Psalms 105

1Pansalamat itsun Apu Dios niya pandasal itsun hi-gatu. Tayu peenamtad kebebbebley ida etan impahpahding tu. 2Iena-appeh tayu hu dayaw tu niyadda etan kaketngain tuun impahpahding tu. 3Emin itsun kamengu-unnud nan Apu Dios ey igaggaya tayu hu kayyaggud ni peteg ni ngadan tu. 4Hi-gatu pambagai tayun baddang niya hayukup itsud kad-an tun ingganah. 5Hi-gayuddan helag Abraham e bega-en Apu Dios e helag ida daman Jacob ni pinili tun pantu-u tu, nemnem yudda kaketngain tuun impahpahding Apu Dios ni panyaggudan yu niya nemnem yudda dama hu kalinimpiyuh ni nenuwet tu. 7Hi-gatu hu Ap-Apu e Dios tayu, et humman hu mahapul ni u-unnuden tayun emin ni tuu eyad puyek ida tugun tu. 8Eleg tu liwwana hu nekitbalan tu, anin ni piga toon hu melebbah. 9Et humman hu, pannananeng tu hu nekitbalan tun Abraham e humman dama insapatah tun Isaac. Impidwa tun inhel humman ni nekitbalan tun ingganah nan hi Jacob e hi Israel niyadda helag tu 11e kantuy “Iddawat kun hi-gayu hu bebley di Kanaan ni beltanen idan helag yu.” 12Yan nunman ey hahhakkey ida hu tuun Apu Dios ni nekibebley di diman Kanaan. 13Immenal-aldan idan nekibenebbebley di edum ni bebley ni nan-ap-apuan idan nambakbaklang ni patul. 14Nem endi kuma hakey ni patul ni an nengipelilligat ni hi-gada, tep eleg iebulut nan Apu Dios ni pehding da humman ni hi-gada 15e kantuy “Entan tudda panligligat hu pinilik ni tuuk niyadda prophets e bega-en ku.” 16Entanni ey impaelin Apu Dios hu bisil di Kanaan et endi hu kennen dadman, 17nem impamengulu tud Egypt hi Joseph, tep inggatang idan agitu et mambalin ni himbut di diman. 18Yan eman ni nengikelabutan dad Egypt nan hi Joseph ey binangkiling da hu heli tu et maliputan niya impewa-ngalan dan gumek. 19Neikelabut hi Joseph ingganah ni immamnun neipahding ida etan inhel tun meippahding ni impeamtan Apu Dios ni hi-gatu. Huyyan neipahding nan Joseph hu nematnaan Apu Dios ni hi-gatu. 20Nem entanni et endi maptek ey imbukyat etan ni patul di Egypt hi Joseph di kallabbuttan, 21et hi-gatu hu pambalin tun mampaptek di baley tu niyadda hipan kinedangyan tu. 22Ey hi-gatu hu nambalin ni apuddan emin ni uupisyal di baley nan patul niya hi-gatu hu kamengittuddun kayyaggud ni pehding idan kaumtugun nan patul. 23Entanni ey limmaw idan emin hu pamilyah nan Jacob di Egypt et ida makibebley di diman. 24Yan nunman ni wadaddadman ey indawtan Apu Dios idan dakel ni u-ungnga da. Nangkahlag ida ey nambalin ni hi-gada hu daddakkel niya e-etteng kabaelan da nem yadda iEgypt e buhul da. 25Et lektattuy impambalin Apu Dios ni anggebe-hel idan tuud Egypt ida humman ni helag Jacob e tuun Apu Dios, et lawah hu ipenahding dan hi-gada. 26Nem intu-dak tu hi Moses e bega-en tu, et hi Aaron e pinili tun pangkadwa tu, et lumaw idan han-agid Egypt ni an memaddang ni hi-gada. 27Limmaw idad Egypt et da ipahding di hinanggaddan tuudman hu inhel Apu Dios ni pehding dan kaketngain tuu. 28Nambalin nan Apu Dios ni engeenget di emin di bebley di Egypt, nem nanengtun eleg da u-unnuden hu pinhed tu. 29Et pambalin tun kuheyaw hu danum di wangwang niyaddad kulukul et mangkatey ida hu nambakbaklang ni deleg diman. 30Entanni mewan ey impalaw tu hantapug ni tukak et umapnal idad kebebbebley di Egypt, anin yad baley nan patul. 31Impehegyab tu mewan hu aggiyyet niya imuk et menapnapan hu Egypt. 32Ey impaeli tu hu nemahhig ni dallallu niya kedyam 33et mangkebahbah ida hu keyew niya hipan intanem dadman Egypt. Anin idan intanem dan grapes niyadda figs et nangkebahbah ida. 34Entanni mewan ey impalaw tu hu hantapug ni dudun 35et pangkanen dan emin hu nangkeitnem di diman. 36Entanni law ey impampapetey tudda hu lalakkin pengulwan ni u-ungngaddan iEgypt. 37Et han tudda law ipengulu humman idan helag Israel et hi-yanen da hu Egypt e dakel intabin dan silber niya balituk. Ey emin ida ey na-let ida e endi kamandedgeh. 38Nemahhig law ni katattakusiddan iEgypt hu helag idan Israel et ida kaman-am-amleng ni neni-yanan dan bebley dad Egypt. 39Wada etan impaelin Apu Dios ni kulput di ta-pew da, et humman hu kamenihhiddum ni hi-gadan kawwalwal. Ey hedin hileng, man kamambalin humman ni kulput ni apuy ma-lat mabnangan ida. 40Nambagaddan detag ey impaeli tu hu dakel ni sisit. Ey kewa-wa-wa ni indawtan tuddan kennen dan manna ni kamelpud kabunyan. 41Dinhak tu etan batu ey immebwal hu dakel ni danum ni innumen da, et maweda hu heni wangwang di desert. 42Impahding Apu Dios emin ida huyya, tep eleg tu liwwanen hu impakulug tun Abraham e bega-en tu. 43Et ipangngupangngulu tudda humman ni tutu-u tu e ida kaman-am-amleng niya ida kaman-a-appeh ni neni-yanan dan bebley di Egypt. 44Emin hu puyek di bebley idan edum ni tutu-un eleg mengullug ni hi-gatu ey nan-idwat tuddan tutu-u tu et hi-gada law hu nampengalan hipan lameh idan nangkeitnem di pupuyyek da. 45Humman hu impahding tu ma-lat u-unnuden idan tutu-u tun emin hu tugun tu. Daydayaw tayu hi Apu Dios !

will be added

X\