Numbers 3

1Huyyadda hu pamilyah Aaron nan Moses ni neitudek eman ni immehel hi Apu Dios nan Moses di Duntug e Sinai. 2Yadda lalakkin u-ungngan Aaron ey hi Nadab e pengulwan, hi Abihu, hi Eleasar et hi Ithamar. 3Neputuk idan mei-eng-eng ni mampeddi, 4nem netey di Nadab nan Abihu di hinanggan Apu Dios eman ni wadaddad Sinai e eleg mebebleyi, tep nan-appit idan hi-gatun apuy ni eleg mengippeamleng ni hi-gatu. Endi lakin u-ungnga da, et ebuh law hi Eleasar nan Ithamar ni nampadi eman ni ketaggun amedan hi Aaron. 5Kan Apu Dios nan Moses ey 6“Ayagim idadya hu helag Levi et putuken muddan umbaddang nan Aaron e padi. 7Hi-gada mengippahding idan mahapul ni meingngunnud Tabernacle e kad-an ku et mansilbiddan Aaron niyadda edum dan bimmebley. 8Mahapul mewan ni ippaptek da ngunut di Tabernacle niya mansilbiddadman e i-ehneng dadda edum dan helag Israel. 9Putuk mudda nisin umbaddang di Aaron ni han-aamma. 10Ebuh di Aaron niyadda lalakkin u-ungnga tun mengippahding ni ngunun padi. Ya kumpulmih ni tuun an meihnup di Tabernacle et tu ipahding hu ngunun padi ey meippepettey.” 11Kan mewan Apu Dios nan Moses ey 12“Yadda helag Levi hu pinilik idan helag Israel tep hi-gada hu mei-eng-eng ni hi-gak. Hi-gada meihhullul di emin ni pengulwan ni lalakkin u-ungngaddan helag Israel tep emin hu pengulwan ni lalakkin u-ungngaddan helag Israel ey mei-eng-eng idan hi-gak. Ya eman ni nemateyak idan pengulwan ni lalakkin u-ungngaddan iEgypt ey neieng-eng ni hi-gak idan emin hu pengulwan ni lalakkin u-ungngaddan helag Israel, anin idan nemangulun impah ni animal da. Hi-gak hu Ap-Apu e Dios .” 14Kan mewan nan Apu Dios nan Moses di diman Sinai ey 15“Bilang mudda lalakkin helag Levi ni hakey bulan tu niya nehuluk meippuun di pewen da niya pamilyah da.” 16Et bilangen Moses ida e inu-unnud tu intugun Apu Dios ni pehding tu. 17Huyyadda ngadan ni lalakkin u-ungngan Levi: hi Gerson, hi Kohat et hi Merari. 18Wada dewwan u-ungngan Gerson ni lalakki e hi Libni et hi Simei. 19Epat dama lakin u-ungngan Kohat: hi Amram, hi Ishar, hi Hebron et hi Ussiel. 20Dewwa dama hu lalakkin u-ungngan Merari e di Mahli nan Mushi. Huyyadda nahlag nan Levi ni neitudek meippuun di pamilyah da. 21Yadda nahlag nan Gerson ey nalpud pamilyah di Libnih nan Simei. 22Ya bilang emin ni lalakkin helag dan neilistan hakey bulan tu niya nehuluk ey 7,500. 23Hi-gada mangkampud awwidan ni Tabernacle di appit ni kakelinnugin aggew. 24Hi Eliasap e u-ungngan Lael hu mengipappangngulun hi-gada. 25Hi-gada ngenamung ni mengippaptek ni Tabernacle anin idan ngunut diman, yadda kultinah ni meihhennid heggeppan di bawang niyad dallin, yad nanlinikweh di Tabernacle niyad altar. Hi-gada pay ngenamung ni mengippaptek idan linubid niyadda edum ni kameussal diman. 27Yadda nahlag nan Kohat ey yadda pamilyah Amram, hi Ishar, hi Hebron et hi Usiel. 28Ya bilang emin ni lalakkin helag dan neilistan hakey bulan tu niya nehuluk ey 8,600. Hi-gada mengippaptek idan neieng-eng ni usal. 29Hi-gada mangkampud appit ni south. 30Hi Elisaphan e u-ungngan Usiel hu mengipappangngulun hi-gada. 31Yaddahhuy hu ippaptek da: ya Kaban Apu Dios, ya tebol, ya pattukkan ni kengkeh, yadda altar, yadda edum ni ngunut ni kaussalan padid bawang ni Tabernacle et ya kultinah ni neihenid heggeppan di kad-an Apu Dios. 32Hi Eleasar e padin u-ungngan Aaron hu mengipappangngulun emin idan helag Levi. Ey hi-gatu ingkalgaduh idan kamangngunnud Tabernacle. 33Yadda nahlag nan Merari ey humman ida pamilyah Mahli nan Mushi. 34Ya bilang emin ni lalakkin helag dan neilistan hakey bulan tu niya nehuluk ey 6,200. 35Hi-gada mangkampud north ni Tabernacle. Hi Suriel e u-ungngan Abihail hu mengipappangngulun hi-gada. 36Hi-gada ngenamung ni mengippaptek idan kalkalimangngan Tabernacle, yadda meibballabag, yadda tukud, yadda pengippeehnengan ni tukud niyaddan emin kameussal deya. 37Hi-gada pay ngenamung ni mengippaptek ni wadad dallin ni Tabernacle heniddan tukud, yadda pengippeehnengan ni tukud, yadda pa-pa niyadda linubid ni mahapul. 38Hi Moses nan Aaron niyadda u-ungnga tun lalakki hu mangkampud hinanggan Tabernacle di appit ni kasimmilin aggew. Hi-gada mengingngunnuddan hipan meippahding di Tabernacle, et mansilbiddan helag Israel. Ya kumpulmih ni tuun mengippatnan mengippahding ni ngunu da ey meippepettey. 39Ya bilang emin idan lalakkin helag Levi ni hakey bulan tu niya nehuluk ni inlistad Moses nan Aaron meippuun di intugun Apu Dios ey 22,000. 40Kan Apu Dios nan Moses ey “Emin hu lalakkin pengulwan ni helag Israel ey mei-eng-eng ni hi-gak. Mahapul ni illista yu ngadan idan hambulan tu niya nehuluk. Nem hedin ya mengi-ehneng ni hi-gadan mei-eng-eng ni hi-gak ey yadda helag Levi. Hi-gak hu Ap-Apu e Dios. Anin idan animal ni helag Levi et meiwwa-hiddan nemangulun impah ni animal idan helag Israel.” 42Inu-unnud Moses et bilangen tuddan emin hu pengulwan ni lalakkin helag Israel meippuun di tugun Apu Dios . 43Ya bilang emin ni pengulwan ni lalakkin helag Israel ey 22,273. 44Kan mewan Apu Dios nan Moses ey 45“Ieng-eng mun hi-gak ida helag Levi et meihullul idan emin ni pengulwan ni lalakkin helag Israel, anin idan animal da et meihhullul idan nemangulun impah ni animal idan helag Israel. Mei-eng-eng ida helag Levi ni hi-gak. Hi-gak hu Ap-Apu e Dios. 46Hedin yadda etan dewanggatut et nepitut tellun pengulwan ni lalakkin helag Israel ni nehuluk di bilang idan helag Levi ey mahapul ni wada wa-hi da. 47Ya bayad ni hakey meippuun di kameunnud ni pambeyyad ey liman palatah ni silber. 48Humman ni pihhuh ni bayad da ey meidwat nan Aaron et yadda u-ungnga tu.” 49Inu-unnud mewan Moses et amungen tu bayad idan nunman ni nehuluk di bilang ni neihullulan idan helag Levi 50ey 1,365 ni palatah ni silber, 51et idwat tun Aaron et yadda lalakkin u-ungnga tu meippuun di Tugun Apu Dios .

will be added

X\