Nehemiah 5

1Entanni ey wadadda nandiklamuh tep ya kapehpehding ni edum dan Jew. 2Kanday “Etta-teng pamilyah mi, et humman hu, mahapul mi daddakkel ni pihhuh ni iggatang mid kennen mi et eleg kami mahkaw.” 3Kan daman edum ey “Nan-ibelal mi papayyew mi, anin idan mika pantennemin grapes et yadda baballey mi et igtang mid kennen mi ma-lat tumegu kami.” 4Hedin yadda mewan edum, kanday “Dakel law inutang min nemayabayad min buwis ni papayyew mi et ya mika pantennemin grapes. 5Hakey nahlagan mi, ey nan-iingeh hu kakinayyaggud ni u-ungnga mi niya u-ungnga da, nem mahapul katteg ngun iggatang mi u-ungnga mi et mambalin idan himbut, ma-lat wada iggatang mid kennen mi et eleg kami matey ni upa. Neihbut ida law edum ni bibi-in u-ungnga mi, nem endi katteg dammutun pehding mi tep neibelal ni emin hu puyek mi.” 6Dingngel ku huyyan diklamuh da ey peteg bunget ku. 7Nannemnemnemmak ni pehding ku ey immalid nemnem ku e e-helak ida aap-apu et yadda opisyal. Kangkun hi-gaday “Nem kele anhan pakkadek ni yu peporsentoh hu yuka pebenneh ni pihhuh idan aaggi yu et yudda kapanligligat?” Impaeyag kuddan emin hu tutu-u et panhuhummanganan mi hu elaw nunya. 8Neamung ida et kangkun hi-gaday “Nanligligatan tayu mewan ni nemangngad eyaddan aaggi tayun nengihbut ni annel dad tutu-ud edum ni bebley ni eleg mandeyyaw nan Apu Dios ey kele yan nunya mewan ey pinilit yuddan mambalin ni himbut yu ey edum yuddan Jew?” Ey ida kaum-i-ineng hu aap-apu e endi humang da. 9Kangku mewan ey “Lawah huttan ni yuka pehpehding! Gullat et kuma ey umtakut kayun Apu Dios et ya kayyaggud pehding yu et endi umhulun ni pemihhulan idan buhul tayun hi-gatsu! 10Tam anin hi-gak et yadda eya edum ku et nampautang kamin pihhuh niya begah. Hedin ya kumaddan hu kayyaggud ni pehding tayu ey eleg tayu pebeyyad ida impautang tayu. 11Mahapul ni pebangngad yu papayyew da, yadda daka pantennemin grapes niya olibah et ya baballey da. Mahapul mewan ni pebangngad yudda porsentoh ni illa yun inutang dan pihhuh, ya begah, ya meinnum niya mansikan olibah.” 12Kan idan aap-apu ey “Em, u-unnuden mi inhel mu. Ibbangngad min emin ida illa min hi-gada ey eleg mi law uh-uha inutang da.” Inaygak ida papaddi et pansapatah kudda humman ni ap-apun hi-gada. 13Inubad ku hu in-awekeh kud gitang ku et yagyagak hu balwasik et kangkuy “Hanneya pehding Apu Dios ni tuun eleg mengippahding ni inhel tun pehding tu. Ellan Apu Dios hu baley tu ey emin limmu tu et endin hekey hu metdaan ni hi-gatu.” Kan idan emin ni tuun humang day “Amen!” Et dayawen da hi Apu Dios . Ey impahding ida numan ni aap-apu hu inhel dan pehding da. 14Yan hi-gak hu gobernor di Judah ni hampulut dewwan toon e meippalpun meikkadwampulun toon ni nan-ap-apuan Artaserses ingganah ni meikkatelumpulut dewwan toon ni nan-ap-apuan tu, ey endi kinan middan edum kun kennen ni lebbeng tun meidwat ni hi-gak e gobernor. 15Ey hedin yadda la nanggobernor ni nunman et hannak maihullul ey et-eteng hu in-inla daddan tutu-u. Nambagaddan kewa-wa-wan na-pat ni silber, ya kennen niya meinnum. Anin idan bega-en da et impanligligat dadda dama tutu-u. Nem hedin ngun hi-gak, man eggak ipahding ida humman tep nakka umtakut nan Apu Dios. 16Ingkahhakey ku nemnem kun nangngunungunud tuping ni bebley. Eggak abuluten ni wada nak gettangen ni puyek ma-lat pampuyek ku. Anin idan opisyal ku et minandal kuddan mangngunnud tuping. 17Eggak ni hekey mangkedew ni mahapul ku anin ni nakka pappangngan hu hanggatut et neliman edum tayun Jew, hin-appil mewan hu mangili ni kamelpud edum ni bebley di nanlinikweh. 18Hedin ya nakka pehiddan kewa-wa-wa man hakey ni baka, enem ni mangkateban kalneroh niya dakel ni manuk. Hedin mewan nelabah hu hampulun aggew man wada nakka idaddan ni nambakbaklang ni meinnum. Nem anin ni hanniman et eggak mambagan lebbeng tun meidwat ni gobernor ni kamelpuddan tutu-u, tep amtak e ida kameligligasi. 19Et mandasallak nan Apu Dios e kangkuy “Nemnem mu anhan hu impenahding kun panyaggudan ida eyan tutu-u et bendisyonan muwak.”

will be added

X\