1 CORINTO 2

1Kakabsatko, idi immayak dita tapno ikasabak kadakayo ti nalimed a kinapudno maipapan iti Dios, diak nagaramat kadagiti agkakauneg a balikas wenno naindaklan a pampanunot. 2Ta bayat ti kaaddak iti dennayo, inkeddengko a lipaten ti amin malaksid ti maipapan ken ni Jesu-Cristo ken ti pannakailansana iti krus. 3Iti kasta, idi addaak kadakayo, nakapuy ken agtigtigergerak iti buteng. 4Iti panangisurok ken panangikasabak iti mensahe, diak nagusar kadagiti makaallukoy a balikas ti kinasirib. Nagsaoak iti makaallukoy a pammaneknek iti pannakabalin ti Espiritu ti Dios, 5tapno saan a maibatay ti pammatiyo iti kinasirib ti tao, no di ket iti pannakabalin ti Dios. 6Nupay kasta, agsaoak met iti kinasirib kadagiti nataengan iti pammatida. Ngem saan nga iti kinasirib ti agdama a panawen wenno dagiti mangituray iti daytoy a lubong—dagiti agtuturay a mapukpukawen ti pannakabalinda. 7Ti nalimed a kinasirib ti Dios ti sawek, ti kinasirib a nailemmeng kadagiti tattao ken intudingna nga agpaay iti pakaigloriaantayo, uray idi sakbay a maparsua ti lubong. 8Awan kadagiti agtuturay iti lubong ti makaammo iti daytoy a kinasirib. Ta no naammoanda, dida koman inlansa iti krus ti nadayag nga Apo. 9Ngem kas kuna ti Nasantoan a Surat, “Ti saan pay a nakita wenno nangngeg ti tao, ti saan nga impagarup ti tao a mapasamak, isu ti insagana ti Dios kadagiti agayat kenkuana.” 10Nupay kasta, babaen iti Espiritu, impakaammo ti Dios kadatayo ti palimedna. Sukimaten ti Espiritu ti amin a banag, uray dagiti nauneg a panggep ti Dios. 11Ti laeng panunot ti maysa a tao ti makaammo iti adda iti nakem dayta a tao, kasta met a ti laeng Espiritu ti Dios ti makaammo iti panunot ti Dios. 12Saan a ti espiritu ti lubong ti inawattayo, no di ket ti Espiritu nga aggapu iti Dios tapno maawatantayo ti kaipapanan ti amin nga imparabur ti Dios kadatayo. 13Ngarud, iti panangilawlawagmi kadagiti naespirituan a kinapudno kadagiti addaan iti Espiritu, saanmi nga aramaten dagiti isursuro ti tao, no di ket dagiti isursuro ti Espiritu ti Dios. 14Ngem ti tao nga awanan iti Espiritu, dinanto awaten dagiti sagut nga aggapu iti Espiritu ti Dios. Saanna a maawatan dagitoy ta minamaagda kenkuana. Ngamin, mabigbig laeng ti pategda babaen iti espiritu. 15Kabaelan a rukoden ti naespirituan a tao ti pateg ti amin, ngem awan makarukod kenkuana. 16Kas kuna ti Nasantoan a Surat, “Siasino ti makaammo iti panunot ti Apo? Siasino ti makabalin a mangbagbaga kenkuana?” Nupay kasta, ammotayo ti panunot ni Cristo.

will be added

X\