Aposolo 2

1Pendokosa oto oko epea-kola, Jisasa lo bilipi lene wandakali pitaka anda mindikina amunguli pua peteaini-pia. 2Anda okonena pituto ale yai-kola, popo andane mindi oo kulu lo epalane okonepene gulo mindi ati kenga atalu, oo kulu lama epoto, wandakali utupane peteaini anda okonena tumbi leaipia. 3Tumbi lea-kola, wandakali utupane-mane andeai-kola, utupanena mindiki-mindiki lo kawane tokonga ita lungu yale minditupa tala-tala epea-kola, andeaini-pia. 4Andeai-kola, okone angi tewa, Oli Sipitisa oko bala wandakali utupane pitakanga tumbi loto, utupane-mane wandakali yame waka tupana pii lalaini tupa mo laya yaepia. 5Wamba Gote lo lotu lene Juta yame wandakali minditupa yakama mindiki-mindiki lo yuu waka-waka yo peya tupa pitakana ateainipia. Matili utupanena minditupa-mane yakamana yuu tene tupa tepa aka piyu, Jutusaleme tano okona epo ateainipia. 6Popo mindi oo kulu lo epalane pua, Oli Sipitisa oko oo kulu lo epea-kola, Juta yame wandakali utupane-mane ale wato, anu peyape lo andolo epo amunguli peainipia. Epo amunguli puato, utupane-mane ale yai-kola, Jisasa lo bilipi lene wandakali tupamane Juta yame yuu waka-waka tane tupana pii waka-waka lalaini tupa laka peainga ale yainipia. Ale wato, utupane-mane moko loto, okone anu peyape loto, yakama nembo kambua teainipia. 7Nembo kambua toto, utupane-mane pii mindi tipa puato, pii lo ateyai wandakali utupane pitaka Galili disitiki tane angu jiape leainipia. 8Utupane Galili tane angu ateaindo, utupane-mane anu puato, nanimana pii waka-waka lalamane pua leyai-kola, nanimato ale eyamape. 9Nanima Patiya tanepi, Mitiya tanepi, Ilama tanepi, Mesopotemia tanepi, Jutiya tanepi, Kapatosia tanepi, Pondasa tanepi, Esia tanepi, yuu utupanena tane tupa pitaka epo ateyama. 10- 11Nanimana minditupa Pitinjia tanepi, Pambilia tanepi, Isipi tanepi, Saitini tano okona mandaka gulo yene Lipiya tanepi, yuu utupanena tane tupapi, pitaka epo ateyama teke. Dee, nanimana minditupa Lomo tane wandakali opene gulo Jutusaleme tano okona epoto ateyama. Dee, nanimana minditupa Kitita tanepi, Atepiya tanepi, nanima Juta yame enene tupapi, Juta yame gulo atalamane wandakali tupapi, nanima pitaka epo ateyama. Epo atoto, ale eyama-kola, nanima pitaka-mane pii waka-waka lalamane pua wandakali utupane-mane loto, Goteto piape andane peane tupana pii laluai-kola, nanimato ale eyama leainipia. 12Wuane lalu, utupane yakama pitaka tatakewa nembo kambua toto, yakama tane teke-teke mindi lamai-lamai puato, mangene oo peya okone aki peyape leainipia. 13Wandakali minditupa-mane wuane leaini tekeko, minditupa-mane meke puato, wandakali utupane yakama waene wenene kambua no sipaki lo atoto, pii waka-waka utupa leyai leainipia. 14Wandakali utupane-mane wuane leai-kola, Pita bala aposolo akali masia tupa towa atu atoto, pii taimane loto, Jutusaleme tanepi, Juta yame wandakali Jutusaleme tano okona epo ateyai tupapi, yakama pitaka-mane pii nambato leyo oko ale wato, mangene oo peya okona tene oko wayumane nembo talapape leaipia. 15Akali utupa-mane waene kambua noto, sapake lo pii waka-waka utupa leyai lo yakamato nembo teyai tekeko, andipa upa pitane naini kiloko angu leya-angi, nanima Juta yame-mane waene naa na-piyamane. Jia wete. 16Andipa wandakali utupanenga mangene mindi oo peya oko pulupeya nembo toto, wamba potopesa akali Joeleto pii mindi leaipia. 17Balato pii okone loto, yuu oko koyo puyale pula-angi, nambato nambana Oli Sipitisa oko wandakali yakama pitakanga gae lokale leaipia. Gae lolowa-angi, yakamana iwananepi, wananepi, utupane-mane potopesa wandakali gulo atoto, nambana pii layene oko lo pana olopeyai. Okone angi, yakamana iwana patane ateyai tupamane minditaka kombeya-mane andene gulo andolopeya. Dee, yakamana akali mini-yene tupamane kombeya pulupeyai. 18Okone angi, nambato nambana Oli Sipitisa oko nambana piape wandakali utupanenga gae lolowa-kola, utupane-mane potopesa wandakali gulo atoto, nambana pii layene oko lo pana olopeyai. 19Yuungapi, ati kengapi, okone-lapona nambato metekolo piape andane tupa puluwa-kola, tundupa epola okopi, ita lungu tola okopi, ita tua andane tupa pula okopi, utupane pitaka kokoli yale gulo yolopeya. 20Wuane pula-angi, nai oko undupi lola-kola, ana iyu teya oko tundupa pene gulola-kola, Akali Andane okona oto epene wete oko epolopeya. Okone angi, Akali Andane okomane balana tai-lene andane okola, tii-pene andane okola, okonelapo andawa lolopeya. 21Akali Andane okomane wuane pula-angi, wandakali minditupa-mane bala tee lamawuato, nimbato nanima moyape lolopeyai. Wuane lolai-kola, balato utupane pitaka molo-peke lola-kola, utupane kuai lo atolopeyai. Wamba potopesa akali Joeleto wuane lo pepa peyo yata yaepia. 22Isatale tane wandakali yakamato nambana pii oko ale alapape. Goteto Nasatesa tane Jisasa oko epeakale leane ya lo yakamato andalapale nembo toto, Jisasana kini okomane metekolo piape mindi-pene tupapi, kokoli mindi-pene tupapi, utupane peaipia. Jisasa bala yakama tombenenga atoto, piape utupane pea-kola, yakamato andeai okoni. 23Wamba wete Goteto akali Jisasa okone yakamana kininga gukale nembo toto, geaipia. Gea-kola, yakamato bala Gotena loo tanga lalaini akali tupana kininga maiyu, bala ita malamanda okona peyo yuka wato, ome leai. 24- 28Yakamato wuane peai-kola, Jisasa bala tandaka andane nalu omeane tekeko, matili Goteto bala malinga ika laya olopeya nembo toto, wamba Dapitito pii mindi leane oko loto, minditaka mindimane namba mo yuku olane loto, Gote bala nambana kii tikasa mandaka atalane leaipia. Ole dindi lo bala namba mandaka ateya-kola, nambato bala andalawane. Gote namba nimbana akali epene wetete ateyo-kola, nimbato nambana umbaini oko malinga paluto, tameakale lo ando konda napulupele. Dee, nambana tandini oko wandakali omene tupa atalaini yuu okona atapowa ateakale lo nimbato ando konda napulu-peleko. Namba yamapane epene wete palu, epele wete wato, pii lalawane. Nimbato namba moyolo-pele nembo toto, namba maliyo ateyo. Nimbato namba saka wete atapowa atolane asini oko namba andawa lee. Nimba namba towa atapowa atole okomane, nimbato namba mo epele wete piya olopele. Wamba Dapitito wuane lea-kola, wandakali omalaini mana okomane Jisasa katulo mina duli lo mina napeaipia. Tene okonena, Goteto bala malinga ika laya yaepia. 29Amene imalini ima, nanimana yumbane Dapitito wuane leane tekeko, matili bala omea-kola, wandakali-mane bala mali peaini lo nambato yakama tika pua langeyo. Wamba bala mali peaini oto okona ato, oto andipa ateyama okona giau loto, balana mali oko yuu nanima atalamane okona mee eya. 30- 31Tene okonena, Dapitito bala tane nembo toto, pii okone naleane nembo teyama. Bala potopesa akali mindi gulo atoto, matili Goteto Kataisa bala malinga ika laya olopeya nembo toto, Goteto Kataisana umbaini oko mali okona paluto, tameakale lo ando konda napulu-peya leaipia. Goteto balana tandini oko wandakali omene tupa paliyaini panda okona ateakale lo ando konda napulu-peya loto, balato pii okone wamba leaipia. Wamba Goteto potomisa pii mindi Dapiti lamawuato, enene wete, matili nambato nimbana mandiyene mindina mandiyene mindi bala nimba kiŋi atele okonepene teke ateakale lokale leaipia. Goteto potomisa pii leane okone Dapitito nembo toto, bala potopesa akali mindi gulo atoto, pii okone leaipia. 32Goteto akali Jisasa okone malinga ika laya ya-kola, aposolo akali nanima pitaka-mane bala andema. Andalu, nanimato minditaka andemane tupa wandakali tupanga lapanawa lamai-yamane. 33- 35Wamba Dapitito pii mindi leane oko loto, Akali Andane Goteto nambana Akali Andane oko pii mindi lamawuato, nambato nimbana yanda-pene tupa nimbana pangosa ateakale lokalenga, nimbato nambana kii tikasa epo atape leaipia. Balato wuane leane tekeko, Jisasa bala ati kenga peane wuane pua, Dapiti bala ati kenga napeaipia. Jia. Goteto Jisasana gene oko laiyu loto, bala ati kenga epeakale lo moto, balana kii tikasa ateakale leaipia. Wuane lalu, wamba Ayiane Gote okomane potomisa pii mindi loto, Oli Sipitisa oko mauwakale leane okone balato Jisasanga mayaepia. Maya-kola, andipa Jisasato Oli Sipitisa okone wandakali utupanenga gae lala-kola, utupane-mane pii waka-waka leyai-kola, yakamato ale wato, andeyai okoni. 36Tene okonena, Isatale tane wandakali yakama pitaka-mane wayumane wete wua lo nembo talapape: Yakamato ita malamanda okona peyo yuka yaini akali Jisasa okone Goteto bala Akali Andane Mesaya oko ateakale leane nembo talapape. Pitato wuane leaipia. 37Pitato pii leane okonemane wandakali utupanena yamapanenga wayumane andaka pea-kola, wandakali utupane-mane balapi, aposolo akali waka tupapi, utupane tipa puato, amene yame, nanima anu pimape leainipia. 38- 39Wuane leai-kola, Pitato utupane lamawuato, wamba nanimana Akali Andane Gote okomane yakamapi, yakamana andopane tupapi, yuu tepanda atalaini wandakali tupapi, wandakali balato ee lo mola utupane pitaka balana Oli Sipitisa oko gukale loto, potomisa pii mindi lo yata yaepia. Tene okonena, Goteto yakamana koo tupa apeakale loto, yakama wandakali mindiki-mindiki lo yamapane peke lalu, Jisasa Kataisana gene okona ipa mialapa. Ipa molai-kola, Goteto balana Oli Sipitisa oko yakama gukale leane okone yakamanga gulupeya leaipia. 40Wuane lalu, Pitato pii waka kambua minditupa tako pua utupane lamawuato, Goteto andipa yuu okona mana koo minu atalaini wandakali tupanga yole koo mindi maula-angi, balato yakamapi wandakali utupane towa yole koo mindi gulane. Waiwa ando atalapape leaipia. 41Pitato wuane lea-kola, balana pii epelewa ale yaini wandakali tupamane ipa meainipia. Okone angi wandakali tausene tepopi mindi ipa moto, Jisasa lo bilipi lene wandakali ateaini tupa towa epo tako peainipia. 42Kitisene wandakali utupane-mane kepawa konda naene, aposolo akali tupana pii ale wato, mindi moyaka pua ateainipia. Ole kambuanga wandakali utupane-mane ulia tomo tupa atu nalu, Jisasana tomo noto, pote leainipia. 43Wuane pua ateai-kola, Goteto aposolo akali tupana kininga metekolo piapepi, kokoli piapepi, kambua pea-kola, wandakali pitaka-mane andoto, yukuwa ateainipia. 44Okone angi, Jisasa lo bilipi lene wandakali utupane yakama pitaka yamapane mindiki palu atoto, yakamana minditaka yatawa ateaini tupa pitaka yakama pitakana gulo yatawa ateainipia. 45Utupane-mane yakamana yuupi, minditaka yaini tupa tale piyu, wandakali-mane minditupa kambeakale lo muni meainipia. Muni moto, yakamato wandakali minditaka jia yo ateaini tupa moyo, minditupa tale pua maiki peainipia. 46Ole dindi lo utupane yakama nembo mindiki palu atoto, lotu anda andane okona epo amunguli puato, lotu leainipia. Lotu lalu, yakama mindina andaka puku puato, ulia atu nalu, Jisasana tomo noto, gene yene eyama nembo natene, epelewa ateainipia. 47Ole dindi lo utupane-mane Gotena gene oko laiyu loto, lotu lo ateainipia. Wandakali pitaka-mane utupane towa yamapane epene paleai-kola, ole dindi lo Akali Andane okomane utupanena minditupa molo-peke loto, Jisasa lo bilipi lene wandakali ateaini tupa towa mo tako piki peaipia.

will be added

X\