Psalms 145

1Daydayawen dakan ingganah e Dios ku niya Patul ku. 2Em, kewa-wa-wa ey daydayawen ku hu kasina-gey mu niya mansalamattak ni hi-gam. 3Apu Dios, eta-gey kan peteg. Makulug ni hi-gam ni ebuh hu lebbengtun medaydayaw. Eleg ni hekey meewwasi hu kasina-gey mu. 4Tettebalen idallin manhuluhulul ni helag idan tutu-u hu kamengippetngan impenahding mu. Ey peennamta dallin helag da ida humman ni impahding mu tep ya et-eteng ni kabaelan mu. 5Peennamtak hu kasina-gey mu niya nenemnemen kudda kaketngain tuun impahpahding mu. Anin idallin tutu-u et ene-ehhelen da damadda humman idan impahding mu. 7Em, ene-ehhelen dalli hu kakinayyaggud mu niya man-an-anladdallin mengi-ena-appeh ni binabbal mu. 8Apu Dios, makulug ni kabbabbal kan peteg niya mahmek ka. Beken kan kabbubunget niya eleg melullumman hu impeminhed mu. 9Kayyaggud hu muka pehding di emin ni tuu. Ey mudda kahehmekan emin hu lintum. 10Apu Dios, daydayawen dakallin emin idan lintum. Ey emin idalli kamekangngu-unnud ni hi-gam ey mansalamat idan hi-gam. 11Ene-ehhelen dalli hu kasina-gey ni muka pan-ap-apui niya et-eteng ni kabaelan mun mengippahding idan impahding mu ma-lat amtaen ni katuutuu. 13Tep kamannananeng ni ingganah hu muka pan-ap-apui niya hi-gam ali hu Patul ni ingganah. Hi Apu Dios ey tuka peamnun emin hu tuka e-hela niya emin hu tuka pehpehding ey kameang-ang hu binabbal tu. 14Tuka baddangidda etan kameliggasi niya tuka pekedhel hu nemnem idan kamedismayah ni tutu-u. 15Emin ida hu mategun lintum ey hi-gam hu daka pengittengngawi niya hi-gam hu kamengidwat ni kennen da hedin mahapul da. 16Endi daka pangkullangi, tep muka iddawat ni emin hu mahapul da. 17Kayyaggud ni emin hu kapehding Apu Dios niya kabbabbal ni peteg. 18Nandadaddan ni menummang ni kaibbagaddan kamampehemmehemmek ni hi-gatud dasal da. 19Em, tuka iddawat ni emin hu mahapul idan kamengu-unnud ni hi-gatu niya tuka dedngela hu daka pampehemmehemmeki ma-lat ihwang tudda. 20Tudda kaippaptek hu tutu-un neminhed ni hi-gatu. Nem hedin yadda tutu-un lawah daka pehpehding ey tudda kaendia. 21Daydayawen ku hi Apu Dios . Em, emin itsun lintu tu ey daydayaw tayun ingganah hu ngadan tu.

will be added

X\