MARCOS 14

1Dua pay nga aldaw, dumtengen ti Paskua ken ti Fiesta ti Tinapay nga awan Lebadurana. Agsapsapul dagiti panguloen a papadi ken mamaestro iti Linteg iti nalimed a panangtiliw ken panangpapatayda ken ni Jesus. 2“Ditay iranrana iti fiesta, amangan no rumsua ti riribuk,” kinunada. 3Adda idi ni Jesus idiay Betania iti balay ni Simon nga agkukutel. Idi madama a mangmangan, dimteng ti maysa a babai a nakaiggem iti sangabotelia a nardo, maysa a nangina a bangbanglo. Binuongna ti botelia sana imbukbok ti bangbanglo iti ulo ni Jesus. 4Nakapungtot ti sumagmamano a tattao nga adda sadiay ket kinunada iti maysa ken maysa, “Apay a sinayangna ti bangbanglo? 5Nailako koma iti nasurok a tallogasut a denario a maited kadagiti napanglaw.” Kasta unay ti panangbabalawda iti babai, 6ngem kinuna ni Jesus, “Baybay-anyo! Apay a babalawenyo? Nasayaat unay ti impaayna kaniak. 7Kankanayon nga adda dagiti napanglaw iti dennayo, ket uray ania a kanito matulonganyo ida. Ngem saan a kankanayon nga addaak iti arpadyo. 8Inaramidna ti kabaelanna. Sinapsapoannan toy bagik a maisagana iti pannakaitanem. 9Kinapudnona, kunak kadakayo: Sadinoman iti entero a lubong a pakaikaskasabaanto ti Naimbag a Damag, masarsaritanto ti inaramid daytoy a babai a pakalaglagipan kenkuana.” 10Maysa ni Judas Iscariote kadagiti sangapulo ket dua nga adalan. Napan kadagiti panguloen a papadi tapno makitulag a yawatna ni Jesus kadakuada. 11Naragsakanda a nakangngeg iti imbagana, ket inkarida nga ikkan iti kuarta. Isut’ gapuna a binirbiroken ni Judas ti gundawayna a mangliput ken ni Jesus. 12Umuna idi nga aldaw ti Fiesta ti Tinapay nga awan Lebadurana ket maidaton dagiti urbon a karnero nga agpaay iti Paskua. Sinaludsod dagiti adalan ni Jesus, “Sadino ti kayatmo a pangisaganaanmi iti pangrabiim iti Paskua?” 13Imbaon ni Jesus ti dua kadagiti adalanna. Kinunana, “Inkayo idiay siudad ket masabatyonto ti maysa a tao a nakaawit iti sangakaramba a danum. 14Surotenyo iti balay a serkanna ket kunaenyonto iti akimbalay: ‘Kuna ti Maestro, Sadino ti kuarto a pangananminto kadagiti adalan iti pangrabii ti Paskua?’ 15Ipakitananto kadakayo ti maysa a nalawa a kuarto nga akingngato, naisagana ken addaan kadagiti masapsapul. Sadiay ti pangisaganaanyo iti pangrabiitayo.” 16Pimmanaw dagiti adalanna. Napanda iti siudad ket nasarakanda amin kas imbaga ni Jesus ket insaganada ti pangrabii a pangrambak iti Paskua. 17Idi rumabiin, dimteng sadiay ni Jesus ken dagiti sangapulo ket dua nga adalanna. 18Kabayatan ti pannanganda, kinuna ni Jesus, “Ibagak kadakayo ti pudno: maysa kadakayo a makilanglanglang kaniak ita ti mangliputto kaniak.” 19Nagliday dagiti adalanna ket maysa-maysa ti nagsaludsod kenkuana, “Siak kadi dayta kunkunam?” 20Insungbat ni Jesus, “Maysa kadakayo a sangapulo ket dua a makisawsawsaw kaniak iti tinapay iti malukongko. 21Matayto ti Anak ti Tao kas naisurat maipapan kenkuana, ngem kaasinto pay ti mangliput iti Anak ti Tao. Naim-imbag pay koma a saan a nayan-anak dayta a tao!” 22Idi mangmanganda, nangala ni Jesus iti tinapay ket kalpasan ti panagyamanna iti Dios, pinisina sana inted kadagiti adalanna. “Alaenyo ket kanenyo. Daytoy ti bagik,” kinunana. 23Nangala ni Jesus iti kopa, nagyaman iti Dios sana inyawat kadakuada, ket imminumda amin. 24Kinunana kadakuada: “Daytoy ti darak a mamatalged iti tulag ti Dios, ti darak a maiparukpok nga agpaay iti adu a tattao. 25Kinapudnona, kunak kadakayo, diakto uminumen iti arak ti ubas agingga iti dayta nga aldaw nga uminumak iti baro a tubbog ti ubas iti Pagarian ti Dios.” 26Kalpasanna, nagkantada iti maysa nga himno sada rimmuar a napan idiay Bantay Olivo. 27Kinuna ni Jesus kadakuada: “Dakay amin panawandakto ta kuna ti Nasantoan a Surat, ‘Patayento ti Dios ti agpaspastor ket mawarawaranto dagiti karnero.’ 28Ngem kalpasan ti pannakapagungarko, umun-unaakto ngem dakayo a mapan idiay Galilea.” 29“Uray pumanawdanto amin,” insungbat ni Pedro, “dikanto panawan.” 30Kinuna ni Jesus kenkuana, “Laglagipem daytoy: Sakbay ti maikadua a panagtaraok ti kawitan iti daytoy a rabii, namitlonton nga imbagam a dinak am-ammo.” 31“Uray no matayak a mairaman kenka,” sipapasnek nga insungbat ni Pedro, “pulos a dikanto paglikudan.” Kasta met ti kinuna dagiti dadduma nga adalan. 32Dimteng ni Jesus ken dagiti adalanna iti maysa a disso a managan Getsemani. Kinunana kadakuada, “Agtugawkayo ditoy bayat ti panagkararagko.” 33Inkuyogna da Pedro, Santiago ken Juan. Nagdanag ken nariribukan. 34“Arigna a matayak gapu iti nakaro a ladingit,” kinunana kadakuada. “Agbatikayo ditoy ket agbantaykayo.” 35Immadayo bassit sa nagpakleb iti daga, ket inkararagna a no mabalin koma maliklikanna dayta nga oras ti panagsagaba. 36“Ama,” indawatna, “Ama, no mabalin koma, ilisinak iti daytoy kopa ti panagsagaba. Ngem saan a ti pagayatak ti maaramid, no di ket ti pagayatam.” 37Idi agsubli ni Jesus, nadanonna a matmaturog dagiti tallo nga adalan. “Simon,” kinunana ken ni Pedro, “matmaturogka kadi? Dika aya makapagpuyat iti maysa nga oras?” 38Kinunana kadakuada: “Agpuot ken agkararagkayo tapno saankayo a matnag iti sulisog. Natudio ti espiritu, ngem nakapuy ti lasag.” 39Immadayo manen ni Jesus ket nagkararag. Inulitna ti dawatna. 40Nagsubli manen kadagiti adalan ket nadanonna ida a nakaturog, ta makaturturogda la unay. Dida ammo no ania ti ibagada kenkuana. 41Idi kapamitlo ni Jesus ti agsubli, kinunana kadakuada: “Ania? Matmaturog ken agin-inanakayo pay laeng? Husto daytan! Dimtengen ti oras! Kitaenyo, mayawaten ti Anak ti Tao kadagiti managbasol. 42Bumangonkayo ta intayon. Kitaenyo, adtoyen ti mangliput kaniak!” 43Agsasao pay laeng ni Jesus idi sumangpet ni Judas, maysa kadagiti sangapulo ket dua nga adalan. Kimmuyog kenkuana dagiti adu a tattao a nagtagikampilan ken nagtagipang-or. Imbaon ida dagiti panguloen a papadi, dagiti mamaestro iti Linteg, ken dagiti panglakayen. 44Sakbay ti ipapanda, inted ti mangliput daytoy a pagilasinan kadagiti kimmuyog kenkuana: “Daydiay agekak isu ti sapsapulenyo. Tiliwen ken ipanawyo ket guardiaanyo a naimbag.” 45Immasideg a dagus ni Judas ken ni Jesus. “Maestro!” kinunana sana inagkan iti namin-adu. 46Tiniliwda ni Jesus ket tinengngelda a nalaing. 47Ngem inasut ti maysa kadagiti agtaktakder sadiay ti bunengna sana tinagbat ti adipen ti Kangatoan a Padi ket napingasan ti lapayagna. 48Nagsao ni Jesus ket kinunana kadakuada, “Tulisanak aya, ta nagtagikampilan ken nagtagipang-orkayo nga umay mangtiliw kaniak? 49Inaldaw a nakipulpulapolak kadakayo ken nangisursuroak idiay Templo ket didak tiniliw. Ngem masapul a matungpal ti Nasantoan a Surat.” 50Nagtataray amin dagiti adalan ket binaybay-anda ni Jesus. 51Sumursurot ken ni Jesus ti maysa nga agtutubo a lalaki a nakakagay laeng iti linen a lupot. Tiniliwda, 52ngem nakalapsut iti kagayna ket timmaray a lamolamo. 53Impanda ni Jesus iti balay ti Kangatoan a Padi a naguurnongan dagiti panguloen a papadi, dagiti panglakayen ken dagiti mamaestro iti Linteg. 54Simmurot ni Pedro nga adda a sumarsaruno iti adayo. Simrek iti paraangan ti balay ti Kangatoan a Padi ket sadiay, nakitugaw kadagiti guardia ken nakiinudo. 55Nagbirbirok dagiti panguloen a papadi ken ti entero a Sanhedrin kadagiti pammaneknek a maibusor ken ni Jesus tapno papapatayda, ngem awan ti nasarakanda. 56Adu ti nagsao iti ulbod a maikontra kenkuana ngem saan a nagtutunos dagiti pammaneknekda. 57Timmakder ti sumagmamano a lallaki ket kastoy ti ulbod a pammaneknek nga imbagada: 58“Nangngegmi nga insaona, ‘Rebbaekto daytoy a Templo a binangon dagiti tattao, ket iti uneg ti tallo nga aldaw mangbangonakto iti sabali a saan nga aramid ti tao.’” 59Uray isuda kaskasdi a saan a nagtutunos dagiti pammaneknekda. 60Timmakder ti Kangatoan a Padi iti sangoananda. “Awan aya ti maisungbatmo kadagiti ipabpabasol dagitoy a tattao?” sinaludsodna ken ni Jesus. 61Ngem nagulimek ni Jesus ket saan a simmungbat. “Sika kadi ti Cristo nga Anak ti Nasantoan a Dios?” sinaludsod manen ti Kangatoan a Padi. 62“Wen, siak!” insungbat ni Jesus. “Makitayonto ti Anak ti Tao a situtugaw iti makannawan ti Mannakabalin-amin. Makitayonto nga umay kadagiti ulep ti langit.” 63Rinay-ab ti Kangatoan a Padi ti kagayna. “Ania pay la ti pakasapulantayo kadagiti saksi?” kinunana. 64“Nangngegyon dagiti saona a maikaniwas iti Dios. Ania ti pangngeddengyo?” Sangsangkamaysa ti pangngeddengda: nakabasol ni Jesus ket masapul a mapapatay. 65Sumagmamano kadakuada ti nangtupratupra ken ni Jesus ket inabbonganda ti rupana sada dinanogdanog. “Pugtoam man no siasino ti nangdisnog kenka?” kinunada. Kalpasanna, innala dagiti guardia sada ginagara iti tungpa. 66Adda pay la ni Pedro iti paraangan idi umasideg ti maysa a babai nga adipen ti Kangatoan a Padi. 67Idi makitana ni Pedro nga agin-inudo, miningminganna sana kinuna, “Uray sika, nakikadkaduaka met ken ni Jesus a taga-Nazaret.” 68“Diak ammo ken diak maawatan ti ibagbagam,” inlibak ni Pedro. Ket rimmuar a nagturong iti ruangan. Apag-isu met a nagtaraok ti maysa a kawitan. 69Nakita manen sadiay ti babai nga adipen ket inulitna kadagiti adda sadiay, “Maysa kadakuada daytoy a lalaki!” 70Ngem naglibak manen ni Pedro. Iti saan a mabayag, kinuna met kenkuana dagiti adda sadiay, “Saanmo a mailibak a maysaka kadakuada, ta taga-Galileaka met.” 71“Uray dusaennak ti Dios no saan a pudno ti ibagbagak!” insapata ni Pedro. “Diak am-ammo dayta tao nga ibagbagayo!” 72Pagammoan, nagtaraok manen ti kawitan ket nalagip ni Pedro ti kinuna ni Jesus kenkuana: “Sakbay ti maikadua a panagtaraok ti kawitan, namitlonton nga imbagam a dinak am-ammo.” Ket naganug-og gapu iti ladingitna.

will be added

X\