ARAMID 5

1Ngem adda maysa a lalaki nga agnagan Ananias. Safira ti nagan ti asawana. Nangilako iti dagada 2ngem nangilemmeng iti paset ti naglakoanna, babaen iti yaanamong ti asawana, sana inted ti dadduma kadagiti apostoles. 3Kinuna ni Pedro, “Ananias, apay a pinaiturayanka ken ni Satanas ket inulbodmo ti Espiritu Santo babaen iti panangilemmengmo iti dadduma a naglakoam? 4Sakbay nga inlakom ti daga, saan aya a sika ti akinkukua? Ket idi inlakom, saan aya a sika ti akinkukua iti naglakoan? Apay ngarud a napanunotmo nga aramiden ti kasta? Saan a tao ti inulbodmo, no di ket ti Dios!” 5Apaman a nangngeg ni Ananias daytoy, napasag ket natay. Nagbuteng amin a nakadamag iti daytoy. 6Simrek dagiti agtutubo a lallaki, binungonda ti bangkay ni Ananias sada inruar a napan intanem. 7Agarup tallo nga oras ti napalabas idi sumrek met ni Safira. Dina ammo ti napasamak iti asawana. 8“Ibagam kaniak,” kinuna ni Pedro, “daytoy kadi laeng ti naglakoanyo iti dagayo?” “Wen,” insungbat ti babai, “dayta la ti naglakoanmi.” 9Iti kasta, kinuna ni Pedro, “Apay a nagtulaganyo nga agassawa a suoten ti Espiritu ti Apo? Denggem dagiti arimpadek! Addan iti ruangan dagiti lallaki a napan nangitanem iti asawam. Umaydaka met iruar!” 10Napasag a dagus ni Safira iti sakaanan ni Pedro ket natay. Idi sumrek dagiti agtutubo a lallaki, nakitada a natayen ni Safira. Inruarda sada napan intanem iti abay ti asawana. 11Napalalo a buteng ti entero nga iglesia ken amin a nakadamag iti napasamak. 12Adu a milagro ken datdatlag a banag ti inaramid dagiti apostoles ket nasaksian dagiti tattao. Masansan nga aguurnong dagiti amin a mamati idiay Pasilio ni Solomon. 13Awan ti nakaitured a tumipon iti bunggoyda a saanda a kadua. Ngem kasta unay ti panangidayaw dagiti tattao kadakuada. 14Immadu nga immadu ti timmipon kadakuada—lallaki ken babbai a namati iti Apo. 15Gapu iti ar-aramiden dagiti apostoles, naipan dagiti masakit kadagiti kalkalsada. Naipaiddada kadagiti papag ken ikamen tapno no lumabas ni Pedro, uray ti anniniwanna laeng ti manglinong iti dadduma kadakuada. 16Manipud kadagiti il-ili a kabangibang ti Jerusalem, inyeg dagiti tattao dagiti masakit ken dagiti addaan iti dakes nga espiritu. Ket immimbagda amin. 17Napalalo ti apal ti Kangatoan a Padi ken dagiti pasurotna a kamkameng ti bunggoy dagiti Saduceo, ket nagtutulaganda ti aramidenda. 18Pinatiliwda dagiti apostoles sada pinaibalud ida. 19Ngem iti dayta a rabii, maysa nga anghel ti Apo ti nanglukat kadagiti ruangan ti pagbaludan ket inruarna dagiti apostoles. Kinunana kadakuada, 20“Inkay idiay Templo ket ibagayo kadagiti tattao ti amin a maipapan iti daytoy baro a biag.” 21Nagtungpal dagiti apostoles. Idi bumigaten, simrekda iti Templo ket nangisuroda. Pinaayaban ti Kangatoan a Padi ken dagiti pasurotna dagiti amin a panglakayen a Judio ket naangay ti maysa a miting ti entero a Sanhedrin. Kalpasanna, pinaalada dagiti apostoles iti pagbaludan tapno maidatagda iti Sanhedrin. 22Ngem idi dumteng dagiti ofisiales iti pagbaludan, dida nasarakan dagiti apostoles. Iti kasta, nagsublida ket impakaammoda iti Sanhedrin, 23“Itay sumangpetkam iti pagbaludan, nakitami a nakandadoan a naimbag dagiti ruangan ket agbambantay dagiti guardia. Ngem idi luktanmi dagiti ruangan, awan nasarakanmi iti uneg!” 24Idi mangngeg daytoy ti kapitan dagiti guardia ti Templo ken dagiti panguloen a papadi, nasdaawda no ania ti napasamak kadagiti apostoles. 25Dimteng ti maysa a lalaki ket imbagana kadakuada, “Denggenyo! Adda idiay Templo dagiti lallaki a pinaipupokyo iti pagbaludan. Madamada a mangisursuro kadagiti tattao.” 26Napan ti kapitan ken dagiti soldadona iti Templo, ket innalada dagiti apostoles. Dida pinilit ida ta maamakda amangan no uboren ida dagiti tattao. 27Idi maidatag dagiti apostoles, iti sangoanan ti Sanhedrin, inusig ida ti Kangatoan a Padi. Kinunana, 28“Nainget ti panangbilinmi kadakayo a dikay mangisuro iti nagan daytoy a tao. Kitaenyo ti aramidyo! Nagwarasen ti pannursuroyo iti entero a Jerusalem, ket kayatyo pay nga ipabasol kadakami ti ipapatayna.” 29Simmungbat ni Pedro ken dagiti dadduma nga apostoles, “Masapul nga agtungpalkam iti Dios, saan nga iti tao. 30Ti Dios dagiti kapuonantayo ti nangpagungar ken ni Jesus a pinapatayyo babaen iti panangilansayo iti krus. 31Intan-ok ti Dios iti makannawanna, kas Pangulo ken Mangisalakan, tapno ikkanna dagiti Israelita iti gundaway nga agbabawi kadagiti basbasolda ket mapakawanda. 32Dakami ti makapaneknek kadagitoy, kasta met ti Espiritu Santo nga isu a sagut ti Dios kadagiti agtulnog kenkuana.” 33Kasta unay ti pungtot dagiti kamkameng ti Sanhedrin a nakangngeg iti daytoy ket kayatda a mapapatay dagiti apostoles. 34Ngem timmakder ti maysa kadakuada, ni Gamaliel a maysa a Fariseo ken maestro iti Linteg a pagraeman dagiti amin a tattao. Imbilinna a mairuar pay laeng dagiti apostoles. 35Kalpasanna, kinuna iti Sanhedrin, “Kakabsat nga Israelita, panunotenyo koma a nalaing no ania ti aramidenyo kadagitoy a tattao. 36Saan pay a nabayag a timmaud ni Teudas a nagpamarang a naindaklan a pangulo; aguppat a gasut dagiti lallaki a simmurot kenkuana. Ngem idi napapatay, nawarawara dagiti pasurotna ket nagpukaw ti tignay nga inrugina. 37Kalpasanna, nagparang met ni Judas a taga-Galilea idi panawen ti sensus ket adu ti napasurotna. Napapatay ni Judas ket nawarawara met dagiti pasurotna. 38“Ngarud, daytoy ti isingasingko kadakayo: Diyo bibiangan dagitoy a tattao. Bay-anyo ida! No nagtaud iti tao daytoy a plano ken aramidda, awanto ti pagbanaganna. 39Ngem no nakem ti Dios, diyo mabalin a parmeken ida. Diyo busoren ida amangan no ti Dios met laeng ti busbusorenyo!” Impangag ti Sanhedrin ti patigmaan ni Gamaliel. 40Pinastrekda dagiti apostoles. Pinasaplitda ida sada imballaag manen kadakuada a dida agsasao iti nagan ni Jesus. Kalpasanna, winayawayaanda ida. 41Pimmanaw dagiti apostoles iti saklang ti Sanhedrin. Kasta unay ti ragsakda ta imbilang ida ti Dios a maikari nga agsagaba iti pannakaibabain gapu ken ni Jesus. 42Tunggal aldaw, idiay Templo ken kadagiti balbalay dagiti tattao, intuloyda ti nangisuro ken nangikasaba iti Naimbag a Damag maipapan ken ni Jesus, ti Cristo.

will be added

X\