Psalms 66

1Emin kayun katuutuu eyad puyek ey itekkutekkuk yu hu penaydayaw yun Apu Dios. 2Iena-appeh yu hu kamedeyyaw ni ngadan tu niya hi-gatu hu daydayaw yu. 3Ehel yun Apu Dios e kanyuy “Kami kemetngadda etan di muka pehpehding. Et-eteng hu kabaelan mu, et humman hu, emin hu buhul mu ey ida kamandukkun di hinanggam tep ya takut dan hi-gam. 4Emin hu katuutuud kebebbebley ey manyu-ung idan menaydayaw ni hi-gam niya i-ena-appeh da hu penaydayaw dan ngadan mu.” 5Nemnem tayudda etan impahpahding Apu Dios ni kaketngain tuun humman hu panyaggudan idan emin ni tuu tu. 6Ya hakey ni impahding tu ey ginedwa tu hu danum di gawwan baybay et pandalnan ida eman ni aammed tayun nan-agwatan dadman. Et humman hu, pan-an-anla itsu tep ya humman ni tu impahding. 7Hi-gatu hu mannananeng ni man-ap-apu tep ya et-eteng ni kabaelan tu. Tuka hellipat-i hu kapehpehding ni emin ni tuud kebebbebley. Et humman hu, entan tu ipatpatnan mangngenghay ni hi-gatu. 8Emin itsun katuutuud kebebbebley ey daydayaw tayu hi Apu Dios e Dios tayu niya pandingngel tayu hu tayu kapenaydayaw ni hi-gatu. 9Hi-gatu hu nangnged ni biyag tayu ey daitsu kaippaptek di hipan lawah ni meippahding ni hi-gatsu. 10Apu Dios, pinenatnaan dakemi e heni kami silber ni neayug di apuy ma-lat memahmah, tep indenawtan dakemin ligat min penang-angan mu hedin nehammad hu mika pengullug ni hi-gam. 11Ey heni dakemi kinna et pehakbat mu hu mebel-at ni ligat ni hi-gami, tep in-abulut mu et panlelehhanan mi. 12Niya in-abulut mu et apputen dakemiddan buhul mi et nemahhig hu nampehelheltap dan hi-gami e heni dakemi nan-igsin, ey heni kami nandalan di apuy niyad danum ni um-ienud. Nem yan nunya ey adyah ni in-ali dakemin hi-gam eyad melinggep ni bebley e wadan emin hu mahapul mi. 13Et yan nunya ey um-ali-ak di Tempol mun man-appit ni kagihheba ma-lat peamnuk hu impakulug kun hi-gam eman ni wada hu nemahhig ni nakka panligligasi. 15Em, i-alian dakan simmaban kalneroh ni kagihheban kamei-appit ni hi-gam niya um-i-li-ak ni baka niya gelding ni mei-dum ni i-appit kun hi-gam. 16Emin kayun kamekangngu-unnud nan Apu Dios ey dengel yu et e-ehhelen kun hi-gayu hu kakkayyaggud ni impahding tun hi-gak. 17Tep nampehemmehemmekkak ni hi-gatud dasal ku niya in-ena-appeh ku hu nakka penaydayaw ni hi-gatu 18ey dingngel tu hu dasal ku et baddangan tuwak, tep inamta tu e endi hu nak intalud puhuk ni liwat ku. Tep gullat ni wada inhaut ku et nanna-ud ni eleg tuwak hanguden. 20Hi Apu Dios hu nakka daydayawa, tep hinumang tu hu dasal ku niya impannaneng tu hu eleg melumman ni impeminhed tun hi-gak.

will be added

X\