Numbers 13

1Kan Apu Dios nan Moses ey 2“Pili kan hanhakkey di hampulut dewwan helag Israel et palaw muddan an mansi-im di Kanaan e bebley ni iddawat kun hi-gayu.” 3Et u-unnuden Moses humman inhel Apu Dios . Intu-dak tudda hampulut dewwan lalakkin kamengipappangnguluddan helag Israel et umgah idadman Paran e nangkampuan da. 4Huyyadda ngadan da: hi Sammua e u-ungngan Sakkur di helag Reuben, 5hi Saphat e u-ungngan Hori di helag Simeon, 6hi Kaleb e u-ungngan Jephunneh di helag Judah, 7hi Igal e u-ungngan Joseph di helag Issakar, 8hi Hosea e u-ungngan Nun di helag Epraim, 9hi Palti e u-ungngan Raphu di helag Benjamin, 10hi Gaddiel e u-ungngan Sodi di helag Sebulun, 11hi Ammiel e u-ungngan Gemalli di helag Dan, 12hi Gaddi e u-ungngan Susi di helag Manasseh e u-ungngan Joseph, 13hi Sethur e u-ungngan Michael di helag Asher, 14hi Nahbi e u-ungngan Bopsi di helag Naptali, 15et hi Geuel e u-ungngan Maki di helag Gad. 16Huyyadda intu-dak Moses ni an mansi-im ni bebley ni lawwan da. Yan nunyan tsimpuh hu nenullulan nan Moses ni ngadan Hosea e u-ungngan Nun ni Joshua. 17Yan nengitu-dakan Moses ni hi-gada ey kantuy “Elaw kayud appit ni north e idlan yud Negeb ingganah di appit ni south ni Kanaan ey nedagah kayud etan di duntuduntug ni bebley. 18Hedin dimmateng kayudman ey ang-ang yu hedin hipa elaw tu humman ni bebley niyadda bimmebley, hedin dakel ida winu hahhakkey ida winu hedin nangka-let ida winu eleg. 19Ey ang-ang yu hedin kayyaggud humman ni bebley winu lawah. Ang-ang yu hedin neluhud winu eleg. Niya ang-ang yu hedin mateba neitnem winu eleg, niya hedin dakel keyew. Ey yallin pambangngadan yu, ey ienamut kayun lameh ni neitnem diman.” (Yan nunman ni tsimpuh ey nelapuan ni melu-um hu grapes.) 21Limmaw ida humman ni lalakki et ilepu dan man-ang-ang-ang di eleg mebebleyid Sin di Kanaan ingganah di Rehab e neihnup di Hamat. 22Nampalaw ida nid appit ni north et mandalan idad Negeb et han-ida lumaw di Hebron e nambebleyan di Ahiman, hi Sehai et hi Talmai e helag idan etta-teng ni tutu-un kameingngadnin Anakim. (Ya Hebron hu nemangulun nekapyan bebley ni pitun toon et han hu Soan e bebley di Egypt.) 23Yan linawwan dad Nedeklan e Eskol ey immaladdan hambu-ngul ni grapes. Makabbel-at et pakkadek ni in-attang ni dewwan tuu. Immaladda pay ni lameh ni pomegranate niya lameh ni fig et ienamut da. 24Nginedanan idan nunman ni helag Israel humman ni Nedeklan e Eskol e ya keibbellinan tu ey ‘nebu-ngul’ tep yadman nengal-an dan nebu-ngul ni grapes. 25Nelabah hu na-pat ni aggew ni nansiiman da et mambangngad 26idad Kades di Paran e kad-an di Moses nan Aaron niyadda edum dan helag Israel. Ine-ehhel da hu inenang-ang da et peang-ang da etan lameh idan neitnem ni in-anemut da. 27Kandan Moses ey “Limmaw kamid bebley ni nengitu-dakam ni hi-gami ey inang-ang mi e kayyaggud niya makatmel ey mateba nangkeitnem diman. Dakel putsukan, ey adyah hu in-anemut min lameh idan neitnem ni inla midman. 28Nem yadda tutu-un nambebley diman ey nangka-let ida. Mahkang hu bebley da niya nehammad ni neluhud. Ey anggetakkut tep wada etta-teng ni tutu-udman e nahlag idan Anak. 29Hedin yadda iAmalek ey nambebley idad Negeb. Yadda Hittite, yadda Jebusite niyadda Amorite ey nambebley idad duntuduntug diman. Yadda iKanaan ey nambebley idad gilig ni baybay niyaddad gilig ni Wangwang e Jordan.” 30Kamanlillih ida helag Israel nan Moses nem impaineng Kaleb et kantuy “Itsuy kuma et tayudda gubaten et hi-gatsu mambebley diman tep nanna-ud ni apputen tayudda.” 31Nem kan ida etan ni edum tun an nansiim ey “Eleg tayudda mannuman han-apput tep ka-ang-ang e et-eteng kabaelan da nem hi-gatsu.” 32Inhinap dad edum dan helag Israel hu beken ni makulug ni meippanggep etan ni bebley. Kanday “Lawah hu puyek diman tep kulang hu kaillameh idan neitnem ni kennen ni emin ni nambebley diman niya etta-teng idan tutu-u hu nambebley diman. 33Immen ida pay diman hu helag Anak et hedin ya mika penang-ang ni annel mi ey heni kami taggunnay ey nanna-ud ni hanniman hu penang-ang dan hi-gami.”

will be added

X\