1 Timmakder dagiti amin a kamkameng ti Sanhedrin ket impanda ni Jesus ken ni Pilato. 2 Rinugianda ti nagiparang kadagiti pammabasolda kenkuana. “Natiliwanmi daytoy a tao a mangal-allilaw kadagiti kailianmi,” kinunada. “Iparparitna ti panagbayad iti buis iti Emperador. Kunkunana pay nga isu ti Cristo a maysa nga ari.” 3 “Sika kadi ti Ari dagiti Judio?” sinaludsod ni Pilato. “Nasaomon,” insungbat ni Jesus. 4 Ket kinuna ni Pilato kadagiti panguloen a papadi ken kadagiti tattao, “Awan masarakak a pakaigapuan iti pannakadusa daytoy a tao.” 5 Ngem inyad-addada ti nagkuna: “Babaen iti pannursurona, sugsoganna dagiti tattao a mangriribuk iti entero a Judea. Inrugina idiay Galilea, ket adda ditoyen.” 6 “Taga-Galilea kadi daytoy a tao?” sinaludsod ni Pilato idi mangngegna daytoy. 7 Ket naammoanna a naggapu ni Jesus iti lugar nga iturayan ni Herodes. Imbaonna ngarud ken ni Herodes nga adda idi idiay Jerusalem. 8 Nabayagen a kayat ni Herodes a makitana ni Jesus. Maragsakan unay idi maidatag kenkuana ta nadamdamagnan ti maipapan kenkuana ket ninamnamana ti makakita iti milagro nga iparang ni Jesus. 9 Adu ti sinaludsod ni Herodes, ngem pulos a saan a simmungbat ni Jesus. 10 Adda a nakatakder sadiay dagiti panguloen a papadi ken mamaestro iti Linteg ket indatagda dagiti agkakadagsen a pammabasolda ken ni Jesus. 11 Pinagang-angawan ken linalais ni Herodes ken dagiti soldado. Kinawesanda ni Jesus iti narangrang a lupot sada pinaisubli ken ni Pilato. 12 Manipud iti dayta nga aldaw, aggayyemen da Herodes ken ni Pilato, numan pay aggin-ginnurada idi. 13 Pinaayaban ni Pilato dagiti panguloen a papadi, dagiti agtuturay ken dagiti tattao. 14 Kinunana kadakuada, “Insaklangyo kaniak daytoy a tao ket imbagayo nga al-allilawenna dagiti tattao. Inusigko iti imatangyo ket awan nasarakak nga inaramidna kadagiti ipabpabasolyo kenkuana. 15 Uray ni Herodes, awan nasarakanna, isut’ gapuna a pinaisublina kadatayo. Awan naaramid daytoy a tao a pakaigapuan ti pannakapapatayna. 16 Ngarud, pasaplitko laeng sakonto palubosan.” 18 Ngem sangsangkamaysa dagiti tattao a nangipukkaw, “Papapataymo! Ni Barrabas ti kayatmi a wayawayaam!” ( 19 Naibalud ni Barrabas gapu iti riribuk a naaramid iti siudad, ken gapu ta pimmatay.) 20 Kayat ni Pilato a wayawayaan ni Jesus, isut’ gapuna a kinasaona manen dagiti tattao. 21 Ngem impukkawda, “Pailansam iti krus! Pailansam iti krus!” 22 Pinitlo ni Pilato ti nagkuna kadakuada, “Ania kadi ti basolna? Awan nasarakak nga inaramidna a pakaigapuan ti pannakapapatayna. Pasaplitko laeng sakonto palubosan.” 23 Ngem inyad-adda dagiti tattao ti nangyikkis a mailansa ni Jesus iti krus ket iti kamaudianna, naipangag ti dawatda. 24 Inkeddeng ni Pilato ti sentensia, kas kiddawda. 25 Winayawayaanna ti lalaki a kayatda, ti naibalud gapu iti riribuk ken pammapatay, ket inyawatna ni Jesus kadakuada tapno aramidenda ti kaykayatda. 26 Impanaw dagiti soldado ni Jesus. Iti dalan, nasabetda ti maysa a lalaki nga agnagan Simon a taga-Cirene a naggapu iti away, ket agturong iti siudad. Tiniliwda ket impabaklayda kenkuana ti krus sada impasaruno ken ni Jesus. 27 Adu a tattao ti simmurot ken ni Jesus. Sumagmamano kadakuada ti babbai. Sangsangitan ken dungdung-awanda ni Jesus. 28 Tinaliawna ida ket kinunana, “Babbai a taga-Jerusalem, didak sangsangitan! Dagiti bagbagiyo ken dagiti annakyo ketdi ti sangitanyo! 29 Ta umasidegen dagiti aldaw a panagkunanto dagiti tat-tao, ‘Nagasat dagiti babbai a di nagan-anak, di nagsikog ken di nagpasuso!’ 30 Daytanto ti tiempo a panagkuna dagiti tattao kadagiti bambantay, ‘Tupakandakami!’ ken kadagiti turturod, ‘Gaburandakami!’ 31 No kastoy ti maaramid no naata ti kayo, anianto ketdin no nagango?” 32 Adda dua a kriminal nga inkuyogda a mapapatay met a kagiddan ken ni Jesus. 33 Idi dimtengda iti lugar a managan “Bangabanga,” inlansada ni Jesus iti krus. Inlansada met dagiti dua a kriminal, maysa iti makannawan ket ti sabali iti makannigid ni Jesus. 34 “Ama,” kinuna ni Jesus, “pakawanem ida ta dida ammo ti ar-aramidenda.” Nagbibingayan dagiti soldado dagiti pagan-anay ni Jesus babaen iti panagbibinnunotda. 35 Nagtatakder sadiay dagiti tattao nga agbuybuya idinto a linalais dagiti panguloen a Judio a kunkunada, “Insalakanna dagiti dadduma. Isalakanna man ngarud ti bagina no isu ti Cristo a pinili ti Dios!” 36 Linalais met dagiti soldado. Immasidegda ken ni Jesus sada inyawatan iti suka. 37 “Isalakanmo ta bagim, no sika ti Ari dagiti Judio!” kinunada. 38 Adda kastoy a naisurat iti ngatoen ni Jesus: “Daytoy ti Ari dagiti Judio.” 39 Pinabpabainan ti maysa kadagiti kriminal a nailansa. “Saan kadi a sika ti Cristo?” kinunana. “Isalakanmo ngarud ta bagim ket isalakannakami met!” 40 Ngem binabalaw ti kaduana a kriminal. “Dika aya agbuteng iti Dios?” kinunana. “Agpapadatayo amin a madusdusa. 41 Rebbengna nga agsagabata gapu iti inaramidta. Ngem daytoy a tao, awan dakes nga inaramidna.” 42 Ket kinunana ken ni Jesus, “Laglagipennak, Jesus, inton mapanka iti pagariam.” 43 Kinuna ni Jesus kenkuana, “Ibagak kenka daytoy: Ita nga aldaw, makipagyankanto kaniak idiay Paraiso.” 44 Dandani tengnga ti aldaw idi agsipnget iti entero a daga ket nagpaut agingga iti alas tres iti malem. 45 Napigis a naggudua ti kurtina a naibengbeng iti Templo. 46 Nagpukkaw ni Jesus iti napigsa: “Ama, kadagita imam yawatko ti espirituk!” Apaman a nasaona daytoy, nauyosen ti biagna. 47 Idi makita ti kapitan dagiti soldado ti napasamak, nagdaydayaw iti Dios. “Pudno nga awan basol daytoy a tao!” kinunana. 48 Nakita dagiti tattao a napan nagbuya ti napasamak ket nagawidda amin a mangdandanog iti barukongda a mangipakita iti panagladingitda. 49 Iti adayo bassit, nakatakder dagiti amin a gagayyem ni Jesus ken dagiti babbai a simmursurot kenkuana manipud Galilea. Nakitada dagitoy a napasamak. 50 -52 Adda lalaki a napan ken ni Pilato tapno dawatenna ti bangkay ni Jesus. Isu ni Jose a naggapu iti ili ti Arimatea idiay Judea. Nalinteg ken natakneng a tao ni Jose ken paspasungadenna ti idadateng ti Pagarian ti Dios. Nupay maysa a kameng ti Sanhedrin, saan nga immanamong iti inkeddeng ken inaramidda. 53 Kalpasan ti panangibabana iti bangkay, binungonna iti linen a lupot sana inkabil iti tanem a naikungkong iti bato ken di pay nausar. 54 Aldaw idi a Panagsagana, ket dandani mangrugin ti Aldaw a Panaginana. 55 Simmurot ken ni Jose dagiti babbai a kimmuykuyog ken ni Jesus manipud Galilea. Nakitada ti tanem ken ti pannakaikabil ti bangkayna. 56 Kalpasanna, nagawidda ket insaganada dagiti bangbanglo ken sapsapo nga agpaay iti bangkay. Ket iti Aldaw a Panaginana, naginanada kas sagudayen ti Linteg.
