1 JUAN 3

1Kitaenyo no kasano ti kadakkel ti panagayat ti Ama kadatayo! Wen, kasta unay ti panagayatna kadatayo ta maawagantayo nga annak ti Dios, ket pudno a kastatayo. Dinatayo bigbigen ti lubong agsipud ta dina binigbig ti Dios. 2Ay-ayatek a gagayyem, annaknatayon ti Dios, uray no saan pay a nalawag no anianto ti pagbalinantayo. Ngem ammotayo nga inton agparang ni Cristo, agbalintayto a kas kenkuana, agsipud ta makitatayto ti kinasiasinona. 3Tunggal maysa nga addaan iti daytoy a namnama ken ni Cristo, masapul nga agbiag a nadalus a kas ken ni Cristo a nadalus. 4Ngem ti siasinoman nga agbasol, salungasingenna ti linteg ti Dios, agsipud ta ti basol ket panagsalungasing iti linteg. 5Ammoyo nga immay ni Cristo tapno ikkatenna dagiti basbasol; ket awan ti basolna. 6Iti kasta, saanen nga agbasol ti siasinoman nga agtalinaed ken Cristo. Ngem ti agbasol, dina nakita wenno naammoan ni Cristo. 7Annakko, dikay paallilaw iti uray siasinoman. Nalinteg ti siasinoman nga agaramid iti nalinteg a kas ken ni Cristo a nalinteg. 8Ngem kadua ti Diablo ti saan a sumardeng nga agbasol, ta nagbasolen ti Diablo manipud pay idi punganay. Daytoy ti gapuna nga immay ti Anak ti Dios tapno dadaelenna dagiti aramid ti Diablo. 9Saan nga agbasol ti anak ti Dios, agsipud ta adda kenkuana ti kababalin ti Dios. Gapu ta ti Dios ti Amana, saanna a mabalin ti agbasol. 10Ti nalawag a pakaigiddiatan dagiti annak ti Dios kadagiti annak ti Diablo isu daytoy: Saan nga anak ti Dios ti siasinoman a di agaramid iti naimbag wenno di agayat iti kabsatna. 11Daytoy ti mensahe a nangngegyo manipud idi damo: masapul nga agiinnayattayo. 12Saantayo nga agbalin a kas ken ni Cain a pinaiturayan iti Managdakdakes ket pinatayna ni Abel a kabsatna. Apay a pinatayna? Gapu ta dakes dagiti aramid ni Cain, ket nalinteg dagiti aramid ti kabsatna. 13Kakabsatko, dikay masdaaw no guraennakayo ti lubong. 14Ammotayo a pinanawantayo ni patay ket simrektayo iti biag. Ammotayo daytoy agsipud ta ay-ayatentayo dagiti kakabsattayo. Ti saan nga agayat, adda pay laeng ken ni patay. 15Mammapatay ti siasinoman a gumura iti kabsatna. Ammoyo met a ti mammapatay awan kenkuana ti biag nga agnanayon. 16Ti pakaammoantayo no ania ti ayat isu daytoy: Impaay ni Cristo ti biagna kadatayo. Rebbengtayo met ngarud nga ipaay ti biagtayo kadagiti kakabsat! 17No addaanka ket makitam ti maysa a kabsat a makasapul iti tulong ngem dika pulos mangrikna, kasano ti panagkunam nga ay-ayatem ti Dios? 18Annakko, saantayo koma nga agayat babaen iti sao wenno sarita laeng. Ipakitatayo ketdi ti pudno a panagayat babaen iti aramid. 19-20 Ngarud, daytoy ti pakaammoantayo nga addatayo iti pudno. Uray no ukomennatayo ti konsensiatayo, natalgedtayo latta nga umasideg iti Dios. Ammotayo ngamin a dakdakkel ti Dios ngem ti konsensiatayo, agsipud ta ti Dios ket ammona amin. 21Wen, gagayyem, no saannatayo nga ukomen ti konsensiatayo, natalgedtayo nga agtakder iti sangoanan ti Dios. 22Ikkannatayo iti aniaman a dawatentayo, agsipud ta tungpalentayo dagiti bilbilinna ken aramidentayo ti pakaragsakanna. 23Daytoy ti bilinna: Masapul a mamatitayo iti nagan ni Jesu-Cristo nga Anakna ken agiinnayattayo a kas imbilin ni Cristo. 24Ti mangtungpal kadagiti bilbilin ti Dios, agtalinaed iti Dios, ket agtalinaed met ti Dios kenkuana. Daytoy ti pakaammoantayo nga agtaeng kadatayo ti Dios: Ammotayo babaen iti Espiritu nga intedna kadatayo.

will be added

X\