JUDAS 1

1-2 Kadakayo nga inayaban ti Dios ken agbibiag iti ayat ti Dios Ama ken iti panangsalaknib ni Jesu-Cristo: Sapay koma ta adda kadakayo ti naan-anay nga asi, talna ken ayat. Naggapu daytoy a surat ken ni Judas nga adipen ni Jesu-Cristo ken kabsat ni Santiago. 3Ay-ayatek a gagayyem, panggepko idi ti agsurat kadakayo maipapan iti pannakaisalakantayo amin. Ngem kapilitan nga agsuratak kadakayo a dagus tapno dawatek nga ikabilyo ti amin a kabaelanyo a mangsalaknib iti pammati a namimpinsan nga inted ti Dios kadagiti tattaona. 4Ta nakastrek a ditay nadnadlaw ti sumagmamano a tattao nga awanan Dios. Balballikugenda ti mensahe maipapan iti parabur ti Diostayo. Aramatenda ti sao ti Dios a panglinged kadagiti kinaderrepda. Dida bigbigen ni Jesu-Cristo a kakaisuna a Maestro ken Apotayo. Nabayagen nga impakaammo ti Nasantoan a Surat daytoy a pannakailunodda. 5Nupay ammoyon dagitoy, kayatko nga ipalagip kadakayo ti panangisalakan ni Jesus kadagiti Israelita manipud idiay Egipto, ngem kalpasanna, dinadaelna dagiti saan a namati. 6Laglagipenyo dagiti angheles a di nagtalinaed iti sigud a kasasaadda, no di ket pinanawanda dagiti pagtaenganda. Impupok ti Dios ida iti kasipngetan iti baba. Agnanayon a nakawaranda agingga a dumteng ti naindaklan nga Aldaw a maukomda. 7Laglagipenyo ti Sodoma ken Gomorra ken dagiti kabangibang nga il-ili. Nagbasolda iti pannakikamalala ken kinaderrep ket sagsagabaenda ti dusa iti agnanayon nga apuy. Daytoy ti pakaballaagantayo amin. 8Kasta met nga iti arapaap dagitoy a tattao nga awanan Dios, agaramidda kadagiti basbasol a mangtulaw iti bagida met laeng. Laksidenda ti turay ti Dios ken laisenda dagiti nadayag a parsua idiay ngato. 9Uray pay ni Miguel a pangulo dagiti angheles dina inaramid ti kasta. Iti pannakidangadangna iti Diablo, idi pagsuppiatanda no siasino ti mangala iti bangkay ni Moises, dina inukom ti Diablo. Kinunana laeng, “Tubngarennaka koma ti Apo!” 10Ngem agsao dagitoy a tattao iti maibusor kadagiti bambanag a dida maawatan. Dagiti bambanag a sigud nga ammodan, a kas iti nakaisigudan a rikna dagiti atap nga animal, dagitoy met laeng ti mangdadael kadakuada. 11Nakabutbuteng ti mapasamak kadakuada ta sinurotda ti dalan ni Cain. Kas ken ni Balaam, binay-anda nga iturayan ida ti biddut gapu iti gunggona. Immalsada a kas ken ni Core ket nadadaelda met a kas kenkuana. 12Isuda ti mangikkat iti ganas ti panagsasangoyo iti panganan gapu iti kinarawet ken nakababain a panagbartekda. Dagiti la bagbagida ti as-asikasoenda. Kasda la ulep nga itayab ti angin a di makaited iti tudo. Kasda la kayo a di agbunga uray iti tiempo ti panagbubunga, kayo a naparut ket natayen a namimpinsan. 13Mayarigda kadagiti nadawel a dalluyon iti baybay. Kasla labutab a narugit dagiti nakababain nga aramidda. Kasda la kadagiti agalla-alla a bituen nga insaganaan ti Dios iti pagyanan iti agnanayon a mangliwengliweng a sipnget. 14Dagiti kakasta a tattao ti pinampanunot ni Enoc a maikapito a kaputotan ni Adan, idi impadtona daytoy: “Kitaenyo! Umayto ti Apo agraman dagiti rinibribu a nasantoan nga anghelesna 15tapno ukomenna ti amin. Dusaennanto dagiti managbasol nga awanan Dios gapu kadagiti amin nga inaramidda a saan a nadiosan ken amin a sinaoda a maibusor iti Dios!” 16Managreklamo ken managpabasol dagitoy a tattao ket surotenda dagiti dakes a tarigagayda. Ipasindayagda dagiti bagbagida, ket patiray-okanda dagiti sabsabali tapno maalada ti kayatda. 17Ay-ayatek a gagayyem, laglagipenyo dagiti impakdaar idi un-unana dagiti apostoles ni Apo Jesu-Cristo. 18Kinunada kadakayo, “Inton dumteng dagiti maudi nga aldaw, agparangto dagiti tattao a manglalais kadakayo, tattao a mangsurot kadagiti dakes a tarigagayda.” 19Dagitoy dagiti tattao a mangparnuay iti panagsisina. Iturayan ida dagiti nailubongan a tarigagayda, ket awan kadakuada ti Espiritu. 20Ngem dakayo, ay-ayatek a gagayyem, pumigsakayo iti nasantoan a pammatiyo. Agkararagkayo babaen iti pannakabalin ti Espiritu Santo. 21Agtalinaedkayo iti ayat ti Dios. Agpannuraykay iti kaasi ni Apotayo a Jesu-Cristo a mangted kadakayo iti biag nga agnanayon. 22Tulonganyo dagiti agduadua. 23Isalakanyo dagiti dadduma ket rabsutenyo ida iti apuy. Kaasianyo met dagiti dadduma a buyogen ti panagbuteng, ngem guraenyo pati dagiti pagan-anayda a namansaan iti kinaderrepda. 24-25 Madaydayaw koma ti Dios a mangaywan kadakayo tapno saankayo a matnag. Isu met ti mangidatag kadakayo a sidadalus ken siraragsak iti sangoananna. Iti maymaysa a Dios a Mangisalakan kadatayo babaen ken ni Apotayo a Jesu-Cristo, maited koma ti dayag, tan-ok, pannakabalin ken turay, manipud idi ugma, ita, ken iti agnanayon! Amen.

will be added

X\