Psalms 115

1Apu Dios, beken ni hi-gami hu medeyyaw, nem hi-gam ni ebuh tep eleg melullumman hu impeminhed mu niya kamannananeng hu muka pemaptek ni hi-gamin tuum. 2Kele kan idan tutu-ud kebebbebley ey “Attu mewan hu Dios yu ey?” 3Ya Dios tayu ey immen di kabunyan. Ey tuka pehding hu hipan pinhed tun pehding. 4Nem hedin yadda dios da ey ya silber niya balituk hu nekapyaan da e kinapyan tuu. 5Wada bungut da, nem eleg ida um-ehel niya wada mateda, nem eleg da han-ang-ang. 6Wada tangila da, nem eleg da handengel niya wada eleng da, nem eleg da hanhamuy. 7Wada ngamay da, nem eleg da hankapa, ey wada heli da, nem eleg ida umdalan. Ey anin ni buklew da et eleg umge-hem. 8Emin ida hu kamengennapya niya kamengiddinnel idan nunman ni dios ey mambalin idan heniddan nunman ni dios dan daka kennapyaa. 9Et humman hu, hi-gatsun helag Israel ey pannananeng tayun idinel hi Apu Dios . Tep hi-gatu hu kaumbaddang niya kamengippaptek ni hi-gatsu e heni happiyaw tayu. 10Emin kayun papaddin helag Aaron ey hi-gatu dama idinel yu. Tep hi-gatu hu kaumbaddang niya kamengippaptek ni hi-gatsu e heni happiyaw tayu. 11Anin ni hi-gayuddan edum ni kamengu-unnud nan Apu Dios et hi-gatu idinel yu. Tep hi-gatu hu kaumbaddang niya kamengippaptek ni hi-gatsu e heni happiyaw tayu. 12Nemnemen daitsun Apu Dios et bendisyonan daitsun helag Israel, anin idan edum tayun papaddi tun helag Aaron. 13Bendisyonan tuddan emin hu kamengu-unnud ni hi-gatun newetwet niya kedangyan. 14Ya kayyaggud ey bendisyonan daitsun Apu Dios et dumakkel itsu niya mangkehlag ida u-ungnga tayu niya inap-apu tayu. 15Em, ya kayyaggud ey bendisyonan daitsun Apu Dios e nanletun puyek niya kabunyan. 16Lintu tu kabunyan ni panha-adan tu niya lintu tu dama eya puyek ni panha-adan tayun tuu. 17Beken ni yadda etan nangketey hu mengidaydayaw nan Apu Dios, tep limmaw idad kalawwin netey. 18Nem hi-gatsun mategu hu menaydayaw nan Apu Dios ni ingganah. Daydayaw tayu hi Apu Dios !

will be added

X\