LUCAS 18

1Sinarita ni Jesus kadakuada daytoy a pangngarig tapno isurona ida a masapul nga agkararagda a kanayon ken dida pukawen ti namnamada. 2Kinuna ni Jesus, “Adda idi maysa a hues iti maysa nga ili. Saan nga agbuteng iti Dios ket awan raraemenna a tao. 3“Adda met maysa a balo a babai iti dayta met laeng nga ili. Masansan a mapan iti hues a kunkunana, ‘Tulongannak kadi a mangtunton iti kalintegak iti kabusorko!’ 4“Nabayag a di inkaskaso ti hues, ngem kamaudiananna, kinunana iti bagina, ‘Nupay no diak agbuteng iti Dios ken awan raemek a tao, 5ngem gapu ta maumaakon a singsingaen daytoy a balo, itedko man laengen ti dawdawatenna. No saan, dinakto sardengan a ringringgoren ket maibuston ti anusko.’” 6Intuloy ti Apo: “Nangngegyo ti kinuna ti dakes a hues? 7Ket dinto aya tulongan ti Dios dagiti tattaona nga umas-asug kenkuana iti aldaw ken rabii? Dinanto kadi dardarasen ti tumulong kadakuada? 8Ibagak kadakayo a dagdagusennanto nga ipaay kadakuada ti hustisia. Ngem inton umay ti Anak ti Tao, addanto ngata masarakanna a pammati ditoy daga?” 9Sinarita pay ni Jesus daytoy a pangngarig kadagiti tattao a mangitangtangsit iti kinaimbagda ken manguy-uyaw kadagiti sabsabali. 10“Adda dua a lallaki a napan nagkararag idiay Templo: maysa ti Fariseo, maysa ti agsingsingir iti buis. 11“Nagtakder ti Fariseo iti napakni a lugar ket inkararagna a siuulimek: ‘Agyamanak kenka, O Dios, ta saanak a kas kadagiti dadduma a naagum, naulbod wenno makikamkamalala. Agyamanak met ta saanak a kas iti daytoy nga agsingsingir iti buis. 12Maminduaak nga agayunar tunggal lawas, ket itedko ti apagkapullo ti amin a masapulak.’ 13“Ngem nagtakder iti adayo ti agsingsingir iti buis ket dina pay itangad dagiti matana sadi langit. Dinandanogna ketdi ti barukongna ket kinunkunana, ‘O Dios, kaasiannak kadi a managbasol!’” 14Kinuna ni Jesus, “Ibagak kadakayo, nagawid ti agsingsingir iti buis a napalinteg iti sangoanan ti Dios. Ngem ti Fariseo, saan a napalinteg. Ta ti mangitantan-ok iti bagina, maipababanto. Ngem ti mangipababa iti bagina, maitan-okto.” 15Adda sumagmamano a tattao a nangyeg kadagiti ubbingda tapno ipatay ni Jesus ti imana kadakuada. Nakita dagiti adalan ket inungtanda ida iti kasta nga inaramidda. 16Ngem inayaban ni Jesus dagiti ubbing, ket kinunana, “Palubosanyo dagiti ubbing nga umay kaniak. Diyo paritan ida, ta dagiti kas kadakuada ti agtagikua iti Pagarian ti Dios. 17Laglagipenyo a ti siasinoman a di umawat iti Pagarian ti Dios a kas iti panangawat ti maysa nga ubing, saanto a makastrek sadiay.” 18Nagsaludsod ken ni Jesus ti maysa a panguloen a Judio. “Naimbag a Maestro,” kinunana, “ania ti aramidek tapno magun-odko ti biag nga agnanayon?” 19Kinuna ni Jesus, “Apay nga awagannak iti naimbag? Awan ti naimbag no di laeng ti Dios. 20Ammom dagiti bilbilin: ‘Dika makikamalala; dika mamapatay; dika agtakaw; dika agsaksi iti ulbod; agraemka kadagiti nagannak kenka.’” 21“Sipud pay idi ubingak, tinungtungpalko amin dagitoy a bilin,” insungbat ti lalaki. 22Idi mangngeg daytoy ni Jesus, kinunana, “Adda pay maysa a pagkurangam. Ilakom amin a sanikuam samo ited kadagiti napanglaw ti naglakoam ket addanto kinabaknangmo sadi langit. Kalpasanna, umayka sumurot kaniak.” 23Ngem nagladingit ti tao idi mangngegna daytoy, agsipud ta adu ti sanikuana. 24Nakita ni Jesus ti liday ti baknang. “Nagrigat ketdin a sumrek dagiti nabaknang iti Pagarian ti Dios!” kinunana. 25“Nalaklaka ti ilulusot ti maysa a kamelio iti abut ti dagum ngem ti iseserrek ti baknang iti Pagarian ti Dios.” 26Nangngeg dagiti tattao ti kinuna ni Jesus. “Siasino ngaruden ti maisalakan?” sinaludsodda. 27“Ti saan a mabalin kadagiti tattao, mabalin iti Dios,” insungbat ni Jesus. 28Kinuna ngarud ni Pedro, “Adtoy, binaybay-anmi dagiti balbalaymi ket simmurotkami kenka.” 29“Wen,” kinuna ni Jesus kadakuada, “ibagak daytoy kadakayo: ti siasinoman a nangpanaw iti balay, asawa a babai, kakabsat a lallaki, nagannak wenno annakna gapu iti Pagarian ti Dios, 30ad-adunto nga adayo ti awatenna ditoy a biag, ket iti masakbayan, biag nga agnanayon.” 31Inyadayo ni Jesus dagiti sangapulo ket dua nga adalan ket kinunana kadakuada, “Denggenyo! Sumang-attay idiay Jerusalem, ket matungpalto sadiay ti amin nga insursurat dagiti profeta maipapan iti Anak ti Tao. 32Mayawatto kadagiti Hentil a mangang-angaw, mangpabpabain ken mangtuptupranto kenkuana. 33Sapliten ken papatayendanto, ngem agungarto iti maikatlo nga aldaw.” 34Awan a pulos kadagitoy ti naawatan dagiti adalan. Nailinged kadakuada ti kaipapanan dagiti balikasna, ket dida ammo no ania ti sasawen ni Jesus. 35Idi asidegen ni Jesus idiay Jerico, adda maysa a bulsek nga agtugtugaw ken agpalpalama iti igid ti dalan. 36Nangngegna dagiti tattao nga aglabas ket sinaludsodna, “Apay, ania dayta?” 37“Lumabas ni Jesus a taga-Nazaret,” kinunada kenkuana. 38Iti kasta, impukkaw ti bulsek, “Jesus nga Anak ni David! Kaasiannak kadi!” 39Inungtan dagiti adda iti sango ket imbagada kenkuana nga agulimek. Ngem inyad-addana ketdi ti nangipukkaw, “Anak ni David, kaasiannak kadi!” 40Nagsardeng ngarud ni Jesus ket imbilinna a yasidegda kenkuana ti bulsek. Idi nayasidegen, sinaludsod ni Jesus kenkuana, 41“Ania ti kayatmo nga aramidek kenka?” “Apo,” kinuna ti bulsek, “Kayatko a makakitaak koma.” 42“Makakitakan!” insungbat ni Jesus. “Ti pammatim ti nangpaimbag kenka.” 43Dagus a makakitan ti bulsek. Simmurot ken ni Jesus ket indaydayawna ti Dios. Idi makita dagiti tattao ti napasamak, indaydayawda met ti Dios.

will be added

X\