Psalms 147

1Daydayaw tayu hi Apu Dios ! Em, kayyaggud hedin man-a-appeh itsun penaydayaw tayun Dios tayu, tep humman dedan hu lebbengtun pehding tayu. 2Tuka pan-iyayyaggud hu Jerusalem niya tudda kapan-ibbangngad hu tutu-u tun neilaw ni balud di edum ni bebley. 3Tuka ellubyaga nemnem idan nedismayah niya tuka peyaggud hu liput da. 4Inamta tu ngu dedan hu bilang idan bittuwen et han tudda letua, niya nginedanan tuddan emin. 5Eta-gey ni peteg niya et-eteng hu kabaelan ni Ap-Apu tayu. Eleg ni hekey melkud hu kalinaing tu. 6Tuka baddangidda hu tuun daka pebabah annel da, nem tudda kapebabah ni peteg hu tutu-un lawah daka pehpehding. 7Unnudi yun gitalah hu a-appeh yun yuka penaydayaw nan Apu Dios e Dios tayu. 8Imbiklag tu hu kulput di kabunyan. Ey wineda tu hu udan ni menennum ni puyek, et kameteggudda hu helek di duduntug. 9Wineda tu hu kennen idan emin ni kaman-ayyam di puyek niya anin ni ya kakennaddan impah ni gawwang et tuka iddawat hedin ida kamampikpik ni upa da. 10Hi Apu Dios ey beken ni ya na-let ni kebayyu niya beken ni ya makabbunget ni sindalu hu kamengippeamleng ni hi-gatu. 11Tep ya kamengippeamleng ni hi-gatu ey yadda tutu-un kamekangngu-unnud ni hi-gatu niyadda kamengiddinnel ni eleg melullumman ni impeminhed tu. 12Emin itsun iJerusalem di Zion ey daydayaw tayu hi Apu Dios e Dios tayu. 13Tep daitsu kapaka-ippaptek e heni naka-ihhammad tu eheb eyan bebley tayu ma-lat eleg daitsu hegepen idan buhul tayu. Ey binendisyonan daitsun tutu-u tu. 14Tuka pelinggep eya bebley tayu niya tuka panyaggud hu hipan tayu kaittanem et dakel hu tayu kaennia. 15Hedin wada in-olden tud kebebbebley eyad puyek, man anggegannu ni neu-unnud. 16Tuka ibbiklag hu dallallu e heni wangal niya tuka iwwahit e heni dep-ul. 17Ey tuka peelli hu dallallun heni pantal et endi tuun han-isipel tu hu ketel ni tuka peelli. 18Ey hedin nanmandal, man kaum-ali hu dibdib et ida kamambalin ni danum humman idan dallallu et ida kaum-ayuh. 19Emin hu tugun tu ey impeamta tuddan tutu-u tun helag Israel. 20Hi-gadan ebuh hu nengipeamtaan tu. Eleg ngu amtaddan edum ni tutu-u ida humman ni tugun tu. Daydayaw tayu hi Apu Dios !

will be added

X\