LUCAS 7

1Napan ni Jesus idiay Capernaum apaman a nasaona amin dagitoy kadagiti tattao. 2Adda sadiay ti maysa a kapitan dagiti soldado ti Roma. Masakit ti patpatgenna unay nga adipen ket dandanin matay. 3Idi madamag ti kapitan ti maipapan ken ni Jesus, imbaonna ti sumagmamano a panglakayen a Judio tapno dawatenda kenkuana nga umayna agasan ti adipenna. 4Napanda ken ni Jesus ket nagpakpakaasida kenkuana. “Pudno a maikari daytoy a tao iti tulongmo,” kinunada, 5“ta ay-ayatenna dagiti tattaomi ket imbangonannakami pay iti sinagoga.” 6Kimmuyog ni Jesus kadakuada. Idi asidegen ni Jesus iti balay, nangibaon ti kapitan kadagiti gagayyemna tapno ibagada daytoy kenkuana: “Apo, dika la agbambannogen ta diak maikari nga umawat kenka iti balayko. 7Ipapanko pay a diak maikari nga umay kenka iti personal. Agbilinka laeng ket umimbagto ti adipenko. 8Uray siak, adda dagiti ofisiales a mangituray kaniak ket adda met soldado nga iturayak. ‘Inka,’ kunak iti maysa ket mapan. ‘Umayka,’ kunak iti sabali ket umay. ‘Aramidem daytoy,’ kunak iti adipenko ket aramidenna.” 9Nasdaaw ni Jesus a nakangngeg iti daytoy. Sinangona dagiti adu a sumursurot kenkuana sana kinuna: “Ibagak kadakayo a diak pay nakakita iti kastoy a pammati, uray iti entero nga Israel!” 10Nagsubli dagiti naibaon iti balay ti kapitan ket nasangpetanda nga immimbagen ti adipen. 11Iti saan a nabayag, napan ni Jesus iti maysa nga ili a managan Nain. Kimmuyog kenkuana dagiti adalanna ken adu a tattao. 12Idi makaasideg iti ruangan ti ili, apag-isu met a rummuar dagiti tattao iti maysa a pamumpon. Ti natay isu ti bugbugtong nga anak a lalaki ti maysa a balo a babai. Kimmuyog kenkuana ti adu a tattao a taga-siudad. 13Naasian ti Apo idi makitana ti ina. “Dika agsangsangit,” kinunana kenkuana. 14Immasideg ni Jesus ket sinagidna ti lungon. Nagsardeng dagiti mangbakbaklay iti lungon. Kinuna ni Jesus, “Barok, bumangonka!” 15Nagtugaw daydi natay ket nagsao. Inyawat ni Jesus ken ni inana. 16Nagbuteng dagiti amin a tattao ket indaydayawda ti Dios. “Nagparang kadatayo ti maysa a naindaklan a profeta!” kinunkunada. “Immay ti Dios a mangisalakan kadagiti tattaona!” 17Nagwaras daytoy a damag maipapan ken ni Jesus iti entero a Judea ken kadagiti kabangibang a luglugar. 18Naammoan ni Juan kadagiti adalanna ti amin maipapan kadagitoy ket inayabanna ti dua kadakuada. 19Imbaon ni Juan ida iti Apo tapno saludsodenda daytoy, “Sika kadi ti umay a kuna ni Juan, wenno aguraykami pay iti sabali?” 20Idi makadanonda ken ni Jesus, kinunada, “Imbaonnakami ni Juan a Mammuniag tapno saludsodenmi kenka no sika ti kunana nga umay, wenno aguraykami pay iti sabali?” 21Iti dayta nga oras, adu dagiti tattao a pinaimbag ni Jesus kadagiti saksakit ken an-anayenda. Pinaksiatna dagiti dakes nga espiritu. Inagasanna ti adu a bulsek ket nakakitada. 22Kinuna ni Jesus kadagiti imbaon ni Juan, “Agsublikayo ken ni Juan ket ibagayo kenkuana dagiti nakita ken nangngegyo: makakita dagiti bulsek, makapagna dagiti pilay, mapaimbag dagiti agkukutel, makangngeg dagiti tuleng, mapagungar dagiti natay ken maikaskasaba ti Naimbag a Damag kadagiti napanglaw. 23Nagasat ti tao a di agduadua kaniak!” 24Idi nakapanawen dagiti binaon ni Juan, kinuna ni Jesus kadagiti tattao maipapan ken ni Juan: “Idi mapankayo ken ni Juan idiay let-ang, ania ti ninamnamayo a makita? Maysa a runo a gargarawen ti angin? 25Ania ti napanyo kinita? Maysa a tao a nagkawes iti napintas a pagan-anay? Kinapudnona, palasio ti pagnaedan dagiti agkawes iti kasta ken agbiag a sibubuslon! 26Ibagayo man kaniak no ania ti napanyo kinita? Maysa a profeta? Wen, ket ibagak kadakayo a nangnangruna pay ngem profeta ti nakitayo. 27Ta ni Juan ti pakaiturongan ti kuna ti Nasantoan a Surat: ‘Adtoy ti babaonek,’ kuna ti Dios; ‘ibaonko nga umun-una ngem sika tapno isaganana ti dalanmo.’ 28Ibagak kadakayo a kadagiti amin a nayanak, awan nangnangruna ngem ni Juan. Nupay kasta, natantan-ok ngem isu ti kanumoan iti Pagarian ti Dios.” 29Dimngeg kenkuana dagiti amin a tattao ken dagiti agsingsingir iti buis. Nagdaydayawda iti Dios, gapu ta inawatda ti panangbuniag kadakuada ni Juan. 30Ngem inumsi dagiti Fariseo ken mamaestro iti Linteg ti panggep ti Dios kadakuada ket dida kinayat ti pabuniagan ken ni Juan. 31“Ania ti pangipadaak kadagiti tattao kadagitoy nga aldaw?” intuloy ni Jesus. “Ania ti pakayaspinganda? 32Kasda la kadagiti ubbing nga agtutugaw iti tiendaan. Ipukkaw ti maysa a grupo kadagiti kaay-ayamda, ‘Nagtokarkami iti naragsak, ngem dikay nagsala. Nagkantakam iti naliday, ngem dikayo nagladingit!’ 33Immay ni Juan a Mammuniag, nagayunar ken di imminum iti arak, ket kinunayo: ‘Linuganan ti demonio!’ 34Immay ti Anak ti Tao. Nangnangan ken immin-inum ket kinunayo: ‘Kitaenyo daytoy a tao! Narawet ken mammartek. Gayyem dagiti agsingsingir iti buis ken dadduma pay a dakes a tattao!’ 35Nupay kasta, maipakita a pudno ti sirib ti Dios babaen kadagiti aramid dagiti annakna.” 36Maysa a Fariseo ti nangawis ken ni Jesus a makipangan kenkuana. Napan ni Jesus iti balay ti Fariseo ket simmango iti panganan. 37Iti dayta nga ili, adda babai a dakes unay ti panagbiagna. Idi nadamagna a mangmangan ni Jesus iti balay ti Fariseo, napan met sadiay ket nangitugot iti sangafraskita a bangbanglo. 38Nagtakder nga agsangsangit iti likudan ni Jesus. Nagtedted dagiti luana kadagiti saka ni Jesus, ket pinunasanna ida iti buokna. Inagkanna dagiti saka ni Jesus sana binukbokan iti bangbanglo. 39Idi makita daytoy ti Fariseo a nangawis ken Jesus, kinunana iti nakemna: “No pudno a profeta daytoy a tao, ammona koma no siasino daytoy a babai a mangsagsagid kenkuana. Ammona koma ti kadakes ti panagbiagna!” 40“Simon,” kinuna ni Jesus iti Fariseo, “adda ibagak kenka.” “Ania dayta, Maestro?” insungbat ni Simon. 41“Adda dua a tao nga immutang iti kuarta,” inrugi ni Jesus. “Ti maysa, immutang iti 500 a denario, ti maikadua, limapulo. 42Agsipud ta dida makabayad, pinakawan ida ti immutanganda. Siasinonto kadagitoy ti dakdakkel ti panagayatna iti nagpautang?” 43Insungbat ni Simon, “Pagarupek a ti tao nga ad-adu ti napakawan nga utangna.” “Pudno ta kunam,” kinuna ni Jesus. 44Tinaliawna ti babai, sana kinuna ken Simon: “Makitam daytoy a babai? Simrekak iti balaymo ket dinak inikkan iti danum a pangbuggok kadagiti sakak, ngem binuggoan daytoy a babai dagiti sakak iti luana ken pinunasanna ida iti buokna. 45Sika, dinak sinabat iti agek. Ngem manipud itay simmangpetak, di pay nagsardeng a mangag-agep kadagiti saksakak. 46Sika, dimo linanaan ti ulok, ngem isu, dinigosna dagiti sakak iti bangbanglo. 47Ngarud, ibagak kenka, gapu iti dakkel a panagayat nga impakitana, napakawanen dagiti adu a basbasolna. Ngem ti tao a bassit ti mapakawan kenkuana, bassit met ti panagayatna.” 48Kinuna ni Jesus iti babai, “Napakawanen dagiti basbasolmo.” 49“Siasino daytoy a tao a mamakawan uray pay kadagiti basbasol?” kinuna iti nakem dagiti dadduma a sisasango iti panganan. 50Ngem kinuna ni Jesus iti babai, “Insalakannaka ti pammatim. Agawidkan a sitatalna.”

will be added

X\