Aposolo 19

1Apolosa bala Kotini tano okona atea-angi, Polo bala wangiane tupana asini epoto, Epesasa tano okona peakaiyu loto, Kitisene wandakali minditupa ongane ateainga andeaipia. 2Andoto, balato Kitisene utupane tipa puato, yakama wamba bulupane Jisasa lo bilipi leai-angi, yakamato Oli Sipitisa oko meaipe, nameaipe lea-kola, utupane-mane bala lamawuato, jia. Nanimato Oli Sipitisa mindi ateya lene oko ale naema leainipia. 3Wuane leai-kola, Poloto utupane tipa puato, wuane yando, yakamato ipa anu-pene mindi meaipe lea-kola, utupane-mane bala lamawuato, nanimato Jonena ipa oko memane leainipia. 4Wuane leai-kola, Poloto pii mindi loto, wamba ipa peya-maiyane akali Joneto wandakali tupa lamawuato, yakama yamapane peke loto, ipa mialapape. Moto, akali mindi matili namba watama epolopeya oko lo bilipi lalapape leaipia. Matili akali mindi epolopeya leane okone Jisasa andayo leaipia. 5Poloto wuane lea-kola, akali utupane-mane ale wato ipa mia-makale leainipia. Wuane leai-kola, Poloto Akali Andane Jisasana gene oko loto, akali utupane ipa peya-maiyaepia. 6Ipa peya maiyu, Poloto akali utupanena kawanenga kini yata ya-kola, Oli Sipitisa oko utupanenga epeaipia. Epea-kola, utupanena minditupa-mane Gotena pii oko leainipia. Minditupa-mane yame waka tupana pii lalaini tupa mo leaini tekepia. 7Alesa akalipi mindimane wuane peainipia. 8Okone angi, Polo bala yuku naene atoto, Juta yamena lotu anda okona kolandaka laka puato, utupane towa pii lalawa pua ateaipia. Ana tepo balato wuane pua atoto, Goteto wua puato, pitaka taka ando atalane loto, wandakali tupana nembo-tene mina ika lamawua ateaipia. 9Poloto wuane peane tekeko, wandakali minditupana nembo-tene oko ana yale gulea-kola, bilipi laa napeainipia. Utupane-mane wandakali waka tupana wenonga atoto, Akali Andane okona pii manapi, utupane ando pii koo leai-kola, Polo bala Jisasa lo bilipi lene wandakali tupa towa atu Juta yamena lotu anda oko tepa alu peainipia. Pulu, ole dindi lo bala utupane towa akali Titanasa lene mindina sukulu anda okona poto, pii mana lamawua ateaipia. 10Mali lapo Poloto wuane pua teke atea-kola, Juta yamepi, wandakali yame wakapi, Esia potopinjia okona wandakali ateaini tupa pitaka-mane Akali Andane okona pii oko ale yainipia. 11- 12Poloto muni mokale nembo toto, sele anda tupa pua ateane-angi, balana tona epene peane tupa kalato atolane nembo toto, tona epene peane utupane ombowa, lapalapa mindi kenga piki pua atalaepia. Ole dindi lo piape pikoyo piyu, balato lapalapa kenga piyane okone yoka yata aka piki peaipia. Alu mindi tupana, wandakali-mane balana lapalapa okone yandopi, balana angasipi mindi yandopi, okonetaka mindi mo awua poto, sipitisa koo atene wandakalipi, siki pelene wandakalipi, utupanena umbaininga yata aka piki peai-kola, Goteto metekolo piape tai-lene waka minditupa puato, utupanenga sipitisa koo ateaini tupa peyo wata alu, utupanena siki yane tupa mo atu yaka piki peaipia. 13Okone angi, Juta yamena akali minditupa epoko puato, Akali Andane Jisasana gene oko loto, sipitisa koo wandakali tupanga ateaini tupa peyo watamakale lo makande pua ateainipia. Akali utupanena mindiki-mindiki lo sipitisa koo tupa lamawuato, Poloto Gotena piape pua atoto, Jisasana gene lalane. Andipa nambato Jisasa okonena gene oko loto, yakamato wandakali utupa tepa alu puu leyo leainipia. 14Alu mindi Juta yamena pitisa akali kawane Sekepa lene okona iwanane yanasa tupamane pii okone sipitisa koo mindi lamai-yaepia. 15Lamai-yaikola, sipitisa koo okonemane iwanane utupane lamawuato, nambato Jisasa okone wayumane andeyawane. Dee, Polopi andeyawane tekeko, yakama api tupape leaipia. 16Wuane lalu, sipitisa koo atene akali okonemane akali utupane pitaka sia minuto, utupane taimane peyoto, minu koyaepia. Wuane puato, balato utupanena tona peaini tupa liti lo yoko apea-kola, akali utupane yakama tona napene, papata atoto, anda okone tepa alu, palaka peainipia. 17Wuane piya lene oko ale wato, Juta yamepi, yame waka tupapi, wandakali Epesasa tano okona ateaini tupa pitaka-mane yuku wato, Akali Andane Jisasana gene oko laiyu leainipia. 18Wuane puato, wandakali wamba Kitisene guleaini tupana kambua ipuku puato, yakamana mana koo wamba minalaini tupa wandakali yangone tupana wenonga lapana aka peainipia. 19Kitisene wandakali utupanena kambua-mane wamba kamo pua ateaini tekeko, utupane-mane yakamana kamo piyaini buku tupa mo amunguli puato, wandakali pitakana wenonga awua yangeaini-pia. Yangalu, buku yangeaini utupanena yole aki-tupi peape lo dii leai-kola, Lomo tane wandakali tupana muni silipa-mane waa-pene andane kambua longo (50,000) tausene paiyasa yau guleaipia. 20Mangene okonepene tupa peai-kola, Akali Andane okona pii okomane Kitisene wandakali tupa minu tai laya ya-kola, utupane-mane balana pii oko lo tawe yama peainipia. 21- 22Wandakali tupamane mangene utupane pitaka peai-kola, Poloto bala moyo piape piyapili akali Timoti, Etasatusa-la, okonelapo lamawuato, matili namba Jutusaleme pulu, Lomo tano okona pupe-pene tekeko, namba Masetonia, Akaya-la, potopinjia okone-lapona wamba ini pokale-ko. Liyamba Masetonia potopinjia okona wamba ingane pulupa leaipia. Wuane lalu, Polo bala ole minditupa tako pua, Esia potopinjia okona ateaipia. 23- 24Esia potopinjia okona atoto, Poloto Kataisana pii manapi wandakali tupa lamawua atea-kola, akali Dimiti-yasa lene mindimane yataka wato, kenda-pene andane mindi mina ika leaipia. Balapi, bala towa atu piape piyaini akali tupapi, utupane-mane owato gote Atemisa lene okona lotu anda aŋako wete tupa silipa-mane waa pua yaka piyainipia. Wuane peyai-kola, owato gote Atemisa lo lotu leaini wandakali tupamane bala nembo toyale, anda utupane muni andane-mane kamboto, yatawa ateainipia. 25- 27Alu mindi, Dimiti-yasato Polona pii ale alu, balana piape akali yangone tupapi, piape okonepene piyaini akali waka tupapi, utupane amunguli peakale leaipia. Amunguli peai-kola, balato utupane lamawuato, amene yame, wamba yuu yoo peya tupa pitakana wandakali tupamane gote wanda Atemisa oko lotu leaini leaipia. Wamba utupane-mane wuane peaini tekeko, andipa akali Polo lene okomane epoko puato, wandakalina kini-mane waa-pene gote tupa gote enene ata napeyai loto, wandakali kambua tupana nembo-tene mo lawa pimai-yane. Balato piape okone Epesasa tano okona angu napiyane. Jia. Balato Esia potopinjia yuu eya tupa pitakana epoko puato, piape okone piyane. Yakamato balana pii okone ale wato, balana mana okone lee-mane andapiai. Nanimato Atemisa okona lotu anda aŋako wete tupa silipa-mane waa puato, muni kambua mialamae pia oko yakamato nembo teyai. Poloto Atemisa okona gene andane oko minu koyando, wandakali tupamane Atemisa okona lotu anda oko mee ya nembo toto, balana lotu anda aŋako wete nanimato waa piyamane tupa kamba napulu-peyai leaipia. 28Dimiti-yasato wuane lea-kola, wandakali epo amunguli peaini tupamane pii okone ale alu, yataka wete wato, Epesasa tane tupana gote Atemisa oko bala gote andane wete mindi lo pii taimane laka peainipia. 29Wuane laka puato, utupane-mane Epesasa tano okona wandakali ateaini tupana nembo-tene minu kee amai-yaikola, utupane pitaka-mane pii laiyu nena pua ateainipia. Wuane pua atoto, wandakali utupane pitaka nembo mindiki paluto, Polo towa atu epoko pua atalapili Masetonia tane lapo akali Gayasa, Atitakusa-la, okonelapo minu kilau lo awua poto, wandakali amunguli pua pitiyaini panda okona taimane peainipia. 30Wuane peai-kola, Poloto pii mindi wandakali amunguli pua ateaini utupane lamauwakale nembo toto, utupanena tombenenga pokale leane tekeko, Kitisene wandakali tupamane bala napeakale lo, jia leainipia. 31Dee, Esia potopinjia okona akali kawane minditupa Polo towa yamapane yaini tupamane pii mindi wai loto, wandakali utupane amunguli pua peteyai panda ongane Polo nimba polene lo pii leyama nayu lo lamai-yainipia. 32Wandakali amunguli pua ateaini utupanena kambua-mane tene anu peakale amunguli pua ateyamape lo wayumane nembo natene atoto, tatakewa ateainipia. Tatakewa atoto, wandakali utupanena minditupa-mane pii mindi taimane leai-kola, wandakali minditupa-mane pii waka mindi loto, pii taimane leainipia. 33Pii taimane leai-kola, Juta yame-mane akali Aleke-sanda lene oko balato wandakali utupane pii mindi lamai-yakale nembo toto, bala wandakali utupanena wenonga ateakale lo minu pitu pima-pima peainipia. Wuane peainga andoto, wandakali waka minditupa-mane loto, balato kenda-pene okone mina ika lala ya leainipia. Wuane leai-kola, balato utupanena pii yano peyokale nembo toto, utupane-mane pii nalene mee alewa peteakale loto, kii momonga peaipia. 34Aleke-sandato wuane peane tekeko, wandakali waka tupamane akali okone bala Juta yame akali mindi ya lo andoto, utupane pitaka-mane pii mindiki taimane loto, Epesasa tane tupana gote Atemisa bala gote andane wete mindi laka peainipia. Pii mindiki okone teke taimane atutu lolo-peke laka pua ateai-kola, awa lapopi mindi peaipia. 35Awa lapopi mindi pea-kola, matili Epesasa tano okona gapomane akali kawane mindimane yakama pii nalene kondalapa lea-kola, utupane-mane pii nalene konda yainipia. Konda yai-kola, balato utupane tipa puato, ati kenga tawe ana kepele kulini gote wanda Atemisa yale mindi yuunga tepa yane okola, gote okonena lotu anda okola, okonelapo nanima Epesasa tane tupamane ando atalamane lo wandakali pitaka-mane andalaini jiape leaipia. 36- 37Wandakali mindikipi mindimane katulo nanimato owato pii leyama nalolo-peyako, yakama pii nalene kondalapa. Akali lapo yakamato minu kilau lo awua epalai okonelapo-mane nanimana gote wanda Atemisa oko ando pii koo mindi na-lapiapi. Dee, okonelapo-mane lotu anda mindina minditaka mindi pake mia napipiapi teke. Tene okonena, yakamato wamba ini wayumane nembo natene atoto, akali okone-laponga kenda-pene mindi kapoyale mai na-piyapape. 38Kote ale olane akali tupa atalu, kote ale olane gii tupa yalu peya-ko. Dimiti-yasapi, bala towa atu piape piyaini akali tupapi, utupane-mane kote loto, akali mindinga koo tene mindi yata amakale nembo teaindo, utupane-mane bala kote lolo peakale kondalapa. 39- 40Andipa tene mindi ata napiya-kola, nanima mee epo amunguli puato, pii taimane laiyu nena pua atalama. Wuane piyai lo Lomo tane gapomane akali andane tupamane ale yaindo, utupane-mane katulo nanima tipa puato, tene anu peakale yakama epo amunguli puato, pii taimane laiyu nena pua atalaipe lolopeya. Utupane-mane wuane leaindo, nanimato katulo pii mindi yano peya napuluma-kola, utupane-mane loto, yakamato nanima towa yanda mina ika loyale wuane piyai lo nanima kosimi lolopeyai. Tene okonena, yakamato pii waka mindi lo tika pimakale nembo teaindo, matili kanjole tupamane gapomane okona loo oko wato minuto, epo amunguli pulai-angi, utupane-mane yakamana pii okone lo tika peakale kondalapa leaipia. 41Wuane lalu, Epesasa tane gapomane akali kawane okomane wandakali amunguli pua ateaini tupa pitaka lamawuato, yakama puu toko lalapa leaipia.

will be added

X\