1 Kotini 13

1Wandakali yame waka tupana pii lolane tai-lene okola, enjole yame tupana pii lolane tai-lene okola, tai-lene okonelapo nambanga yando, okone epene tekeko, nambato wandakali tupa towa epelewa yamapane yo ata napewando, pii nambato lolowa okone mee beto pelene guleandopi, lawiyana pelene guleandopi, okonetaka gulola-kola, utupane katulo moya napulu-peyai. 2Nambato Gote lo bilipi leyo nayu loto, balato ati andane peleya tupa lopalu, yuu waka mindinga yata yakale lo pote leyo-kola, balato wuane piyae yando, okone epene tekeko, nambato wandakali tupa towa epelewa yamapane yo ata napewando, namba akali angini mindi jia. Nambato Gotena nembo-tene too pene tupa pitaka andoto, mana waka tupa pitaka andalawane yandopi, Gotena pii lamaulane tai-lene oko nambanga yandopi, okone epene tekeko, nambato mangene utupane pitaka pua atoto teke, wandakali tupa towa epelewa yamapane yo ata na-piyawane yando, namba akali angini mindi jia. 3Nambato wandakali tipia tupa moyoyale, nambana minditaka eya tupa pitaka tale puato, utupane maewando, nambana mana okone epene yolopeya. Anda mindi tola-angi, nambato anda okonena palulaini wandakali tupa taputi pua moyale makande puato, nambana umbaini teakale lo ando kondewando, nambana mana okone epene yolopeya teke. Mana okonelapo epene yolopeya tekeko, nambato wandakali tupa epelewa yamapane yo ata napene, mee tene waka mindi eya-kola, mangene okonelapo pewando, Goteto nambana mana okonelapo andoto, yole epene mindi namba gii napulu-peya. Jia. 4Nanimato wandakali waka tupa towa epelewa yamapane yo atemando, nanimato utupane towa wamba ini kepa naene, utupane towa mana epene tupa minu atape-pene. Nanimato utupane towa epelewa yamapane yo atemando, utupane towa apiangu napipe-pene. Jia. Nanimato utupane towa epelewa yamapane yo atemando, nanima tane wandakali epene wete ateyama nembo toto, nanima tanena gene tupa laiyu nalape-pene. Jia. 5Nanimato utupane epelewa yamapane yo atemando, nanima tane angu nembo toto, utupanenga mana koo tupa wato mina napipe-pene. Jia. Yangone tupamane nanimanga mana koo mindi mineaindo, nanimato utupane towa wamba ini kapoyale yataka wato, utupanena mana koo okone nembo tatawa atapowa ata napipe-pene. Jia. 6Nanimato wandakali waka tupa epelewa yamapane yo atemando, nanimato utupanena mana koo tupa nembo toto, epele aa napipe-pene. Jia. Utupane-mane enene pii leaindo, nanimato epele ape-pene. 7Yangone tupamane kenda-pene minditupa nanima geaindo, nanimato wandakali utupane towa epelewa yamapane yo atoto, kenda-pene utupane awua atape-pene. Goteto yangone utupanena mana okone mo tika pulupeya lo tungi peyoto, Goteto wuane peakale lo mali yoto, kenda-pene utupane pitaka mee awua, tailo atape-pene. 8- 12Andopane aŋako tupamane mana kambua anda na-piyaini pua teke, wamba namba andopane aŋako atoto, mana kambua anda napene, andopane-mane nembo talaini pua nembo toto, utupane-mane pii lalaini pua lewa. Andipa namba anda yalu, akali mini-yene atoto, andopanena mana utupane tepa wato, akali mini-yene tupamane nembo talaini pua nembo toto, utupane-mane pii lalaini pua lalawane. Galasa mindi kalato atene yando, nanimato nanimana lee-inga kuai lo anda na-piyamane pua teke, andipa nanimato Gotena pii mana tupa pitaka kuai lo anda napene, mee anda-geta eyama. Nanimato utupanena minditupa mee anda-geta wato, minditupa lamai-geta eyama tekeko, Akali Andane oko bala lapone epola-angi, nanimato balana lee-inga andoto, Goteto nanima wayumane andalane pua teke, nanimato bala wayumane andolo-peyama. Bala epola-kola, nanimato bala wayumane wetete andoloma okone angi, balana pii mana anda-geta wato, lamai-geta alamane mana okone koyo pulupeya. Balana pii mana anda-geta wato, lamai-geta alamane mana okonelapo koyo pula-angi, yame waka mindina pii lalaini oko mo lalamane mana oko koyo pulupeya tekeko, wandakali yangone epelewa yamapane yo atalamane mana oko koyo napulu-peya. Jia. 13Wuaneko, andipa nanimato wandakali yangone epelewa yamapane yo atalamane mana okopi, Kataisato nanima molo-peke lolopeya lo bilipi lalamane mana okopi, Goteto nanima moyo atolopeya lo tungi peyalamane mana okopi, mana tepo utupane pitaka mineyama tekeko, nanimato wandakali yangone epelewa yamapane yo atalamane mana okonemane mana waka tupa pitaka sia minuto, mana epene wetete mindi eya.

will be added

X\