5Namba polowa-angi, yakamana akali kawane tupa namba towa atu makale. Poto andoloma-kola, akali okonemane mana koo mindi minia yando, utupane-mane bala kosimi leakale leaipia. 6Wuane lalu, Pesatasa bala Jutusaleme wandakali tupa towa atu ole kitupasa yandopi, paiyasa yandopi, mindi atalu, Sisatiya tano okona peke leaipia. Peke loto, anate-lene bala kote ale alaini anda okona pituto, Polo lamolo pulupa leaipia. 7- 8Polo bala epea-kola, Jutusaleme atalu epeaini Juta yame akali tupamane bala ato mapu puato, pii kenda-pene kambua balanga yata yaini tekeko, Poloto utupanena pii okone yano peyoto, Juta yamena loo tupa yandopi, Juta yamena lotu anda andane okona yandopi, dee Lomo tane gapomane akali kawane Sisa oko towa yandopi, utupane towa nambato mana koo mindi mina napewane, jia leaipia. Wuane lea-kola, Juta yame akali utupane-mane Polonga pii kenda-pene kambua yata wato, balato wua peane leaini tekeko, utupane-mane enene leyama lo katulo Pesatasa andawa naleainipia. 9Wuane tekeko, Pesatasa balato Juta yame wandakali tupa mo epele piya wakale nembo toto, Polo tipa puato, nambato nimbana kote okone Jutusaleme ale wakale. Nimba polape leaipia. 10- 11Pesatasato wuane lo tipa pea-kola, Poloto balana pii okone yano peyoto, jia leaipia. Juta yame wandakali tupanga nambato mana koo mindi mina napewa oko nimbato wayumane nembo tele okoni. Utupane-mane namba kosimi loyale pii leyai utupane enene pii mindi naleyai okonena, akali mindimane namba Juta yame wandakali utupanena kininga katulo mai napulu-peya. Wuane tekeko, nambato mana koo waka mindi minewa yando, Lomo tane gapomane akali kawane Sisana kote anda ateyama okona atoto, nambana kote oko ale ape-pene. Akali okonemane namba kosimi loto, namba omape-pene leando, namba omape-pene. Lomo tane gapomane akali kawane Sisa bala tane-mane nambana kote okone ale yakale leyo leaipia. 12Poloto wuane lea-kola, Pesatasato balana kanjole yame tupa towa wamba ini pii lo tika piyu, Polo lamawuato, nimbato Lomo tane gapomane akali kawane Sisato nimbana kote oko ale yakale lele okonena, akali okonemane nimbana kote oko ale yakale pola leaipia. 13Ole minditupa pea-kola, Kiŋi Akitipa-la, bala imalini Benisa-la, okonelapo-mane Pesatasa nimba wayu epeleya lapakale nembo toto, Sisatiya tano okona epeapili-pia. 14Epoto, liyamba Sisaliya tano okona ole kambua peteapi-kola, Pesatasato Polona pii temane oko kiŋi Akitipa oko lamawuato, wamba Pilikisato akali mindi andi lea-kola, andipa bala mee katapusa ateya leaipia. 15Namba Jutusaleme atewa-kola, pitisa akali kawane tupapi, Juta yamena ando atene akali tupapi, utupane-mane Polonga koo tene minditupa yata wato, akali okonemane mana koo mindi mineane okonena, nimbato bala omeakale lape leaini. 16Utupane-mane wuane leaini tekeko, nambato utupanena pii okone yano peyoto, Lomo tane nanimato kenda-pene mindi wandakali tupa mee mai na-piyamane. Jia. Wandakali okonemane bala kosimi lolai wandakali utupanena pii lolai tupa yano peleakale lo mali yalamane lewa. 17Wuane lewa-kola, akali utupane namba towa atu wali epeai. Ipulu, anate-lene nambato mali nayene, kote anda okona pituto, akali okone lamo atu epeakale lewa. 18Bala atu epeai-angi, bala kosimi leaini akali tupamane ika loto, balato mana koo wete minditupa wua pua mineane lo bala kosimi lolopeyai nembo tewa tekeko, utupane-mane pii okonepene tupa naleai. Jia. 19Utupane-mane mee yakama tanena Gote lo bilipi lene mana tupana pii kambua leai. Poloto akali Jisasa lene mindi wamba omeane okone bala saka atolo-peke leane lea-kola, Juta yame akali tupamane jia loto, Polo towa pii yanda pua ateai. 20Utupane-mane pii okonepene tupana pii yanda pua ateai-kola, nambato utupanena kote anu pua lo tika puape lo tatake wato, Polo tipa puato, nimba Jutusaleme pole-kola, mindimane nimbana kote oko ale yakale, nimba polape lewa. 21Wuane lo tipa pewa-kola, Poloto namba languato, Lomo tane gapomane akali kawane Sisa okomane nambana kote oko ale yakale-ko. Namba mee katapusa anda okona atokale lea. Wuane lea andala, nambato bala Sisa ateyanga polane asini aiya pukale loto, bala katapusa anda okona mee ateakale lewa. 22Pesatasato wuane lo kiŋi Akitipa lamaiya-kola, Akitipato bala lamawuato, namba tane-mane akali okonena pii oko ale wakale leaipia. Wuane lea-kola, Pesatasato bala lamawuato, anati nimbato balana pii oko ale ola leaipia. 23Pesatasato wuane lea-kola, anate-lene kiŋi Akitipa-la, bala imalini Benisa-la, liyambana yati epene kambua tupa piyu, kiŋi tupa epalaini pua epeapelepia. Epoto, liyambapi, ami akali kawane tupapi, tano okone ando atalaini akali kawane tupapi, utupane towa atu wandakali amunguli piyaini panda okona kolandaka leai-kola, Pesatasato akali minditupa lamawuato, Polo epeakale, yakamato bala lamolo pulupa leaipia. 24Polo atu epeai-kola, Pesatasato wua leaipia: Kiŋi Akitipapi, nanima towa amunguli pua peteyama akali tupapi, yakama pitaka-mane akali oko andeyai okoni. Jutusaleme tano okonapi, walipi, Juta yame wandakali tupa pitaka-mane pii taimane namba languato, akali oko bala saka ata napeakale leai. 25Utupane-mane wuane leaini tekeko, nambato andewa-kola, bala peyo ome lolane tene mindi balanga ata napea. Wuane tekeko, bala tane-mane loto, gapomane akali kawane Sisato balana kote oko ale yakale lea andala, nambato bala Sisa ateyanga peakale lewa. 26- 27Akali okona kote lape-pene tene angini tupa pepa peyoto, pepa okone gapomane akali kawane Sisa balanga pee lape-pene guleya tekeko, nambato pii aki mindi loto, pepa peyo pee loape lo tatake eyo. Nambato katapusa akali okona kote lape-pene tene tupa pepa peya napene, bala kote ale alane akali mindinga mee kote lolo peakale lewando, nambana mana okone kee ene mana mindi gulolo-peya nembo teyo. Tene okonena, nanimato bala kuai lo tipa puato, balana pii oko wayumane ale amakale. Ale oloma-kola, nambato balana kote lolane tene tupa aiya pua moto, pepa peyoto, gapomane akali kawane Sisa balanga pee lokale. Wuane pukale nembo toto, nambato kiŋi Akitipa nimbapi, akali peteyai tupapi, yakama pitaka ipulupa lo amunguli puato, Polo bala yakamana wenonga atolo epeakale lalo. Pesatasato wuane leaipia.

will be added

X\