Proverbs 6

1Hi-gam ni u-ungngak, ey entan tu abulut ni mu i-ehneng hu hakey ni tuun umgawat. 2Nem hedin neil-uh kumedek ni inebulut mun hi-gam memeyyad ni utang ni hakey ni tuu hedin eleg tu hambayad et heni mu hinablut annel mu tep ya insapatah mu, 3ey heninnuy hu pahding mu: Elaw kan elaw di kad-an etan ni tuun immutang et kamampehemmehemmek ni hi-gatu et ehelem e eleg tu nemnemnema etan insapatah mun hi-gatu, ma-lat beken ni hi-gam mambeyyad. 4Entan tu pahbudin an man-u-uggip, nem elaw ka kumaddan et ka makihummangan ni hi-gatu ma-lat beken ni hi-gam hu memeyyad etan ni inutang tu. Et heni ka etan ni makwah ni imbesikan tu etan kamandedweng niya heni ka etan ni sisit ni nakna nem bimmesik. 6Hi-gayuddan makahhiga, ey ang-ang yu kedi elaw idan abbun ma-lat menemneman kayu. 7Tep anin ni endi ap-apu dan manmandal ni hi-gadan mangngunnu et tagan da ngunu. 8Hedin ugew, man taggan da amung ni kennen da ma-lat wada kennen da hedin mainudan. 9Nem hedin ya makahhigan tuu, ey kaman-u-uggip. 10Kantuy ‘Man-u-uggippak pay ni- ey man-eg-egpittak et man-iyyatu-ak.’ 11Nem hedin pelinlinwannan tu, ey kekemtang ali ey nambalin ni nakawwetwet henin kapehding ni matekew e eleg iggibek ni himmegep di baley. 12Yadda lawah niya endi silbitun tuu ey itek daka e-e-hela. 13Ida kaumkeni-ding niya dakel daka pehding ni daka panhe-ul ni edum dan tuu. 14Lawah hu wadad nemnem da. Et humman hu, ida kaumplanuplanuh ni lawah ni pehding da niya emin hu lawwan da ey ida kaumbabahbah ni kapandadagyumin tuu. 15Et endi maptek ey wadalli ligat dan umhulun ni ketteyyan da tep ya humman ni elaw da. 16Wada enem ni elaw idan tuun anggebe-hel nan Apu Dios . Ya kakulugan tu ey wada pitun kamengippebungnget ni hi-gatu: 17Ya kapampahhiyaid kapehding niyad kapan-e-ehhel, ya kapenghelin beken ni makulug, ya kapemetteyin tuun endi bahul tu, 18ya kapamplennuhin lawah, ya neminhed ni peteg ni mengippahding ni lawah, 19ya panlangkakan ni mantistigu et ya kapemahbahin kayyaggud ni kapandadagyumiddan tuu. 20Hi-gam ni u-ungngak, ey u-unnud mu hu tugun amam niya entan tu liwwan hu intuttuddun inam. 21Iha-ad mudda humman di nemnem mu e heni ittudek muddad puhum. 22Huyyaddan tugun hu heni mengituttuddun pehding mun kewa-wa-wa, anin ni attu lawwam. Heni huyyadda mengippaptek ni hi-gam anin ni hileng niya menuggun ni hi-gam ni kawwalwal. 23Nemnem mu e huyyaddan tugun dan hi-gam hu heni kengkeh ni um-idwat ni benang tep ittudu tu panyaggudam. Daka katugguna ma-lat amtaem mu hu neiptek ni pehding mun mambiyag. 24Huyyaddan tugun hu mengidawwin hi-gam di lawah ni bii ma-lat eleg ka meidngelan ni malumi-ih ni ehel ni biin wada ahwa tu. 25Entan kaheul ni kinamaddikit idan nunman ni bii. Ey entan kaelukuy ni ki-ding ni mate da. 26Tep ya biin tuka pebeyyad annel tu ey dammutun umhulun ni kewetwetan ni laki. Tep anin na-mun humman law ni ebuh hu pihhuh etan ni laki et iggenda tun ibbayad nunman ni bii. Et lektattuy ibbayad tun emin hu wadan hi-gatu, anin ni ya biyag tu. 27Inamta tayun emin e eleg mabalin ni an ihhakli hu ngalab, tep kaw eleg megihheb balwasi? 28Ey kaw dammutun iggasin hu ngalab ey eleg meettungi heli? 29Hanniman dama hu lakin mengi-ullig ni biin wada ahwa tu e mahapul ni mekastigu. 30Dammutu na-mun han-awat idan tuu hedin nenakew ni mekkan hu matekew, tep neupa. 31Nem mahapul ni memulta hedin neha-kupan et meminpittu ibbayad tu etan di sinekew tu, anin na-mun ibbayyad tun emin hu wadan hi-gatu. 32Nem nema-ma-ma mewan etan lakin mengi-ullig ni beken tu ahwa, tep heni endi nemnem tu e hi-gatu ngu memahbah ni neitu-wan tu. 33Tep nanna-ud ni panhelheltap etan ni ahwan bii ey anggeba-ing ngu law ni ingganah hu neitu-wan tu. 34Tep ya lakin kaman-annil ey nemahhig bunget tu niya endi hemek tun pengiblehan tu. 35Anin na-mun piga e-helen etan ni nambahul ni lakin multa tu et eleg meellubyag hu bunget nunman ni kaman-annil.

will be added

X\