Psalms 116

1Nakappinhed ku hi Apu Dios tep tuka dedngela hu dasal ku. 2Et humman hu, mandasallak ni hi-gatu ingganah kepappegan ni biyag ku. 3Nemahhig hu takut ku, tep innang hu ketteyyan ku, 4nem nandasallak nan Apu Dios et kangkuy “Ihwang muwak anhan e Apu Dios !” 5Hi Apu e Dios tayu ey kakkayyaggud, kabbabbal niya mahmek. 6Tuka ippaptek ida hu tutu-un endin hekey kabaelan dan henin hi-gak, tep yan eman ni ngannganih ketteyyan ku ey binaddangan tuwak et meihwangngak. 7Et humman hu, melinggeppak law tep ya kakinayyaggud nan Apu Dios ni hi-gak. 8Neihwangngak di ketteyyan ku tep ya baddang tun hi-gak. Ingkal tu hu kaumhulun ni nakka lemyungi niya eleg tu iebulut ni da-ak apputen idan buhul ku. 9Et yan nunya law ey ya nakka pengu-unnudin Apu Dios hu nakka pehpehding eyan ketagguk di puyek. 10Yan eman ni nehalman hu nakka panligligasi, niya nemahhig hu takut ku ey impannananeng ku hu nakka pengullug, anin ni kangkuy “Endi law hu namnamah ku.” Niya kangkuy “Mangkaitek idan emin hu tutu-u.” 12Hipa na-mu kayyaggud ni nak iddawat nan Apu Dios ni pansalamatan kun kayyaggud ni impahpahding tun hi-gak? 13Ya kayyaggud ey nak i-appitan ni meinnum ni pengippeang-angan kun nakka pansalamatin hi-gatud nengihwangan tun hi-gak. 14Niya nak peamnud hinanggaddan neamung ni tutu-u tu hu insapatah kun hi-gatu. 15Hi Apu Dios ey nemahhig ni kaumlemyung hedin wada netey ni tuu tu, tep nebalol idan peteg ni hi-gatu. 16Apu Dios, hi-gak hu bega-en mu. Nakka mansilbin hi-gam heni lan ina, tep inhewang muwak di kettayyak. 17Man-appittak ni pansalamat kun hi-gam niya mandasallak ni hi-gam e Apu Dios . 18Emin ida etan insapatah kun Apu Dios ni pehding ku ey peamnuk di hinanggaddan tutu-u tun kameemmuemmung di Tempol tud Jerusalem. Daydayaw tayu hi Apu Dios !

will be added

X\