Joshua 13

1Nea-amma law hi Joshua ey immehel hi Apu Dios ni hi-gatu et kantuy “Nea-amma ka law ey dakel pay hu puyek ni mahapul ni sekkupen yu. 2Huyyadda pay hu bebley ni eleg yu sakupen: Emin hu bebley di Pilistia et yad Geshur, yadda bebley di Abbim di appit ni south, meippalpud Wangwang e Sihor di pappeg ni Egypt ingganah di pappeg ni Ekron di appit ni north e neibilang ni bebley ni Kanaanite et ya bebley idan etan ni liman patul di Gaza, Asdod, Askelon, Gath niyad Ekron e bebley di Pilistia, emin hu bebley idan Kanaanite ni wadad appit ni north e ya pappeg tu ey meippalpud Mearah e bebley idan iSidon ingganah di Apek di pappeg ni bebley idan Amorite, yadda bebley idan Gebalite niya emin hu Lebanon di appit ni kasimmilin aggew meippalpud Baalgad di appit ni south di Duntug e Hermon ingganah di Hamat. Neibilang deya ida bebley ni iSidon di nambattanan ni Misrepot Maim et yadda duntug di Lebanon. Baddangan dakeyun hi-gak et sakupen yudda huyyan bebley ma-lat ekalen yudda tutu-udman. Mahapul ni gennedwaen mudda huyyan bebley et i-peng mudda etan di heyam ni helag Israel et ya gedwan helag Manasseh tep huyya dedan la intugun kun pehding mu.” 8Ya etan puyek di appit ni kasimmilin aggew di Wangwang e Jordan ey indawat Moses, e bega-en Apu Dios, idan helag Reuben, yadda helag Gad et yadda kagedwah ni helag Manasseh. 9Ya pappeg ni bebley da ey meippalpud Aroer di gilig ni Nedeklan e Arnon, anin etan bebley di gawwan nunman e nandeklan et yadda bebley di duntug meippalpud Medeba ingganah di Dibon, 10niya ingganah di pappeg ni bebley idan Ammonite ey nei-dum emin hu bebley ni nampatulan Sihon e patul ni Amorite di Hesbon. 11Nei-dum pay hu Gilead, yadda bebley di Geshur niya Maakah, emin ida bebley di Duntug e Hermon, yadda bebley di Bashan ingganah Salekah. 12Sinekup da pay hu nan-ap-apuan etan ni patul e hi Og e natdaan idan helag Repaim e nan-ap-apud Astarot et yad Edrei. Dinegyun Moses ida humman di diman ni bebley tep inapput tuddad gubat. 13Nem eleg degyunen idan helag Israel ida tutu-ud Geshur et yad Maakah et ingganah nunya ey nekibebley idan hi-gada. 14Endi an indawat Moses ni puyek idan helag Levi tep kan Apu Dios nan Moses ey hedin ya patal da ey ya meidwat ni hi-gada etan ida kamei-appit di altar Apu Dios e Dios idan helag Israel. 15Huyya indawat Moses ni pambebleyan idan helag Reuben. 16Ya sakup ni bebley da ey nampalaw di Aroer di gilig ni Nedeklan e Arnon, anin etan neigawwan et-eteng ni bebley di diman nandeklan et yadda bebley di ta-pew idan duntug di Medeba. 17Nei-dum pay hu Hesbon niya emin ida bebley di ta-pew idan Duntug e Dibon, Bamot Baal, Bet Baal Meon, 18Jahas, Kedemot, Mephaat, 19Kiriathaim, Sibmah, Seret Sahar di duntug di nandeklan, 20Betpeor, yadda nansigging di Duntug e Pisgah et ya Bet Jeshimot. 21Sinekup da pay ida bebley di ta-pew ni duntug niya emin ida bebley ni nan-ap-apuan nan Sihon e patul idan Amorite e hi Sihon di Hesbon. Inapput lan Moses humman ni patul anin idan patul di Midian e di Ebi, hi Rekem, hi Sur, hi Hur et hi Reba. Huyyaddan patul ey nansilbi idan Sihon e patul. 22Ya hakey ni pintey idan helag Israel ey hi Balaam e maebig e u-ungngan Beor. 23Ya pappeg ni bebley ni neidwat idan helag Reuben ey ya appit di kakelinnugin aggew di Wangwang e Jordan. Huyyan emin hu bebley ni bineltan idan helag Reuben. 24Indawtan lan Moses ida dama helag Gad ni pambebleyan da. 25Yadda bebley ni neidwat ni hi-gada ey Jaser, emin hu bebley di Gilead ya kagedwah ni bebley di Ammon ingganah di Aroer e neihnup di Rabbah. 26Ya pappeg ni bebley da ey meippalpud Hesbon et yad Ramat Mispeh niya Betonim, meippalpud Mahanaim et ingganah di pappeg ni Lodebar, 27anin ni nandeklan di Jordan ey nei-dum hu Bet Haram, Betnimrah, Sukkot, ya Sapon et yadda edum ni bebley ni nan-ap-apuan ni patul e hi Sihon di Hesbon. Ya pappeg ni bebley dad appit ni kakelinnugin aggew ey ya Wangwang e Jordan ingganah di Baybay e Galilee. 28Huyyadda bebley ni neidwat idan helag Gad. 29Indawtan daman Moses ida kagedwah ni helag Manasseh ni bebley ni pambebleyan da. 30Sinekup ni bebley da hu Mahanaim, emin hu bebley di Bashan et yadda na-nem ni bebley di Jair di diman. Humman idan emin ni bebley ey nan-ap-apuan lan eman ni patul e hi Og. 31Nei-dum hu kagedwah ni Gilead et yadda bebley nan patul e hi Og e ya Astarot et ya Edrei. Emin ida huyya neidwat idan helag Makir e u-ungngan Manasseh. 32Hanneya impahding Moses ni nengika-peng ni mahkang ni nandeklan di Moab e appit ni kasimmilin aggew di Jericho di ba-hil ni Wangwang e Jordan. 33Nem hedin yadda helag Levi e endi an indawat Moses ni hi-gada tep inhel tun hi-gada e hedin ya beltanen da ey ya kameidwat ni hi-gada etan idad kamei-appit nan Apu Dios ni Israel.

will be added

X\